రోమీయులు 16:1-27
16 కెంక్రేయలోని సంఘంలో సేవ చేస్తున్న మన సోదరి ఫీబేను మీకు పరిచయం* చేస్తున్నాను.
2 ప్రభువు శిష్యురాలిగా ఆమెను పవిత్రులకు తగ్గట్టు చేర్చుకొని ఆమెకు కావాల్సిన సహాయం చేయాలని ఆమెను పరిచయం చేస్తున్నాను. ఎందుకంటే ఆమె కూడా నన్నూ, చాలామంది ఇతర సోదరులనూ కాపాడింది.
3 క్రీస్తుయేసు సేవలో నా తోటి పనివాళ్లయిన ప్రిస్కకు, అకులకు నా శుభాకాంక్షలు తెలపండి.
4 వాళ్లు నాకోసం తమ ప్రాణాల్ని పణంగా పెట్టారు. వాళ్లకు నేను కృతజ్ఞతలు చెప్తున్నాను. నేనే కాదు, అన్యులు ఉన్న సంఘాల వాళ్లంతా కృతజ్ఞతలు చెప్తున్నారు.
5 వాళ్ల ఇంట్లో ఉన్న సంఘానికి కూడా శుభాకాంక్షలు తెలపండి. ఆసియాలో మొట్టమొదట క్రీస్తు శిష్యులైన వాళ్లలో ఒకడైన నా ప్రియ సోదరుడు ఎపైనెటును అడిగినట్టు చెప్పండి.
6 మీకోసం కష్టపడి పనిచేసిన మరియను అడిగినట్టు చెప్పండి.
7 నా బంధువులు, నా తోటి ఖైదీలు అయిన అంద్రొనీకును, యూనీయను అడిగినట్టు చెప్పండి. అపొస్తలుల దగ్గర వాళ్లకు చాలా మంచి పేరు ఉంది. వాళ్లు నాకన్నా ముందు నుండి క్రీస్తు శిష్యులుగా ఉన్నారు.
8 ప్రభువు శిష్యుడైన నా ప్రియ సోదరుడు అంప్లీయతును అడిగినట్టు చెప్పండి.
9 క్రీస్తు సేవలో మన తోటి పనివాడైన ఊర్బానును, అలాగే నా ప్రియ సోదరుడు స్టాకును అడిగినట్టు చెప్పండి.
10 క్రీస్తు ఆమోదం పొందిన అపెల్లెను అడిగినట్టు చెప్పండి. అరిస్టొబూలు ఇంటివాళ్లను అడిగినట్టు చెప్పండి.
11 నా బంధువైన హెరోదియోనును అడిగినట్టు చెప్పండి. ప్రభువు అనుచరులైన నార్కిస్సు ఇంటివాళ్లను అడిగినట్టు చెప్పండి.
12 ప్రభువు సేవలో కష్టపడి పనిచేస్తున్న త్రుపైనా, త్రుఫోసా అనే సోదరీలను అడిగినట్టు చెప్పండి. మన ప్రియ సోదరి పెర్సిసును అడిగినట్టు చెప్పండి, ఎందుకంటే ఆమె ప్రభువు సేవలో కష్టపడి పనిచేసింది.
13 ప్రభువు ఎంచుకున్న రూఫును, వాళ్ల అమ్మను అడిగినట్టు చెప్పండి; ఆమె నాకు తల్లిలాంటిది.
14 అసుంక్రితును, ప్లెగోనును, హెర్మేను, పత్రొబను, హెర్మాను, వాళ్లతో పాటు ఉన్న సోదరులను అడిగినట్టు చెప్పండి.
15 పిలొలొగును, యూలియాను, నేరియను, అతని సోదరిని, ఒలుంపాను, అలాగే వాళ్లతో ఉన్న పవిత్రులందర్నీ అడిగినట్టు చెప్పండి.
16 పవిత్రమైన ముద్దు పెట్టుకొని ఒకరినొకరు పలకరించుకోండి. క్రీస్తు సంఘాలన్నీ మీకు శుభాకాంక్షలు తెలుపుతున్నాయి.
