న్యాయాధిపతులు 2:1-23
2 తర్వాత యెహోవా దూత+ గిల్గాలు+ నుండి బోకీముకు వచ్చి ఇలా అన్నాడు: “నేను మిమ్మల్ని ఐగుప్తులో* నుండి మీ పూర్వీకులకు వాగ్దానం చేసిన దేశంలోకి తీసుకొచ్చాను.+ అంతేకాదు నేను ఇలా అన్నాను, ‘నేను మీతో చేసిన ఒప్పందాన్ని* ఎప్పుడూ మీరను.+
2 అయితే మీరు ఈ దేశ ప్రజలతో ఒప్పందం చేసుకోకూడదు,+ మీరు వాళ్ల బలిపీఠాల్ని కూలగొట్టాలి.’+ కానీ మీరు నా మాట వినలేదు.+ మీరెందుకు అలా చేశారు?
3 అందుకే, ‘నేను వాళ్లను మీ ఎదుట నుండి వెళ్లగొట్టను;+ వాళ్లు మిమ్మల్ని ఉచ్చులో పడేస్తారు,+ వాళ్ల దేవుళ్లు మిమ్మల్ని ప్రలోభపెట్టి నా నుండి దూరంగా లాక్కెళ్తారు’+ అని కూడా చెప్పాను.”
4 యెహోవా దూత ఇశ్రాయేలీయులందరితో ఈ మాటలు అన్నప్పుడు ప్రజలు బిగ్గరగా ఏడ్వడం మొదలుపెట్టారు.
5 కాబట్టి వాళ్లు ఆ చోటికి బోకీము* అని పేరు పెట్టారు, వాళ్లు అక్కడ యెహోవాకు బలులు అర్పించారు.
6 యెహోషువ ప్రజల్ని పంపించేసినప్పుడు, ఇశ్రాయేలీయుల్లో ప్రతీ ఒక్కరు ఆ దేశాన్ని స్వాధీనం చేసుకోవడానికి తమ స్వాస్థ్యానికి వెళ్లారు.
7 యెహోషువ బ్రతికున్నంత కాలం, అలాగే యెహోవా ఇశ్రాయేలీయుల కోసం చేసిన గొప్ప పనులన్నీ చూసి, యెహోషువ కన్నా ఎక్కువకాలం జీవించిన పెద్దలు బ్రతికున్నంత కాలం ప్రజలు యెహోవాను సేవిస్తూ వచ్చారు.+
8 ఆ తర్వాత, నూను కుమారుడూ యెహోవా సేవకుడూ అయిన యెహోషువ 110 ఏళ్ల వయసులో చనిపోయాడు.+
9 అతన్ని తిమ్నత్హెరెసులో అతని స్వాస్థ్యంలో+ పాతిపెట్టారు. అది ఎఫ్రాయిము పర్వత ప్రాంతంలో గాయషు పర్వతానికి ఉత్తరాన ఉంది.+
10 ఆ తరం వాళ్లందరూ తమ పూర్వీకుల దగ్గరికి చేర్చబడ్డారు;* వాళ్ల తర్వాత, యెహోవా గురించి గానీ, ఆయన ఇశ్రాయేలీయుల కోసం చేసినవాటి గురించి గానీ తెలియని ఇంకో తరం పుట్టింది.
