ద్వితీయోపదేశకాండం 33:1-29
33 సత్యదేవుని సేవకుడైన మోషే తాను చనిపోవడానికి ముందు ఇశ్రాయేలీయుల్ని దీవిస్తూ మాట్లాడిన మాటలు.+
2 అతను ఇలా అన్నాడు:
“యెహోవా సీనాయి పర్వతం మీద నుండి వచ్చాడు,+శేయీరు నుండి వాళ్లమీద ప్రకాశించాడు,
పారాను పర్వత ప్రాంతం నుండి మహిమతో ప్రకాశించాడు,+లక్షలాది పవిత్ర దూతలు ఆయనతో పాటు ఉన్నారు,+ఆయన కుడిపక్కన ఆయన యోధులు ఉన్నారు.+
3 ఆయనకు తన ప్రజల మీద ఆప్యాయత ఉంది,+వాళ్ల పవిత్రులందరూ నీ చేతిలో ఉన్నారు.+
వాళ్లు నీ పాదాల దగ్గర కూర్చున్నారు,+నీ మాటలు వినడం మొదలుపెట్టారు.+
4 (మోషే మాకు ఒక ధర్మశాస్త్రాన్ని ఇచ్చాడు,+అది యాకోబు సమాజపు సొత్తు.)+
5 ఇశ్రాయేలు గోత్రాలన్నిటితో పాటు+
ప్రజల పెద్దలు సమావేశమైనప్పుడు,
ఆయన యెషూరూనులో*+ రాజయ్యాడు.
6 రూబేను అంతరించిపోకుండా జీవించే ఉండాలి,+
అతని మనుషుల సంఖ్య తగ్గకూడదు.”+
7 అతను యూదాను ఇలా దీవించాడు:+
“యెహోవా, యూదా మొరను ఆలకించు,+
నువ్వు అతన్ని తన ప్రజల దగ్గరికి తిరిగి తీసుకురావాలి.
అతని బాహువులు అతనికి చెందిన వాటికోసం పోరాడాయి,
తన శత్రువులతో పోరాడడానికి నువ్వు అతనికి సహాయం చేయాలి.”+
8 లేవి గురించి అతను ఇలా అన్నాడు:+
“నీ* తుమ్మీము, ఊరీము+ నీకు విశ్వసనీయంగా ఉన్న వ్యక్తికి+ చెందుతాయి,
మస్సా దగ్గర నువ్వు అతన్ని పరీక్షించావు,+
మెరీబా నీళ్ల దగ్గర అతనితో పోరాడడం మొదలుపెట్టావు,+
9 అతను తన తల్లిదండ్రుల గురించి, ‘నేను వాళ్లను పట్టించుకోలేదు’ అని అన్నాడు.
అతను తన సహోదరుల్ని కూడా లెక్కచేయలేదు,+
తన సొంత కుమారుల్ని లక్ష్యపెట్టలేదు.
అతను నీ మాటకు కట్టుబడి ఉన్నాడు,
నీ ఒప్పందాన్ని పాటించాడు.+
10 అతను నీ న్యాయనిర్ణయాల్ని యాకోబుకు నేర్పించాలి,+
నీ ధర్మశాస్త్రాన్ని ఇశ్రాయేలుకు బోధించాలి.+
నువ్వు ఇష్టపడే సువాసన వచ్చేలా అతను నీకు ధూపం వేయాలి,+
నీ బలిపీఠం మీద పూర్తి అర్పణను అర్పించాలి.+
11 యెహోవా, అతని బలాన్ని దీవించు,
అతని చేతుల పనిని స్వీకరించు,
అతన్ని ద్వేషించేవాళ్లు ఇక అతని మీదికి లేవకుండా,
వాళ్ల కాళ్లను* విరగ్గొట్టు.”
12 బెన్యామీను గురించి అతను ఇలా అన్నాడు:+
“యెహోవాకు ప్రియమైన వ్యక్తి ఆయన దగ్గర సురక్షితంగా ఉండాలి;
రోజంతా ఆయన అతనికి ఆశ్రయమౌతాడు,
ఆయన భుజాల మధ్య అతను నివసిస్తాడు.”
13 యోసేపు గురించి అతను ఇలా అన్నాడు:+
“యెహోవా అతని భూమిని దీవించాలి;+
ఆకాశం నుండి వచ్చే శ్రేష్ఠమైన వాటితో,
మంచుతో, అగాధ జలాలతో,+
14 సూర్యుని వల్ల పెరిగే శ్రేష్ఠమైన వాటితో,
నెలనెలా పండే శ్రేష్ఠమైన పంటతో,+
15 పురాతన కాల పర్వతాల* నుండి వచ్చే అతిశ్రేష్ఠమైన వాటితో,+
ఎల్లకాలం నిలిచే పర్వతాల నుండి వచ్చే శ్రేష్ఠమైన వాటితో,
16 భూమి నుండి వచ్చే శ్రేష్ఠమైన వాటితో, అందులో పండే ప్రతీదానితో,+
ముళ్లపొదలో నివసించే దేవుని+ ఆమోదంతో అతను దీవించబడాలి.
అవన్నీ యోసేపు తలమీదికి,
తన సహోదరుల నుండి వేరుచేయబడిన వ్యక్తి నడినెత్తి మీదికి రావాలి.+
17 అతని వైభవం మొదట పుట్టిన ఎద్దు వైభవం లాంటిది,
అతని కొమ్ములు అడవి ఎద్దు కొమ్ములు.