17 నేను ఇప్పుడు మిమ్మల్ని వేడుకునేది ఏమిటంటే, మీరు నేర్చుకున్న బోధకు విరుద్ధంగా విభజనలు సృష్టించేవాళ్లను, తప్పుదోవ పట్టించేవాళ్లను ఓ కంట కనిపెట్టండి; వాళ్లకు దూరంగా ఉండండి.
18 అలాంటివాళ్లు ప్రభువైన క్రీస్తుకు కాదుగానీ తమ సొంత కడుపులకు దాసులు. ఇంపైన మాటలతో, పొగడ్తలతో వాళ్లు అజాగ్రత్తగా ఉన్నవాళ్లను* మోసం చేస్తారు.
19 మీ విధేయత అందరి దృష్టికి వచ్చింది కాబట్టి మీ విషయంలో నేను సంతోషిస్తున్నాను. అయితే, ఏది మంచిదో తెలుసుకోవడానికి మీరు తెలివైనవాళ్లుగా ఉండాలని, చెడ్డదాని గురించి అస్సలు తెలుసుకోకూడదని కోరుకుంటున్నాను.
20 శాంతిని ప్రసాదించే దేవుడు త్వరలోనే సాతానును మీ కాళ్ల కింద చితకతొక్కిస్తాడు. ప్రభువైన యేసు చూపించే అపారదయ మీకు తోడుండాలి.
21 నా తోటి పనివాడైన తిమోతి మిమ్మల్ని అడిగినట్టు చెప్తున్నాడు. అలాగే నా బంధువులైన లూకియ, యాసోను, సోసిపత్రు కూడా మిమ్మల్ని అడిగినట్టు చెప్తున్నారు.
22 పౌలు చెప్తుంటే ఈ ఉత్తరాన్ని రాసిన తెర్తి అనే నేను కూడా ప్రభువు పేరున నా శుభాకాంక్షలు తెలుపుతున్నాను.
23 నాకు, అలాగే సంఘమంతటికీ అతిథేయి అయిన గాయియు మిమ్మల్ని అడిగినట్టు చెప్తున్నాడు. ఈ నగర కోశాధికారి ఎరస్తు, అతని సోదరుడు క్వర్తు మిమ్మల్ని అడిగినట్టు చెప్తున్నారు.
24 *——
25 నేను ప్రకటించే మంచివార్త, అలాగే యేసుక్రీస్తు గురించిన సందేశం దేవుడు మిమ్మల్ని స్థిరపర్చగలడని చూపిస్తున్నాయి. ఈ మంచివార్త, పవిత్ర రహస్యం గురించి దేవుడు వెల్లడి చేసిన దానికి అనుగుణంగా ఉంది. ఆ పవిత్ర రహస్యం ఎన్నో యుగాలుగా గుప్తంగా ఉంచబడింది.
26 కానీ ఇప్పుడు ఆ రహస్యం వెల్లడి చేయబడింది. లేఖనాల్లోని ప్రవచనాల ద్వారా అన్నిదేశాల ప్రజలు ఆ రహస్యం గురించి తెలుసుకున్నారు. నిరంతరం జీవించే దేవుడు ఇచ్చిన ఆజ్ఞకు అది అనుగుణంగా ఉంది. అన్నిదేశాల ప్రజలు ఆయన మీద విశ్వాసం ఉంచి, ఆయనకు లోబడాలన్నదే ఆయన కోరిక.
27 ఏకైక జ్ఞాని* అయిన దేవునికి యేసుక్రీస్తు ద్వారా నిరంతరం మహిమ కలగాలి. ఆమేన్‌.
అధస్సూచీలు
^ లేదా “సిఫారసు.”
^ లేదా “అజాగ్రత్తగా ఉన్నవాళ్ల హృదయాల్ని.”
^ మత్తయి 17:21కి ఉన్న పాదసూచిక చూడండి.
^ లేదా “తెలివిగలవాడు.”
