ద్వితీయోపదేశకాండం 32:1-52
32 “ఆకాశమా, విను, నేను మాట్లాడతాను;భూమీ, నా నోటి మాటలు విను.
2 నా ఉపదేశం వానలా కురుస్తుంది;నా మాటలు మంచు బిందువుల్లా,గడ్డిమీద కురిసే జల్లులా,పచ్చిక మీద పడే వర్షంలా ఉంటాయి.
3 నేను యెహోవా పేరును ప్రకటిస్తాను.+
మన దేవుని గొప్పతనం గురించి చెప్తాను!+
4 ఆయన ఆశ్రయదుర్గం,* ఆయన కార్యం పరిపూర్ణం,+ఆయన మార్గాలన్నీ న్యాయమైనవి.+
ఆయన నమ్మకమైన దేవుడు,+ ఆయన ఎన్నడూ అన్యాయం చేయడు;+ఆయన నీతిమంతుడు, నిజాయితీపరుడు.+
5 కానీ వాళ్లే చెడుగా ప్రవర్తించారు.+
వాళ్లు ఆయన పిల్లలు కాదు, తప్పు వాళ్లదే.+
వాళ్లు కుటిలమైన, వక్రమైన తరం!+
6 మూర్ఖులారా, తెలివితక్కువ ప్రజలారా,మీరు యెహోవాతో వ్యవహరించాల్సిన పద్ధతి ఇదేనా?+
ఆయన మిమ్మల్ని ఉనికిలోకి తీసుకొచ్చిన మీ తండ్రి కాదా?+మిమ్మల్ని సృష్టించి, దృఢంగా స్థాపించింది ఆయన కాదా?
7 పాత రోజుల్ని గుర్తుచేసుకోండి;గడిచిన తరాల సంవత్సరాల గురించి ఆలోచించండి.
మీ నాన్నను అడగండి, అతను మీకు చెప్తాడు;+మీ పెద్దల్ని అడగండి, వాళ్లు మీకు తెలియజేస్తారు.
8 సర్వోన్నతుడు జనాలకు స్వాస్థ్యాన్ని ఇచ్చినప్పుడు,+ఆదాము కుమారుల్ని* ఒకరి నుండి ఒకర్ని వేరుచేసినప్పుడు,+ఇశ్రాయేలీయుల సంఖ్యను బట్టిఆయన జనాల సరిహద్దును నిర్ణయించాడు.+
9 ఎందుకంటే యెహోవా ప్రజలే ఆయన భాగం;+యాకోబు ఆయన ఆస్తి.+
10 ఆయన ఎడారి భూమిలో,+భీకర ధ్వనులు వినిపించే నిర్జనమైన ఎడారిలో+ అతన్ని కనుగొన్నాడు,
అతనికి రక్షణ వలయంగా ఉంటూ, అతని బాగోగులు చూసుకున్నాడు,+తన కనుపాపలా కాపాడాడు.+
11 గద్ద తన గూడును కుదిపి,తన పిల్లలకు పైన ఎగురుతూ,రెక్కలు చాచి, వాటిని తీసుకొని,తన రెక్కల మీద మోసినట్టు,+
12 యెహోవా ఒక్కడే అతన్ని* నడిపిస్తూ వచ్చాడు;+వేరే ఏ దేవుడూ అతనితో లేడు.+
13 ఆయన అతన్ని భూమ్మీది ఎత్తైన స్థలాల్ని జయించేలా చేశాడు,+దానివల్ల అతను పొలం పంటను తిన్నాడు.
ఆయన అతన్ని బండ నుండి వచ్చిన తేనెతో పోషించాడు,చెకుముకి రాయి నుండి వచ్చిన నూనెతో,
14 పశువుల వెన్నతో, మంద పాలతో,అతి శ్రేష్ఠమైన గొర్రెలతో,బాషాను పొట్టేళ్లతో, మేకపోతులతో,శ్రేష్ఠమైన గోధుమలతో అతన్ని పోషించాడు;+అతను ద్రాక్షారసం తాగాడు.
15 యెషూరూను* లావైనప్పుడు, ఎదురుతిరిగి కాలు జాడించాడు.
