దానియేలు 8:1-27
8 బెల్షస్సరు రాజు+ పరిపాలన మూడో సంవత్సరంలో, దానియేలు అనే నేను ఇంకో దర్శనం చూశాను.
2 దర్శనం చూస్తున్నప్పుడు, నేను ఏలాము+ సంస్థానంలోని షూషను*+ కోటలో* ఉన్నాను; ఆ దర్శనంలో నేను ఊలయి కాలువ పక్కన ఉండడం చూశాను.
3 నేను తలెత్తి చూసినప్పుడు, ఇదిగో! ఒక పొట్టేలు+ ఆ కాలువ ఎదుట నిలబడివుంది, దానికి రెండు కొమ్ములు ఉన్నాయి.+ ఆ రెండు కొమ్ములు పొడుగ్గా ఉన్నాయి కానీ ఒక కొమ్ము మరో కొమ్ము కన్నా పొడుగ్గా ఉంది, పొడవైన కొమ్ము ఆ తర్వాత వచ్చింది.+
4 ఆ పొట్టేలు పడమటి వైపుకు, ఉత్తరం వైపుకు, దక్షిణం వైపుకు పొడుస్తూ ఉండడం నేను చూశాను; దాని ముందు ఏ క్రూరమృగం కూడా నిలబడలేకపోయింది, దాని నుండి వాటిని రక్షించేవాళ్లెవ్వరూ లేరు.+ అది తనకు ఇష్టమొచ్చినట్టు చేస్తూ, తనను తాను హెచ్చించుకుంది.
5 నేను చూస్తుండగా, ఇదిగో! ఒక మేకపోతు+ పడమటి వైపు* నుండి వస్తూ ఉంది, అది నేల మీద కాలు మోపకుండా భూమంతా ప్రయాణిస్తూ ఉంది. ఆ మేకపోతు కళ్ల మధ్య స్పష్టంగా కనిపించే ఒక కొమ్ము ఉంది.+
6 అది రెండు కొమ్ములుగల పొట్టేలు వైపు, అంటే కాలువ ఎదుట నిలబడివున్నట్టు నేను చూసిన పొట్టేలు వైపు వస్తూ ఉంది. అది విపరీతమైన కోపంతో దానివైపుకు పరుగెత్తుతూ ఉంది.
7 మేకపోతు పొట్టేలు దగ్గరికి రావడం నేను చూశాను, అది చాలా కోపంతో పొట్టేలు మీద దాడిచేసి దాని రెండు కొమ్ముల్ని విరగ్గొట్టింది; పొట్టేలు దాన్ని ఎదిరించలేకపోయింది. ఆ మేకపోతు పొట్టేలును నేలమీద పడేసి తొక్కేసింది, దాని నుండి పొట్టేలును రక్షించేవాళ్లెవ్వరూ లేరు.
8 అప్పుడు ఆ మేకపోతు తనను తాను చాలా ఎక్కువగా హెచ్చించుకుంది, అయితే దానికి ఎక్కువ బలం రాగానే దాని గొప్ప కొమ్ము విరిగిపోయింది; దాని స్థానంలో నాలుగు పెద్ద కొమ్ములు నాలుగు దిక్కులకు* పెరిగాయి.+
9 ఆ కొమ్ముల్లో ఒకదాని నుండి ఒక చిన్న కొమ్ము వచ్చింది; అది దక్షిణం వైపు, తూర్పు వైపు,* సుందరమైన దేశం*+ వైపు చాలా ఎక్కువగా పెరిగింది.
10 ఎంతగా పెరిగిందంటే, అది ఆకాశ సైన్యం వరకు చేరుకుంది; అది ఆ సైన్యంలో కొన్నిటిని, నక్షత్రాల్లో కొన్నిటిని భూమ్మీద పడిపోయేలా చేసి, వాటిని తొక్కేసింది.
11 అది చివరికి సైన్యాధిపతికి వ్యతిరేకంగా తనను తాను హెచ్చించుకుంది; ఆయన దగ్గర నుండి రోజువారీ బలులు తీసేయబడ్డాయి, అలాగే ఆయన స్థిరపర్చిన పవిత్రమైన స్థలం పడగొట్టబడింది.+
12 అపరాధం కారణంగా సైన్యం అలాగే రోజువారీ బలులు ఆ కొమ్ముకు అప్పగించబడ్డాయి. ఆ కొమ్ము సత్యాన్ని భూమ్మీదికి పడేస్తూ ఉంది, అది తనకు ఇష్టమొచ్చినట్టు చేస్తూ విజయం సాధించింది.
13 తర్వాత ఒక పవిత్రుడు మాట్లాడడం నేను విన్నాను, అతన్ని మరో పవిత్రుడు ఇలా అడిగాడు: “రోజువారీ బలులకు, నాశనం కలిగించే అపరాధానికి సంబంధించిన ఆ దర్శనం ఎంతకాలం పాటు కొనసాగుతుంది?+ పవిత్ర స్థలం, సైన్యం రెండూ ఎంతకాలం తొక్కబడతాయి?”
14 దానికి అతను నాతో ఇలా చెప్పాడు: “2,300 సాయంకాలాలు, పగళ్ల పాటు; ఆ తర్వాత పవిత్ర స్థలం ఖచ్చితంగా మళ్లీ సరైన స్థితికి వస్తుంది.”
