ఆమోసు 7:1-17
7 సర్వోన్నత ప్రభువైన యెహోవా దర్శనంలో నాకు ఇది చూపించాడు: ఇదిగో! చివరి పంట మొలకెత్తే సమయంలో* ఆయన ఒక మిడతల దండును పుట్టించాడు. రాజుకు చెందిన ఎండుగడ్డిని కోసిన తర్వాత వేసే పంట అది.
2 మిడతల దండు నేలమీది పంటంతటినీ తినేసిన తర్వాత నేనిలా అన్నాను: “సర్వోన్నత ప్రభువైన యెహోవా, దయచేసి క్షమించు!+ యాకోబు ఎలా లేస్తాడు? అతను బలహీనంగా ఉన్నాడు!”+
3 దాంతో యెహోవా దాని గురించి ఇంకోసారి ఆలోచించాడు.*+ యెహోవా, “అది జరగదు” అన్నాడు.
4 సర్వోన్నత ప్రభువైన యెహోవా దర్శనంలో నాకు ఇది చూపించాడు: ఇదిగో! సర్వోన్నత ప్రభువైన యెహోవా అగ్నిని ఉపయోగించి శిక్షించాడు. అది విస్తారమైన అగాధ జలాల్ని, దేశంలోని ఒక భాగాన్ని దహించివేసింది.
5 అప్పుడు నేను, “సర్వోన్నత ప్రభువైన యెహోవా, దయచేసి అలా చేయకు.+ యాకోబు ఎలా లేస్తాడు? అతను బలహీనంగా ఉన్నాడు!” అన్నాను.+
6 దాంతో యెహోవా దాని గురించి ఇంకోసారి ఆలోచించాడు.*+ సర్వోన్నత ప్రభువైన యెహోవా, “అది కూడా జరగదు” అన్నాడు.
7 ఆయన దర్శనంలో నాకు ఇది చూపించాడు: ఇదిగో! లంబసూత్రం* ఉపయోగించి కట్టిన గోడపై యెహోవా నిల్చొని ఉన్నాడు, ఆయన చేతిలో ఒక లంబసూత్రం ఉంది.
8 అప్పుడు యెహోవా నన్ను, “ఆమోసూ, నీకేం కనిపిస్తోంది?” అని అడిగాడు. దానికి నేను, “ఒక లంబసూత్రం” అన్నాను. తర్వాత యెహోవా ఇలా అన్నాడు: “ఇదిగో, నా ప్రజలైన ఇశ్రాయేలీయుల మధ్య నేను ఒక లంబసూత్రాన్ని పెడుతున్నాను. నేనిక వాళ్లను క్షమించను.+
9 ఇస్సాకు ఉన్నత స్థలాలు+ పాడైపోతాయి, ఇశ్రాయేలు పవిత్రమైన స్థలాలు నాశనమైపోతాయి;+ నేను యరొబాము ఇంటివాళ్ల మీదికి ఖడ్గంతో వస్తాను.”+
10 బేతేలు యాజకుడైన+ అమజ్యా ఇశ్రాయేలు రాజైన యరొబాముకు+ ఈ సందేశం పంపించాడు: “ఆమోసు ఏకంగా ఇశ్రాయేలు ఇంటివాళ్ల మధ్యే నీ మీద కుట్ర పన్నుతున్నాడు.+ దేశంలోని ప్రజలు అతను చెప్పే మాటలన్నీ భరించలేరు.+
11 ‘యరొబాము ఖడ్గం చేత చంపబడతాడు, ఇశ్రాయేలీయులు ఖచ్చితంగా తమ దేశం నుండి బందీలుగా తీసుకెళ్లబడతారు’ అని ఆమోసు చెప్తున్నాడు.”+
12 తర్వాత అమజ్యా ఆమోసుతో ఇలా అన్నాడు: “దర్శనాలు చూసేవాడా, యూదా దేశానికి పారిపో, అక్కడే నీ రొట్టె సంపాదించుకో,* అక్కడే ప్రవచించు.+
13 కానీ ఇకమీదట నువ్వు బేతేలులో ప్రవచించకూడదు,+ ఎందుకంటే ఇది ఒక రాజు పవిత్రమైన స్థలం,+ ఒక రాజ్యానికి రాజధాని.”
14 అప్పుడు ఆమోసు అమజ్యాతో ఇలా చెప్పాడు: “నేను ప్రవక్తను కాదు, ప్రవక్త కుమారుణ్ణీ కాదు; నేనొక పశువుల కాపరిని,+ అత్తి చెట్లను చూసుకునేవాణ్ణి.*
15 అయితే పశువులు కాస్తున్న నన్ను యెహోవా పిలిచాడు. యెహోవా నాతో ఇలా అన్నాడు, ‘వెళ్లు, ఇశ్రాయేలీయులైన నా ప్రజలకు ప్రవచించు.’+
16 కాబట్టి ఇప్పుడు యెహోవా చెప్తున్న ఈ మాట విను: ‘ “ఇశ్రాయేలుకు వ్యతిరేకంగా ప్రవచించకు,+ ఇస్సాకు ఇంటివాళ్లకు వ్యతిరేకంగా ప్రకటించకు”+ అని నువ్వు అంటున్నావు.
17 కాబట్టి యెహోవా ఇలా అంటున్నాడు: “నగరంలో నీ భార్య వేశ్య అవుతుంది; నీ కుమారుల్ని, కూతుళ్లను ఖడ్గంతో చంపుతారు. నీ భూమిని కొలనూలుతో కొలిచి పంచుకుంటారు, నువ్వేమో అపవిత్రమైన దేశంలో చనిపోతావు; ఇశ్రాయేలీయులు ఖచ్చితంగా తమ దేశం నుండి బందీలుగా తీసుకెళ్లబడతారు.” ’ ”+
అధస్సూచీలు
^ అంటే జనవరి, ఫిబ్రవరి నెలల్లో.
^ లేదా “విచారపడ్డాడు.”
^ లేదా “విచారపడ్డాడు.”
^ లేదా “మట్టపుగుండు.”
^ అక్ష., “తిను.”
^ లేదా “అత్తి పండ్లకు గాట్లు పెట్టేవాణ్ణి.”
