యాకోబు రాసిన ఉత్తరం 1:1-27
1 దేవునికి, ప్రభువైన యేసుక్రీస్తుకు దాసుడైన యాకోబు+ ఆయా ప్రాంతాల్లో చెదిరివున్న 12 గోత్రాలవాళ్లకు రాస్తున్న ఉత్తరం.
మీకు శుభాకాంక్షలు!
2 నా సహోదరులారా, మీకు రకరకాల కష్టాలు* ఎదురైనప్పుడు సంతోషించండి.+
3 ఎందుకంటే, ఈ విధంగా పరీక్షించబడిన మీ విశ్వాసం మీలో సహనాన్ని పుట్టిస్తుందని మీకు తెలుసు.+
4 అయితే సహనం తన పనిని పూర్తిచేయనివ్వండి. అప్పుడు మీరు అన్ని విషయాల్లో సంపూర్ణులుగా, నిర్దోషులుగా, దేనిలోనూ లోపంలేని వాళ్లుగా ఉండగలుగుతారు.+
5 కాబట్టి, మీలో ఎవరికైనా తెలివి తక్కువగా ఉంటే అతను దేవుణ్ణి అడుగుతూ ఉండాలి,+ అది అతనికి ఇవ్వబడుతుంది.+ ఎందుకంటే ఆయన కోప్పడకుండా* అందరికీ ఉదారంగా ఇస్తాడు.+
6 అయితే అతను ఏమాత్రం సందేహించకుండా విశ్వాసంతో+ అడుగుతూ ఉండాలి.+ ఎందుకంటే సందేహించే వ్యక్తి, గాలిచేత రేపబడి ఎగసిపడే సముద్ర కెరటం లాంటివాడు.
7 నిజానికి, అతను యెహోవా* నుండి ఏదైనా దొరుకుతుందని ఆశపడకూడదు;
8 అతను చంచల స్వభావం గలవాడు,+ ఏ విషయంలోనూ అతనికి నిలకడ ఉండదు.
9 దీనస్థితిలో ఉన్న సహోదరుడు దేవుని దృష్టిలో ఉన్నతస్థితి పొందినందుకు సంతోషించాలి,*+
10 ధనవంతుడేమో దీనస్థితి పొందినందుకు సంతోషించాలి,+ ఎందుకంటే అతను గడ్డిపువ్వులా గతించిపోతాడు.
11 సూర్యుడు ఉదయించినప్పుడు దాని వేడికి మొక్క వాడిపోతుంది, పువ్వు రాలిపోతుంది, దాని అందం నశించిపోతుంది. అలాగే ధనవంతుడు కూడా తన లక్ష్యాల వేటలో పడి కనుమరుగైపోతాడు.+
12 కష్టాన్ని* సహిస్తూ ఉండే వ్యక్తి సంతోషంగా ఉంటాడు.+ ఎందుకంటే అతను దేవుని ఆమోదం పొందిన తర్వాత అతనికి జీవకిరీటం ఇవ్వబడుతుంది.+ యెహోవా* తనను ప్రేమిస్తూ ఉండేవాళ్లకు ఆ కిరీటం ఇస్తానని వాగ్దానం చేశాడు.
13 కష్టం* వచ్చినప్పుడు ఎవ్వరూ, “దేవుడు నన్ను పరీక్షిస్తున్నాడు” అని అనకూడదు. ఎందుకంటే, చెడ్డవాటితో ఎవ్వరూ దేవుణ్ణి పరీక్షించలేరు,* దేవుడు కూడా అలా ఎవ్వర్నీ పరీక్షించడు.
14 అయితే ఒక వ్యక్తి కోరికే అతన్ని లాక్కెళ్లి, వలలో పడేసి అతన్ని పరీక్షకు గురిచేస్తుంది.+
15 కోరిక బలపడినప్పుడు అతను పాపం చేస్తాడు;* దానివల్ల మరణం వస్తుంది.
16 నా ప్రియ సహోదరులారా, మోసపోకండి.