అతను కొవ్వుపట్టి, బలిసి, మందంగా తయారయ్యాడు.+
తనను పుట్టించిన దేవుణ్ణి వదిలేశాడు,+తనను రక్షించే ఆశ్రయదుర్గాన్ని* తృణీకరించాడు.
16 వాళ్లు వేరే దేవుళ్లను పూజించి ఆయనకు రోషం పుట్టించారు,+అసహ్యమైన పనులు చేస్తూ ఆయనకు కోపం తెప్పించారు.+
17 వాళ్లు దేవునికి కాదు, చెడ్డదూతలకు* బలులు అర్పించారు,+వాళ్లకు అప్పటివరకు తెలియని దేవుళ్లకు,ఈమధ్యే పుట్టుకొచ్చిన కొత్త దేవుళ్లకు,వాళ్ల పూర్వీకులకు తెలియని దేవుళ్లకు బలులు అర్పిస్తూ వచ్చారు.
18 వాళ్లు తమ తండ్రిని, తమ ఆశ్రయదుర్గాన్ని* మర్చిపోయారు,+తమను కన్న దేవుణ్ణి గుర్తుంచుకోలేదు.+
19 అది చూసినప్పుడు యెహోవా వాళ్లను తిరస్కరించాడు,+ఎందుకంటే తన కుమారులు, కూతుళ్లు ఆయనకు కోపం తెప్పించారు.
20 కాబట్టి ఆయన ఇలా అన్నాడు: ‘నేను వాళ్లకు కనిపించకుండా నా ముఖాన్ని దాచుకుంటాను;+వాళ్ల సంగతి ఏమౌతుందో చూస్తాను.
ఎందుకంటే వాళ్లు భ్రష్ట తరం,+వాళ్లు నమ్మకత్వమే లేని పిల్లలు.+
21 వాళ్లు దేవుడుకాని దాన్ని పూజించి నాకు రోషం పుట్టించారు;+వాళ్ల వ్యర్థమైన విగ్రహాలతో నాకు కోపం తెప్పించారు.+
కాబట్టి నేను కూడా జనంకాని దాన్ని ఉపయోగించి వాళ్లకు రోషం పుట్టిస్తాను;+మూర్ఖమైన జనంతో వాళ్లకు కోపం తెప్పిస్తాను.+
22 ఎందుకంటే, నా కోపం అగ్ని రాజేసింది,+అది సమాధి* లోతుల వరకు మండుతుంది,+భూమిని, దాని పంటను దహించేస్తుంది,పర్వతాల పునాదుల్ని రగిలిస్తుంది.
23 నేను వాళ్లమీదికి ఇంకా ఎక్కువ విపత్తులు రప్పిస్తాను;నా బాణాలన్నీ వాళ్లమీద ప్రయోగిస్తాను.
24 వాళ్లు ఆకలితో క్షీణించిపోతారు,+కాలిపోయే జ్వరం, భయంకరమైన నాశనం వాళ్లను మింగేస్తాయి.+
నేను వాళ్ల మీదికి మృగాల కోరల్ని,+మట్టిలో తిరిగే పాముల* విషాన్ని పంపిస్తాను.
25 బయటేమో ఖడ్గం వాళ్లను చంపుతుంది;+లోపలేమో భయం వాళ్లను చుట్టుముడుతుంది,+యువకులు, కన్యలు,పసిపిల్లలు, తలనెరసిన వాళ్లు, అందరి పరిస్థితి అలాగే ఉంటుంది.+
26 నేను ఇలా అని ఉండేవాణ్ణే: “నేను వాళ్లను చెదరగొడతాను;మనుషుల మధ్య వాళ్ల జ్ఞాపకమనేదే లేకుండా చేస్తాను,”
27 అయితే శత్రువులు దాన్ని తప్పుగా అర్థంచేసుకొని,+“మా సొంత శక్తితోనే గెలిచాం; ఇదంతా చేసింది యెహోవా కాదు”
అని అనుకుంటారేమోనని+శత్రువుల స్పందన గురించి ఆలోచించి* ఆగాను.+
28 వాళ్లు తెలివిలేని* జనం,వాళ్లకు అవగాహనే లేదు.