వాటితో అతను జనాల్ని నెట్టేస్తాడు,*
వాటన్నిటినీ భూమి సరిహద్దుల వరకు నెట్టేస్తాడు.
ఎఫ్రాయిము సైన్యంలోని లక్షలమంది పురుషులు,+
మనష్షే సైన్యంలోని వేలమంది పురుషులే ఆ కొమ్ములు.”
18 జెబూలూను గురించి అతను ఇలా అన్నాడు:+
“జెబూలూనూ, నువ్వు బయటికి వెళ్లేటప్పుడు సంతోషించు,
ఇశ్శాఖారూ, నువ్వు నీ డేరాల్లో సంతోషించు.+
19 వాళ్లు జనాల్ని పర్వతం దగ్గరికి పిలుస్తారు.
వాళ్లు అక్కడ నీతి బలులు అర్పిస్తారు.
వాళ్లు సముద్రంలోని విస్తారమైన సంపదలతో,
ఇసుకలోని గుప్తనిధులతో* పోషించబడతారు.”
20 గాదు గురించి అతను ఇలా అన్నాడు:+
“గాదు సరిహద్దుల్ని విస్తరించేవాడు దీవించబడతాడు.+
అతను అక్కడ సింహంలా పడుకొని ఉంటాడు,
బాహువును, నడినెత్తిని చీల్చేయడానికి సిద్ధంగా ఉంటాడు.
21 అతను తన కోసం మొదటి భాగాన్ని ఎంచుకుంటాడు,+
ఎందుకంటే శాసనాల్ని ఇచ్చే వ్యక్తి కేటాయించిన భాగం అక్కడే ఉంది.+
ప్రజల పెద్దలు ఒకచోట సమావేశమౌతారు.
అతను యెహోవా నీతిని అమలు చేస్తాడు,
ఇశ్రాయేలు విషయంలో ఆయన న్యాయనిర్ణయాల్ని అమలు చేస్తాడు.”
22 దాను గురించి అతను ఇలా అన్నాడు:+
“దాను సింహం పిల్ల.+
అతను బాషాను నుండి దూకి వస్తాడు.”+
23 నఫ్తాలి గురించి అతను ఇలా అన్నాడు:+
“నఫ్తాలి యెహోవా ఆమోదంతో సంతృప్తిగా ఉన్నాడు,
దేవుని దీవెనలతో నిండిపోయాడు.
నువ్వు పడమటి ప్రాంతాన్ని, దక్షిణ ప్రాంతాన్ని స్వాధీనం చేసుకో.”
24 ఆషేరు గురించి అతను ఇలా అన్నాడు:+
“అతను కుమారులతో దీవించబడ్డాడు.
అతను తన సహోదరుల అనుగ్రహం పొందాలి,
తన పాదాన్ని తైలంలో ముంచాలి.
25 నీ ద్వారపు గడియలు ఇనుపవి, రాగివి;+
నువ్వు జీవించినన్ని రోజులు సురక్షితంగా ఉంటావు.*
26 యెషూరూను+ సేవించే సత్యదేవుని లాంటివాళ్లు ఎవ్వరూ లేరు.+ఆయన నీకు సహాయం చేయడానికి ఆకాశం గుండా స్వారీ చేస్తూ వస్తాడు,తన తేజస్సుతో మేఘాల మీద స్వారీ చేస్తూ వస్తాడు.+
27 పురాతన కాలాల నుండి దేవుడు ఆశ్రయంగా ఉన్నాడు,+ఆయన శాశ్వత బాహువులు నీ కింద ఉన్నాయి.+
శత్రువుల్ని ఆయన నీ ముందు నుండి వెళ్లగొడతాడు,+‘వాళ్లను సమూలంగా నాశనం చేయి!’ అంటాడు.+
28 ఇశ్రాయేలు సురక్షితంగా నివసిస్తాడు,యాకోబు ఊట ప్రత్యేకించబడుతుంది.ధాన్యం, కొత్త ద్రాక్షారసం ఉండే దేశంలో,+ఆకాశం నుండి మంచు బిందువులు కురిసే దేశంలో అతను ఉంటాడు.+
29 ఇశ్రాయేలూ, నువ్వు సంతోషంగా ఉంటావు!+
నీలాంటి వాళ్లు ఎవరున్నారు?+నువ్వు యెహోవా రక్షణను ఆస్వాదిస్తున్న జనానివి,+ఆయన నీకు రక్షణ కవచంలా ఉన్నాడు,+నీ మహిమాన్విత ఖడ్గంలా ఉన్నాడు.
నీ శత్రువులు వణుకుతూ నీ ముందుకు వస్తారు,+నువ్వు వాళ్ల వీపుల* మీద నడుస్తావు.”
అధస్సూచీలు
^ “నిజాయితీపరుడు” అని అర్థం. ఇది ఇశ్రాయేలుకు ఉపయోగించిన గౌరవపూర్వక బిరుదు.
^ ఈ వచనంలో “నీ, నీకు, నువ్వు” అనే పదాలు దేవుణ్ణి సూచిస్తున్నాయి.
^ లేదా “తుంట్లను.”
^ లేదా “తూర్పు పర్వతాల” అయ్యుంటుంది.
^ లేదా “కుమ్ముతాడు.”
^ లేదా “కూడబెట్టిన సంపదలతో.”
^ అక్ష., “నీ బలం నీ రోజుల్లాగే ఉంటుంది.”
^ లేదా “ఎత్తైన స్థలాల” అయ్యుంటుంది.