17 ప్రతీ మంచి బహుమతి, ప్రతీ పరిపూర్ణ వరం పైనుండే వస్తాయి. అవి, ఆకాశ కాంతులకు మూలమైన తండ్రి+ నుండి వస్తాయి. మారుతూ ఉండే నీడలా ఆయన మారిపోడు.+
18 తన సృష్టి ప్రాణుల్లో మనం ఒకవిధంగా ప్రథమఫలాలు అయ్యేలా,+ సత్యవాక్యం ద్వారా మనల్ని ఉనికిలోకి తేవాలనేది ఆయన సంకల్పం.+
19 నా ప్రియ సహోదరులారా, ఈ విషయం తెలుసుకోండి: ప్రతీ ఒక్కరు వినడానికి త్వరపడాలి, మాట్లాడడానికి తొందరపడకూడదు,+ త్వరగా కోపం తెచ్చుకోకూడదు.+
20 ఎందుకంటే కోపంగా ఉన్న వ్యక్తి దేవుని దృష్టిలో సరైనది చేయడు.*
21 కాబట్టి ప్రతీ మలినానికి, చెడుతనపు జాడకు* దూరంగా ఉంటూ,+ మిమ్మల్ని రక్షించగల దేవుని వాక్యం మీ హృదయాల్లో నాటబడేటప్పుడు దాన్ని సౌమ్యంగా స్వీకరించండి.
22 అయితే తప్పుడు ఆలోచనతో* మిమ్మల్ని మీరు మోసం చేసుకుంటూ వాక్యాన్ని వినేవాళ్లుగా మాత్రమే ఉండకండి, దాన్ని పాటించేవాళ్లుగా ఉండండి.+
23 ఒక వ్యక్తి వాక్యాన్ని వింటూ, దాన్ని పాటించకపోతుంటే+ అతను అద్దంలో తన ముఖం చూసుకునే మనిషిలా ఉంటాడు.
24 ఎందుకంటే, అతను అద్దంలో తనను తాను చూసుకొని, బయటికి వెళ్లగానే వెంటనే తాను ఎలాంటివాడో మర్చిపోతాడు.
25 అయితే స్వేచ్ఛను ఇచ్చే పరిపూర్ణ నియమంలోకి*+ పరిశీలనగా చూసి, దాన్ని పాటిస్తూ ఉండే వ్యక్తి ఊరికే విని మర్చిపోడు కానీ దాని ప్రకారం నడుచుకుంటాడు; అలా చేయడంలో సంతోషం పొందుతాడు.+
26 ఒక వ్యక్తి, తాను దేవుని ఆరాధకుణ్ణని* అనుకుంటూ, నాలుకను అదుపులో* పెట్టుకోకపోతే+ అతను తన హృదయాన్ని మోసం చేసుకుంటున్నాడు; అతని ఆరాధన వ్యర్థం.
27 మన తండ్రైన దేవుని దృష్టిలో పవిత్రమైన, కళంకంలేని ఆరాధన* ఏదంటే, కష్టాల్లో ఉన్న అనాథల్ని,+ విధవరాళ్లను+ ఆదుకోవడం,+ ఈ లోక మలినం తనకు అంటకుండా చూసుకోవడం.+
అధస్సూచీలు
^ లేదా “పరీక్షలు.”
^ లేదా “తప్పుబట్టకుండా.”
^ అనుబంధం A5 చూడండి.
^ అక్ష., “గొప్పలు చెప్పుకోవాలి.”
^ లేదా “పరీక్షను.”
^ అనుబంధం A5 చూడండి.
^ లేదా “పరీక్ష.”
^ లేదా “చెడ్డపనులు చేసేలా ఎవ్వరూ దేవుణ్ణి ప్రలోభపెట్టలేరు.”
^ లేదా “కోరిక గర్భం ధరించి పాపాన్ని కంటుంది.”
^ లేదా “మనిషి కోపం దేవుని నీతిని నెరవేర్చదు.”
^ లేదా “విపరీతమైన చెడుతనానికి” అయ్యుంటుంది.
^ లేదా “తర్కంతో.”
^ ఇది దేవుని వాక్యాన్ని సూచిస్తోంది.
^ లేదా “భక్తిపరుణ్ణని.”
^ లేదా “నోటికి కళ్లెం.”
^ లేదా “మతం.”