15 దానియేలు అనే నేను ఆ దర్శనం చూస్తూ, దాన్ని అర్థం చేసుకోవడానికి ప్రయత్నిస్తుండగా, మనిషిలా ఉన్న ఒకతను ఉన్నట్టుండి నా ముందు నిలబడ్డాడు.
16 అప్పుడు ఊలయి+ మధ్యలో నేను ఒక మనిషి స్వరాన్ని విన్నాను; అతను గట్టిగా ఇలా అన్నాడు: “గబ్రియేలూ,+ అతను చూసిన వాటి అర్థం ఏంటో అతనికి వివరించు.”+
17 కాబట్టి అతను నేను నిలబడివున్న చోటికి వచ్చాడు; అతను వచ్చినప్పుడు నేను చాలా భయపడి, సాష్టాంగపడ్డాను. అతను నాతో, “మానవ కుమారుడా, ఈ దర్శనం అంత్యకాలంలో నెరవేరుతుందని అర్థం చేసుకో” అన్నాడు.+
18 అయితే అతను మాట్లాడుతుండగా, నేను నేలమీద ముఖం పెట్టి గాఢనిద్రలోకి వెళ్లిపోయాను. అతను నన్ను ముట్టుకుని, ఆ స్థలంలోనే నన్ను నిలబెట్టాడు.+
19 తర్వాత అతను ఇలా అన్నాడు: “దేవుని ఉగ్రత కాలంలోని చివరి భాగంలో ఏం జరుగుతుందో నీకు తెలియజేస్తున్నాను, ఎందుకంటే అది నియమిత అంత్యకాలంలో జరుగుతుంది.+
20 “నువ్వు చూసిన రెండు కొమ్ములుగల ఆ పొట్టేలు మాదీయ, పారసీక* రాజుల్ని సూచిస్తుంది.+
21 బొచ్చుగల ఆ మేకపోతు గ్రీసు రాజును సూచిస్తుంది;+ దాని కళ్ల మధ్య ఉన్న గొప్ప కొమ్ము గ్రీసు మొదటి రాజును సూచిస్తుంది.+
22 ఆ కొమ్ము విరిగిపోయి, దాని స్థానంలో నాలుగు కొమ్ములు వచ్చాయి కదా;+ అదేవిధంగా అతని దేశంలో నుండి నాలుగు రాజ్యాలు లేస్తాయి, అయితే అతనికి ఉన్నలాంటి శక్తి వాటికి ఉండదు.
23 “వాళ్ల రాజ్యం చివరి రోజుల్లో, వాళ్ల అపరాధాలు సంపూర్తి అయినప్పుడు* భీకరంగా కనిపించే ఒక రాజు లేస్తాడు, అతను చిక్కు ప్రశ్నల్ని అర్థం చేసుకోగలడు.*
24 అతను ఎంతో శక్తిమంతుడు అవుతాడు, కానీ తన సొంత శక్తితో కాదు. అతను ఘోరంగా* నాశనం కలగజేస్తాడు, అతను తాను చేసే దానిలో ఖచ్చితంగా విజయం సాధిస్తాడు. అతను బలంగలవాళ్లను, అలాగే పవిత్ర ప్రజల్ని నాశనం చేస్తాడు.+
25 అతను చాలామందిని మోసం చేయడంలో తప్పకుండా విజయం సాధిస్తాడు; అతను తన హృదయంలో తనను తాను హెచ్చించుకుంటాడు; సురక్షితంగా ఉన్న సమయంలో* అతను చాలామందిని నాశనం చేస్తాడు. చివరికి అతను అధిపతుల అధిపతికి వ్యతిరేకంగా నిలబడతాడు, కానీ మనిషి ప్రమేయం* లేకుండానే అతను విరగ్గొట్టబడతాడు.
26 “సాయంకాలాల గురించి, పగళ్ల గురించి దర్శనంలో చెప్పబడిన మాటలు సత్యం; కానీ నువ్వు ఆ దర్శనాన్ని రహస్యంగా ఉంచాలి, ఎందుకంటే అది సుదూర భవిష్యత్తుకు సంబంధించినది.”+
27 దానియేలునైన నేను బాగా అలసిపోయాను, చాలా రోజులపాటు అనారోగ్యంగా ఉన్నాను.+ తర్వాత నేను లేచి రాజు సేవలో కొనసాగాను;+ అయితే నేను చూసిన దాన్నిబట్టి చాలా ఆశ్చర్యపోయాను, ఆ దర్శనాన్ని అర్థం చేసుకునే వాళ్లెవ్వరూ లేరు.+
అధస్సూచీలు
^ లేదా “సూస.”
^ లేదా “రాజభవనంలో; దుర్గంలో.”
^ లేదా “సూర్యాస్తమయం వైపు.”
^ అక్ష., “ఆకాశపు నాలుగు గాలుల వైపుకు.”
^ లేదా “సూర్యోదయం వైపు.”
^ లేదా “ఆభరణం.”
^ లేదా “పర్షియా.”
^ లేదా “హద్దుకు చేరుకున్నప్పుడు.”
^ లేదా “పన్నాగాలు పన్నడంలో నైపుణ్యం గలవాడు.”
^ లేదా “అసాధారణ రీతిలో.”
^ లేదా “హెచ్చరిక చేయకుండా” అయ్యుంటుంది.
^ అక్ష., “చెయ్యి.”
