కీర్తనలు 19:1-14
సంగీత నిర్దేశకునికి సూచన. దావీదు శ్రావ్యగీతం.
19 ఆకాశం దేవుని మహిమను చాటుతోంది;+అంతరిక్షం* ఆయన చేతి పనిని ప్రకటిస్తోంది.+
2 ప్రతీ రోజు వాటి మాటలు పెల్లుబుకుతున్నాయి,ప్రతీ రాత్రి అవి జ్ఞానాన్ని వెల్లడి చేస్తున్నాయి.
3 వాటికి భాష లేదు, మాటలు లేవు;వాటి స్వరం వినిపించదు.
4 అయినా వాటి సాక్ష్యం* భూమంతటికి,వాటి సందేశం భూమి* నలుమూలలకు చేరుకుంది.+
ఆయన ఆకాశంలో సూర్యుని కోసం ఒక డేరా వేశాడు;
5 సూర్యుడు తన గదిలో నుండి బయటికి వస్తున్న పెళ్లికుమారుడిలా ఉన్నాడు;తన మార్గంలో పరుగెత్తడానికి సంతోషించే బలవంతుడిలా ఉన్నాడు.
6 సూర్యుడు ఆకాశంలో ఒకవైపు నుండి బయల్దేరి,చుట్టూ తిరిగి మరో వైపుకు వెళ్తాడు;+ఆ వేడికి మరుగైనది ఏదీ లేదు.
7 యెహోవా ధర్మశాస్త్రం పరిపూర్ణమైనది,+ అది సేదదీర్పునిస్తుంది.*+
యెహోవా జ్ఞాపిక నమ్మదగినది,+ అది అనుభవం లేనివాళ్లను తెలివిగలవాళ్లుగా చేస్తుంది.+
8 యెహోవా ఆదేశాలు న్యాయమైనవి, అవి హృదయాన్ని సంతోషపరుస్తాయి;+యెహోవా ఆజ్ఞ స్వచ్ఛమైనది, అది కంటికి వెలుగునిస్తుంది.+
9 యెహోవా గురించిన భయం+ పవిత్రమైనది, అది ఎప్పటికీ నిలిచివుంటుంది.
యెహోవా తీర్పులు సత్యమైనవి, అవి పూర్తిగా నీతిగలవి.+
10 అవి బంగారం కన్నా,విస్తారమైన మేలిమి* బంగారం కన్నా కోరదగినవి,+తేనె కన్నా, జుంటి తేనె ధారల కన్నా మధురమైనవి.+
11 వాటి ద్వారా నీ సేవకుడు హెచ్చరిక పొందాడు;+వాటిని పాటించడం వల్ల గొప్ప ప్రతిఫలం కలుగుతుంది.+
12 తమ తప్పుల్ని గుర్తించగలిగేవాళ్లు ఎవరు?+
నేను తెలియక చేసిన పాపాల విషయంలో నన్ను నిర్దోషిగా ప్రకటించు.
13 అహంకారంతో పనులు చేయకుండా నీ సేవకుణ్ణి ఆపు;+అవి నా మీద పైచేయి సాధించనివ్వకు.
అప్పుడు నేను నిందలేకుండా ఉంటాను,+ఘోరమైన పాపాల* విషయంలో నిర్దోషిగా ఉంటాను.
14 యెహోవా, నా ఆశ్రయదుర్గమా,*+ నా విమోచకుడా,+నా నోటి మాటలు, నా హృదయ ధ్యానం నీకు సంతోషం కలిగించేలా ఉండాలి.+
అధస్సూచీలు
^ లేదా “విశాలం; పైనున్న ఆకాశం.”
^ లేదా “కొలనూలు” అయ్యుంటుంది.
^ లేదా “పండే భూమి.”
^ లేదా “తిరిగి బలాన్నిస్తుంది; ప్రాణం తిరిగొచ్చేలా చేస్తుంది.”
^ లేదా “శుద్ధి చేయబడిన.”
^ లేదా “ఎన్నో అపరాధాల.”
^ అక్ష., “బండరాయీ.”