11 కాబట్టి ఇశ్రాయేలీయులు యెహోవా దృష్టిలో చెడుగా ప్రవర్తించి, బయలు దేవుళ్లను సేవించారు.*+
12 అలా వాళ్లు తమను ఐగుప్తు దేశంలో నుండి బయటికి తీసుకొచ్చిన తమ తండ్రుల దేవుడైన యెహోవాను విడిచిపెట్టారు.+ వాళ్లు వేరే దేవుళ్లను, అంటే తమ చుట్టూ ఉన్న ప్రజల దేవుళ్లను సేవించారు,+ వాళ్లు ఆ దేవుళ్లకు మొక్కి యెహోవాకు కోపం తెప్పించారు.+
13 వాళ్లు యెహోవాను విడిచిపెట్టి బయలును, అష్తారోతు విగ్రహాల్ని సేవించారు.+
14 దాంతో యెహోవా కోపం ఇశ్రాయేలీయుల మీద రగులుకుంది, ఆయన వాళ్లను దోచుకునేవాళ్లకు అప్పగించాడు;+ వాళ్లు ఇశ్రాయేలీయుల్ని దోచుకున్నారు. ఆయన ఇశ్రాయేలీయుల్ని వాళ్ల చుట్టూ ఉన్న శత్రువుల చేతికి అప్పగించాడు;*+ వాళ్లు ఇక ఏ మాత్రం తమ శత్రువుల్ని ఎదిరించలేకపోయారు.+
15 యెహోవా చెప్పినట్టు, యెహోవా వాళ్లకు ఒట్టేసినట్టు,+ వాళ్లు వెళ్లిన ప్రతీ చోట యెహోవా చెయ్యి వాళ్లకు వ్యతిరేకంగా ఉంటూ వాళ్లమీద విపత్తు తీసుకొస్తూ ఉంది.+ దాంతో వాళ్లు తీవ్రమైన కష్టాల్లో చిక్కుకున్నారు.+
16 అప్పుడు యెహోవా వాళ్ల కోసం న్యాయాధిపతుల్ని ఇచ్చేవాడు, వాళ్లు దోచుకునేవాళ్ల చేతి నుండి ప్రజల్ని రక్షించేవాళ్లు.+
17 కానీ వాళ్లు న్యాయాధిపతుల మాట కూడా వినకుండా వేరే దేవుళ్లను పూజిస్తూ,* వాటికి వంగి నమస్కారం చేస్తూ వచ్చారు. వాళ్లు తమ పూర్వీకులు నడిచిన మార్గం నుండి త్వరగా పక్కకు మళ్లారు. వాళ్ల పూర్వీకులు యెహోవా ఆజ్ఞల్ని పాటించారు కానీ వాళ్లు పాటించలేదు.
18 యెహోవా ప్రజల కోసం న్యాయాధిపతుల్ని ఇచ్చినప్పుడల్లా, యెహోవా ఆ న్యాయాధిపతికి తోడుగా ఉంటూ అతను బ్రతికున్నంత కాలం ప్రజల్ని వాళ్ల శత్రువుల చేతుల్లో నుండి రక్షించేవాడు; ఎందుకంటే తమను అణచివేస్తున్నవాళ్ల+ కారణంగా, తమతో క్రూరంగా ప్రవర్తిస్తున్నవాళ్ల కారణంగా ప్రజలు మూల్గుతుండడం చూసి యెహోవా జాలిపడ్డాడు.*+
19 కానీ ఆ న్యాయాధిపతి చనిపోయాక వాళ్లు వేరే దేవుళ్లను అనుసరిస్తూ, వాళ్లను సేవిస్తూ, వాళ్లకు మొక్కుతూ మళ్లీ తమ తండ్రుల కన్నా ఇంకా చెడ్డగా ప్రవర్తించేవాళ్లు.+ వాళ్లు తమ పద్ధతుల్ని, తమ మొండి ప్రవర్తనను మానుకోలేదు.
20 చివరికి యెహోవా కోపం ఇశ్రాయేలీయుల మీద రగులుకుంది;+ ఆయనిలా అన్నాడు: “నేను వాళ్ల పూర్వీకులతో చేసిన నా ఒప్పందాన్ని+ ఈ ప్రజలు మీరారు, వాళ్లు నాకు లోబడలేదు+ కాబట్టి,
21 యెహోషువ చనిపోయినప్పుడు మిగిలివున్న దేశాల ప్రజల్లో ఒక్కర్ని కూడా నేను వీళ్ల ఎదుట నుండి వెళ్లగొట్టను.
22 అలా, ఇశ్రాయేలీయులు తమ తండ్రుల్లా యెహోవా మార్గాన్ని పాటిస్తారో లేదో పరీక్షిస్తాను.”+
23 కాబట్టి యెహోవా ఈ దేశాల ప్రజల్ని ఉండనిచ్చాడు. ఆయన వాళ్లను త్వరగా వెళ్లగొట్టలేదు, ఆయన వాళ్లను యెహోషువ చేతికి అప్పగించలేదు.
అధస్సూచీలు
^ లేదా “ఈజిప్టులో.”
^ లేదా “నిబంధనను.”
^ “ఏడ్చేవాళ్లు” అని అర్థం.
^ మరణాన్ని కావ్యరూపంలో ఇలా వర్ణించారు.
^ లేదా “పూజించారు.”
^ అక్ష., “అమ్మేశాడు.”
^ లేదా “దేవుళ్లతో ఆధ్యాత్మిక వ్యభిచారం చేస్తూ.”
^ లేదా “విచారపడ్డాడు.”
