1 పేతురు 2:1-25
2 కాబట్టి అన్నిరకాల చెడుతనాన్ని, మోసాన్ని, కపటాన్ని, అసూయను, వెనక మాట్లాడుకోవడాన్ని వదిలేయండి.
2 అప్పుడే పుట్టిన పిల్లల్లా, వాక్యం అనే స్వచ్ఛమైన పాల మీద ఆకలిని పెంచుకోండి. ఎందుకంటే దాని ద్వారా మీరు రక్షణ పొందే దిశగా ఎదుగుతారు.
3 అయితే ప్రభువు దయగలవాడనే విషయాన్ని మీరు అనుభవపూర్వకంగా తెలుసుకొని ఉంటేనే అది సాధ్యమౌతుంది.
4 మీరు సజీవమైన రాయిగా ఉన్న ఆయన దగ్గరికి వచ్చారు. మనుషులు ఆయన్ని తిరస్కరించారు; కానీ దేవుడు ఆయన్ని ఎంపిక చేసుకున్నాడు, దేవునికి ఆయన అమూల్యమైన వ్యక్తి.
5 మీరు కూడా సజీవమైన రాళ్లుగా ఉన్నారు. దేవుని పవిత్రశక్తి ద్వారా మీరు ఓ ఇల్లుగా నిర్మించబడుతున్నారు. యేసుక్రీస్తు ద్వారా, దేవుని పవిత్రశక్తికి అనుగుణంగా దేవునికి ఇష్టమైన బలులు అర్పించే పవిత్రమైన యాజక బృందంగా ఉండడానికి మీరు అలా నిర్మించబడుతున్నారు.
6 ఎందుకంటే లేఖనంలో ఇలా ఉంది: “ఇదిగో! నేను ఎంపిక చేసుకున్న రాయిని, అమూల్యమైన పునాది మూలరాయిని సీయోనులో పెడుతున్నాను. దాని మీద విశ్వాసం ఉంచేవాళ్లెవ్వరూ ఎప్పుడూ నిరాశపడరు.”*
7 మీరు విశ్వాసులు కాబట్టి మీకు ఆయన అమూల్యమైన వ్యక్తి; కానీ నమ్మనివాళ్ల విషయానికొస్తే, “కట్టేవాళ్లు వద్దనుకున్న రాయి ముఖ్యమైన మూలరాయి* అయ్యింది,”
8 అలాగే ఓ “అడ్డురాయి, అడ్డుబండ” అయ్యింది. వాళ్లు వాక్యానికి లోబడరు కాబట్టి పడిపోతున్నారు. అలాంటివాళ్లకు చివరికి పట్టే గతి అదే.
9 కానీ మీరు, చీకటిలో నుండి అద్భుతమైన తన వెలుగులోకి మిమ్మల్ని పిలిచిన దేవుని “గొప్ప లక్షణాల గురించి దేశదేశాల్లో ప్రకటించడానికి ఎంపిక చేసుకోబడిన వంశం, రాజులైన యాజక బృందం, పవిత్ర జనం, దేవుని సొత్తయిన ప్రజలు.”
10 ఎందుకంటే ఒకప్పుడు మీరు దేవుని ప్రజలు కాదు, కానీ ఇప్పుడు మీరు ఆయన ప్రజలు; ఒకప్పుడు దేవుడు మీ మీద కరుణ చూపించలేదు, కానీ ఇప్పుడు ఆయన మీ మీద కరుణ చూపించాడు.
11 ప్రియ సోదరులారా, ఈ లోకంలో పరదేశులుగా, తాత్కాలిక నివాసులుగా ఉన్న మిమ్మల్ని నేను ప్రోత్సహించేదేమిటంటే, మీకు వ్యతిరేకంగా పోరాడే శరీర కోరికలకు దూరంగా ఉండండి.
12 లోక ప్రజల మధ్య మీ మంచి ప్రవర్తనను కాపాడుకోండి. అప్పుడు, తప్పుచేశారని మిమ్మల్ని నిందించినవాళ్లు మీ మంచి పనుల్ని కళ్లారా చూడగలుగుతారు. దానివల్ల, దేవుడు తనిఖీ చేయడానికి వచ్చినప్పుడు వాళ్లు దేవుణ్ణి మహిమపర్చగలుగుతారు.
