మలాకీ 3:1-18
3 “ఇదిగో! నేను నా సందేశకుణ్ణి పంపుతున్నాను, అతను నాకు ముందుగా మార్గాన్ని సిద్ధం చేస్తాడు.+ మీరు వెదుకుతున్న నిజమైన ప్రభువు అకస్మాత్తుగా తన ఆలయానికి వస్తాడు;+ అలాగే, మీరు ఎవరి కోసం సంతోషంగా ఎదురుచూస్తున్నారో ఆ ఒప్పంద సందేశకుడు* వస్తాడు. ఇదిగో! ఆయన తప్పకుండా వస్తాడు” అని సైన్యాలకు అధిపతైన యెహోవా చెప్తున్నాడు.
2 “కానీ ఆయన వచ్చే రోజును ఎవరు తట్టుకోగలరు? ఆయన కనిపించినప్పుడు ఎవరు నిలబడగలరు? ఆయన కంసాలివాని అగ్నిలాంటి వాడు, చాకలివాని సబ్బులాంటి వాడు.+
3 ఆయన పుటం వేసి* వెండిని శుద్ధిచేసే కంసాలిలా+ కూర్చొని, లేవి కుమారుల్ని శుద్ధీకరిస్తాడు; బంగారాన్ని, వెండిని శుద్ధిచేసినట్టు ఆయన వాళ్లను శుద్ధీకరిస్తాడు. అప్పుడు వాళ్లు యెహోవాకు నీతితో కానుకలు అర్పించే ప్రజలౌతారు.
4 అంతేకాదు పూర్వకాలంలోలాగే యూదా, యెరూషలేము అర్పించే కానుకలు యెహోవాను నిజంగా సంతోషపెడతాయి.+
5 “తీర్పు తీర్చడానికి నేను మీ దగ్గరికి వస్తాను. మంత్రగాళ్లకు,+ వ్యభిచారులకు, తప్పుడు ప్రమాణాలు చేసేవాళ్లకు,+ జీతగాళ్లనూ+ విధవరాళ్లనూ అనాథలనూ* మోసం చేసేవాళ్లకు,+ పరదేశులకు సహాయం చేయడానికి నిరాకరించే* వాళ్లకు+ వ్యతిరేకంగా నేను వెంటనే సాక్ష్యం చెప్తాను. వీళ్లు నాకు భయపడలేదు” అని సైన్యాలకు అధిపతైన యెహోవా చెప్తున్నాడు.
6 “నేను యెహోవాను; నేను మార్పులేనివాణ్ణి.*+ మీరు యాకోబు కుమారులు; అందుకే, మీరు ఇంకా పూర్తిగా నాశనం కాలేదు.
7 మీ పూర్వీకుల కాలం నుండి మీరు నా శాసనాల్ని విడిచి పక్కకు తొలగిపోయారు, వాటిని పాటించలేదు.+ నా దగ్గరికి తిరిగిరండి, అప్పుడు నేను మీ దగ్గరికి తిరిగొస్తాను”+ అని సైన్యాలకు అధిపతైన యెహోవా చెప్తున్నాడు.
కానీ మీరు, “మేము నీ దగ్గరికి ఎలా తిరిగి రావాలి?” అని అంటున్నారు.
8 “మామూలు మనిషి దేవుణ్ణి దోచుకుంటాడా? కానీ మీరు నన్ను దోచుకుంటున్నారు.”
“మేము నిన్ను ఎలా దోచుకున్నాం?” అని మీరు అంటున్నారు.
“పదోవంతుల్ని,* కానుకల్ని ఇవ్వకుండా ఉండడం ద్వారా మీరు నన్ను దోచుకున్నారు.
9 మీరు నిజంగా శాపగ్రస్తులు,* ఎందుకంటే మీరు నన్ను దోచుకుంటున్నారు. అవును, దేశమంతా నన్ను దోచుకుంటోంది.
10 నా మందిరంలో ఆహారం ఉండేలా,+ మీ పదోవంతులన్నీ ఆలయ గోదాములోకి తీసుకురండి.+ దయచేసి ఈ విషయంలో నన్ను పరీక్షించండి; నేను ఆకాశ ద్వారాలు* విప్పి, మీకు కొరత అనేదే లేకుండాపోయే వరకు+ మీపై దీవెనల్ని కుమ్మరిస్తానో* లేదో పరీక్షించి చూడండి”+ అని సైన్యాలకు అధిపతైన యెహోవా అంటున్నాడు.