29 వాళ్లకే గనుక తెలివి ఉంటే ఎంత బాగుండేది!+ అప్పుడు వాళ్లు దీని గురించి ధ్యానించేవాళ్లు.+
తమకు ఏమౌతుందో ఆలోచించేవాళ్లు.+
30 ఒక్క వ్యక్తి 1,000 మందిని ఎలా తరమగలడు?ఇద్దరు వ్యక్తులు 10,000 మందిని ఎలా పారిపోయేట్టు చేయగలరు?+
వాళ్ల ఆశ్రయదుర్గం* వాళ్లను అమ్మేయడం వల్లే,+యెహోవా వాళ్లను అప్పగించడం వల్లే అది సాధ్యమైంది.
31 ఎందుకంటే వాళ్ల ఆశ్రయదుర్గం* మన ఆశ్రయదుర్గం* లాంటిది కాదు,+ఈ విషయం మన శత్రువులకు కూడా అర్థమైంది.+
32 వాళ్ల ద్రాక్షతీగ సొదొమ నుండి,గొమొర్రా పొలాల నుండి వచ్చింది.+
వాళ్ల ద్రాక్షపండ్లు విషపూరితమైనవి,వాళ్ల ద్రాక్షగుత్తులు చేదైనవి.+
33 వాళ్ల ద్రాక్షారసం పాముల విషం,అది తాచుపాముల క్రూర విషం.
34 నేను వాళ్ల పనులన్నిటికీ ముద్రవేసి,వాటిని నా గోదాములో భద్రంచేశాను.+
35 పగతీర్చుకోవడం, ప్రతిఫలం ఇవ్వడం నా పని,+నియమిత సమయంలో వాళ్ల కాలు జారినప్పుడు+ నేను చర్య తీసుకుంటాను,వాళ్లమీదికి విపత్తు వచ్చే రోజు దగ్గరపడింది,వాళ్లమీదికి రావాల్సింది చాలా త్వరగా వస్తుంది.’
36 యెహోవా తన ప్రజలకు న్యాయం తీరుస్తాడు,+తన సేవకుల బలం క్షీణించిపోవడం,నిస్సహాయులు, బలహీనులు మాత్రమే మిగిలివుండడం చూసి,ఆయన వాళ్లమీద జాలిపడతాడు.*+
37 అప్పుడు ఆయన ఇలా అంటాడు: ‘వాళ్ల దేవుళ్లు ఎక్కడ?+వాళ్లు నమ్ముకున్న ఆశ్రయదుర్గం* ఎక్కడ?
38 ఆ దేవుళ్లు వాళ్ల బలుల కొవ్వును* తినేవాళ్లు,వాళ్ల పానీయార్పణల ద్రాక్షారసం తాగేవాళ్లు.+
ఆ దేవుళ్లనే లేచివచ్చి మీకు సహాయం చేయనివ్వండి.
వాళ్లనే మీ ఆశ్రయ స్థలం కానివ్వండి.
39 ఇదిగో నేను, నేనే దేవుణ్ణి+ అని తెలుసుకోండి,నేను తప్ప వేరే ఏ దేవుడూ లేడు.+
చంపేవాణ్ణి నేనే, బ్రతికించేవాణ్ణి నేనే.+
గాయపర్చేవాణ్ణి నేనే,+ బాగుచేసేవాణ్ణి నేనే,+నా చేతిలో నుండి విడిపించేవాళ్లు ఎవ్వరూ లేరు.+
40 ఎందుకంటే నేను ఆకాశం వైపు నా చెయ్యి ఎత్తి,“అంతంలేని నా జీవంతోడు” అని ప్రమాణం చేస్తాను.+
41 నేను మెరిసే నా ఖడ్గాన్ని సానబెట్టినప్పుడు,తీర్పుతీర్చడానికి నా చేతిని సిద్ధం చేసినప్పుడు,+నేను నా శత్రువుల మీద పగతీర్చుకుంటాను,+నన్ను ద్వేషించేవాళ్లకు ప్రతిఫలం ఇస్తాను.
42 నేను హతుల రక్తంతో, బందీల రక్తంతోనా బాణాలను మత్తిల్లజేస్తాను,నా ఖడ్గం మాంసం తింటుంది,అది నా శత్రువుల నాయకుల తలల్ని తింటుంది.’