13 ప్రభువు కోరిక మేరకు మీరు మనిషి స్థాపించిన అధికారాలన్నిటికీ లోబడి ఉండండి. మీ మీద అధికారిగా ఉన్నందుకు రాజుకు లోబడి ఉండండి.
14 అలాగే అధిపతులకు కూడా లోబడి ఉండండి. ఎందుకంటే వీళ్లు తప్పు చేసినవాళ్లను శిక్షించడానికి, మంచి చేసినవాళ్లను మెచ్చుకోవడానికి రాజు నియమించిన వ్యక్తులు.
15 మీరు మంచి చేయడం ద్వారా మూర్ఖంగా మాట్లాడే తెలివితక్కువ మనుషుల నోళ్లు మూయించాలనేది* దేవుని ఇష్టం.
16 మీరు స్వతంత్రులుగా ఉండండి. అయితే మీ స్వేచ్ఛను తప్పు చేయడానికి ఒక సాకుగా ఉపయోగించుకోకుండా, దేవునికి దాసులుగా ఉండండి.
17 అన్నిరకాల ప్రజల్ని ఘనపర్చండి; ప్రపంచవ్యాప్తంగా ఉన్న సోదర బృందాన్ని ప్రేమించండి; దేవునికి భయపడుతూ ఉండండి; రాజును ఘనపర్చండి.
18 దాసులుగా ఉన్నవాళ్లు పూర్తి గౌరవంతో తమ యజమానులకు లోబడి ఉండాలి. మంచి యజమానులకు, అర్థంచేసుకునే యజమానులకే కాదు, కఠినులైన యజమానులకు కూడా అలా లోబడి ఉండాలి.
19 దేవుని ముందు మంచి మనస్సాక్షి కలిగివుండడానికి కష్టాల్ని* సహించేవాళ్లను, అన్యాయంగా బాధలుపడేవాళ్లను దేవుడు ఇష్టపడతాడు.
20 పాపం చేసినందుకు దెబ్బలు తిని, సహిస్తే అందులో గొప్పతనం ఏముంది? మంచిపని చేసినందుకు బాధలు పడి, సహిస్తే దేవుడు దాన్ని ఇష్టపడతాడు.
21 నిజానికి, ఇందుకోసమే మీరు పిలవబడ్డారు. క్రీస్తు కూడా మీ కోసం బాధలు అనుభవించాడు. మీరు నమ్మకంగా తన అడుగుజాడల్లో నడవాలని మీకు ఆదర్శాన్ని ఉంచాడు.
22 ఆయన ఏ పాపం చేయలేదు, ఆయన నోట ఏ మోసం కనిపించలేదు.
23 ప్రజలు ఆయన్ని అవమానించినప్పుడు* ఆయన తిరిగి వాళ్లను అవమానించలేదు.* ఆయన బాధ అనుభవించినప్పుడు తనను బాధపెట్టినవాళ్లను బెదిరించలేదు. బదులుగా నీతిగా తీర్పుతీర్చే దేవునికే తనను తాను అప్పగించుకున్నాడు.
24 ఆయన కొయ్యకు* దిగగొట్టబడినప్పుడు తన సొంత శరీరంతో మన పాపాల్ని మోశాడు. మనం పాపం విషయంలో చనిపోయి, నీతి విషయంలో బ్రతకాలనే ఉద్దేశంతో ఆయన అలా చేశాడు. “ఆయన గాయాల వల్ల మీరు బాగయ్యారు.”
25 ఎందుకంటే ఒకప్పుడు మీరు దారితప్పిన గొర్రెల్లా ఉండేవాళ్లు, కానీ ఇప్పుడు మీ ప్రాణాల్ని* సంరక్షించే కాపరి దగ్గరికి* తిరిగి వచ్చారు.
అధస్సూచీలు
^ అక్ష., “సిగ్గుపర్చబడరు.”
^ అక్ష., “మూలకు తల.”
^ అక్ష., “నోళ్లకు చిక్కం వేయాలనేది.”
^ లేదా “దుఃఖాన్ని; నొప్పిని.”
^ లేదా “దూషించినప్పుడు.”
^ లేదా “దూషించలేదు.”
^ లేదా “చెట్టుకు.”
^ గ్రీకులో సైఖే. పదకోశంలో “ప్రాణం” చూడండి.
^ లేదా “మీ ప్రాణాల కాపరి దగ్గరికి, పర్యవేక్షకుడి దగ్గరికి.”