11 “మీ పొలాన్ని మింగేసే చీడపురుగుల్ని నేను గద్దిస్తాను, అవి మీ పంటను నాశనం చేయవు. మీ ద్రాక్షతోట ఫలించకుండా ఉండదు”+ అని సైన్యాలకు అధిపతైన యెహోవా చెప్తున్నాడు.
12 “దేశాలన్నీ మీరు సంతోషంగల ప్రజలని ప్రకటించాల్సిందే,+ ఎందుకంటే మీరు ఆహ్లాదకరమైన దేశం అవుతారు” అని సైన్యాలకు అధిపతైన యెహోవా చెప్తున్నాడు.
13 “మీరు నాకు వ్యతిరేకంగా కఠినమైన మాటలు మాట్లాడారు” అని యెహోవా అంటున్నాడు.
అయినా, “మేము నీకు వ్యతిరేకంగా ఎలా మాట్లాడుకున్నాం?” అని మీరు అడుగుతున్నారు.+
14 “మీరు ఇలా అంటున్నారు: ‘దేవునికి సేవచేయడం వల్ల ప్రయోజనమేమీ లేదు.+ ఆయన చెప్పినవి చేయడం వల్ల, మన పాపాల్ని బట్టి సైన్యాలకు అధిపతైన యెహోవా ముందు విచారపడడం వల్ల మనం ఏం ప్రయోజనం పొందాం?
15 గర్విష్ఠులే సంతోషంగా ఉన్నట్టు మనకు అనిపిస్తుంది, చెడుగా నడుచుకునేవాళ్లే వర్ధిల్లుతున్నారు.+ వాళ్లు దేవుణ్ణి పరీక్షించే సాహసం చేసినా వాళ్లకు ఏ హానీ జరగట్లేదు.’ ”
16 ఆ సమయంలో యెహోవాకు భయపడేవాళ్లు ఒకరితో ఒకరు మాట్లాడుకున్నారు. అవును, వాళ్లలో ప్రతీ వ్యక్తి తన తోటివాడితో మాట్లాడాడు. అప్పుడు యెహోవా వాళ్ల మాటల్ని శ్రద్ధగా వింటూ ఉన్నాడు. అంతేకాదు, యెహోవాకు భయపడుతున్నవాళ్ల కోసం, ఆయన పేరు గురించి ధ్యానిస్తున్నవాళ్ల* కోసం+ ఆయన ముందు ఒక జ్ఞాపకార్థ గ్రంథం రాయబడింది.+
17 సైన్యాలకు అధిపతైన యెహోవా ఇలా అంటున్నాడు: “నేను వాళ్లను నా ప్రత్యేకమైన సొత్తుగా* చేసుకునే రోజున+ వాళ్లు నావాళ్లు అవుతారు.+ తనకు సేవచేసే కుమారుని మీద తండ్రి కనికరం చూపించినట్టే, నేను వాళ్ల మీద కనికరం చూపిస్తాను.+
18 అప్పుడు మీరు నీతిమంతునికి, దుష్టునికి; దేవుణ్ణి సేవిస్తున్న వ్యక్తికి, సేవించని వ్యక్తికి మధ్య తేడాను మళ్లీ చూస్తారు.”+
అధస్సూచీలు
^ లేదా “నిబంధన దూత.”
^ లేదా “మలినాలు తీసేసి.”
^ లేదా “పరదేశుల హక్కుల్ని కాలరాసే.”
^ లేదా “తండ్రిలేని పిల్లలనూ.”
^ లేదా “నేను మారలేదు.”
^ లేదా “దశమభాగాల్ని.”
^ లేదా “మీరు ఒక శాపంతో నన్ను శపిస్తున్నారు” అయ్యుంటుంది.
^ లేదా “తూములు.”
^ అక్ష., “పూర్తిగా కుమ్మరిస్తానో.”
^ లేదా “ఆలోచిస్తున్నవాళ్ల.” లేదా “అమూల్యంగా ఎంచుతున్నవాళ్ల” అయ్యుంటుంది.
^ లేదా “విలువైన సంపదగా.”