43 దేశాల్లారా, ఆయన ప్రజలతో సంతోషించండి,+తన సేవకుల రక్తం విషయంలో ఆయన ప్రతీకారం తీర్చుకుంటాడు,+ఆయన తన శత్రువుల మీద పగ తీర్చుకుంటాడు,+తన ప్రజల దేశానికి ప్రాయశ్చిత్తం చేస్తాడు.”*
44 అలా మోషే, నూను కుమారుడైన హోషేయ*+ వచ్చి ప్రజలు వింటుండగా ఈ పాటలోని మాటలన్నిటినీ చెప్పారు.+
45 మోషే ఇశ్రాయేలీయులందరితో ఈ మాటలన్నీ చెప్పడం పూర్తయ్యాక,
46 అతను వాళ్లతో ఇలా అన్నాడు: “ఈ ధర్మశాస్త్రంలోని మాటలన్నిటినీ జాగ్రత్తగా పాటించమని మీరు మీ కుమారులకు ఆజ్ఞాపించేలా,+ నేడు నేను మిమ్మల్ని హెచ్చరిస్తూ చెప్తున్న ఈ మాటలన్నిటినీ మీ మనసులో ఉంచుకోండి.+
47 ఎందుకంటే ఇది మీకు వట్టి మాట కాదు, ఇది మీకు జీవం;+ ఈ మాటను పాటించడం వల్ల మీరు యొర్దాను నది దాటి స్వాధీనం చేసుకోబోయే దేశంలో చాలాకాలం జీవిస్తారు.”
48 అదే రోజున యెహోవా మోషేతో మాట్లాడి ఇలా అన్నాడు:
49 “నువ్వు మోయాబు దేశంలో యెరికో ఎదురుగా ఉన్న అబారీము కొండ మీదికి+ అంటే నెబో కొండ మీదికి వెళ్లి,+ నేను ఇశ్రాయేలీయులకు స్వాస్థ్యంగా ఇవ్వబోతున్న కనాను దేశాన్ని+ చూడు.
50 తర్వాత, నీ అన్న అహరోను హోరు కొండమీద చనిపోయి+ తన ప్రజల దగ్గరికి చేర్చబడినట్టే,* నువ్వు కూడా అక్కడ, అంటే నువ్వు ఎక్కబోతున్న ఆ కొండమీద చనిపోయి, నీ ప్రజల దగ్గరికి చేర్చబడతావు.
51 ఎందుకంటే మీరిద్దరూ సీను ఎడారిలో కాదేషుకు చెందిన మెరీబా నీళ్ల దగ్గర ఇశ్రాయేలీయుల మధ్య నాకు నమ్మకంగా ఉండలేదు,+ ఇశ్రాయేలు ప్రజల ముందు నన్ను పవిత్రపర్చలేదు.+
52 నేను ఇశ్రాయేలీయులకు ఇస్తున్న దేశాన్ని నువ్వు దూరం నుండి చూస్తావు, కానీ నువ్వు అందులో అడుగుపెట్టవు.”+
అధస్సూచీలు
^ అక్ష., “బండరాయి.”
^ లేదా “మానవజాతిని” అయ్యుంటుంది.
^ అంటే, యాకోబును.
^ “నిజాయితీపరుడు” అని అర్థం. ఇది ఇశ్రాయేలుకు ఉపయోగించిన గౌరవపూర్వక బిరుదు.
^ అక్ష., “బండరాయిని.”
^ అక్ష., “బండరాయిని.”
^ లేదా “సరీసృపాల.”
^ అక్ష., “భయపడి.”
^ లేదా “సలహాను పట్టించుకోని” అయ్యుంటుంది.
^ అక్ష., “బండరాయి.”
^ అక్ష., “బండరాయి.”
^ అక్ష., “బండరాయి.”
^ లేదా “విచారపడతాడు.”
^ అక్ష., “బండరాయి.”
^ లేదా “అతి శ్రేష్ఠమైన బలుల్ని.”
^ లేదా “దేశాన్ని శుద్ధి చేస్తాడు.”
^ ఇది యెహోషువ అసలు పేరు. హోషేయ అనేది హోషాయా అనే పేరుకు సంక్షిప్త రూపం. దీనికి, “‘యా’ చేత రక్షించబడినవాడు; ‘యా’ రక్షించాడు” అని అర్థం. “యా” అనేది యెహోవా పేరుకు సంక్షిప్త రూపం.
^ మరణాన్ని కావ్యరూపంలో ఇలా వర్ణించారు.
