రూతు 4:1-22
4 బోయజు నగర ద్వారం+ దగ్గరికి వెళ్లి అక్కడ కూర్చున్నాడు. ఇదిగో! బోయజు చెప్పిన దగ్గరి బంధువు*+ అటుగా వెళ్తున్నాడు. అప్పుడు బోయజు అతనితో, “ఓయీ, ఇలా వచ్చి కూర్చో” అన్నాడు. అతను వచ్చి కూర్చున్నాడు.
2 తర్వాత బోయజు నగరంలోని పదిమంది పెద్దల్ని+ పిలిపించి వాళ్లతో, “ఇక్కడ కూర్చోండి” అన్నాడు. వాళ్లు కూర్చున్నారు.
3 అప్పుడు బోయజు ఆ దగ్గరి బంధువుతో*+ ఇలా అన్నాడు: “మోయాబు ప్రాంతం నుండి తిరిగొచ్చిన నయోమి,+ మన సహోదరుడు ఎలీమెలెకుకు+ చెందిన భూమిని అమ్మాల్సిన పరిస్థితి వచ్చింది.
4 కాబట్టి నేను ఆ విషయం నీకు చెప్పాలనుకున్నాను. ఈ నగరవాసుల ముందు, నా ప్రజల పెద్దల ముందు+ దాన్ని కొను. నువ్వు దాన్ని కొంటే కొను, ఒకవేళ నువ్వు కొనకపోతే ఆ సంగతి నాతో చెప్పు. ఎందుకంటే, నీ తర్వాత దాన్ని కొనే హక్కు ఉన్నది నాకే.” అప్పుడతను, “దాన్ని కొనడం నాకు ఇష్టమే” అన్నాడు.+
5 తర్వాత బోయజు అతనితో, “నువ్వు నయోమి నుండి ఆ భూమిని కొన్న రోజున, భర్త చనిపోయిన మోయాబీయురాలైన రూతు నుండి కూడా దాన్ని కొనాలి. అలా నువ్వు చనిపోయిన వ్యక్తి పేరును నిలిపి అతని వారసత్వపు ఆస్తిని కాపాడాలి” అన్నాడు.+
6 అప్పుడు ఆ దగ్గరి బంధువు* ఇలా అన్నాడు: “నేను దాన్ని కొనలేను. ఎందుకంటే, నేను నా సొంత వారసత్వపు ఆస్తిని పాడుచేసుకుంటానేమో. నా హక్కును తీసుకొని నువ్వే దాన్ని కొను, నేను దాన్ని కొనలేను.”
7 తిరిగి కొనే హక్కుకు, దాన్ని బదిలీ చేయడానికి సంబంధించిన ప్రతీ వ్యవహారాన్ని చెల్లుబాటు చేసేందుకు పూర్వం ఇశ్రాయేలులో ఉన్న సంప్రదాయం ఏంటంటే, ఒక వ్యక్తి తన చెప్పు తీసి+ అవతలి వ్యక్తికి ఇవ్వాలి. ఇశ్రాయేలులో ఒక ఒప్పందాన్ని ఖరారు చేయడానికి* ఈ పద్ధతి పాటించేవాళ్లు.
8 కాబట్టి ఆ దగ్గరి బంధువు* బోయజుతో, “దాన్ని నువ్వే కొను” అని చెప్పి, తన చెప్పు తీసిచ్చాడు.
9 తర్వాత బోయజు అక్కడున్న పెద్దలతో, ప్రజలందరితో ఇలా అన్నాడు: “ఈ రోజు ఎలీమెలెకుకు, కిల్యోనుకు, మహ్లోనుకు చెందినదంతా నేను నయోమి నుండి కొంటున్నాను అనడానికి మీరే సాక్షులు.+
10 అంతేకాదు మహ్లోను భార్యను అంటే మోయాబీయురాలైన రూతును భార్యగా చేసుకుంటున్నాను. అలా, చనిపోయిన వ్యక్తి పేరును నిలిపి అతని వారసత్వాన్ని కాపాడతాను.+ దానివల్ల, చనిపోయిన వ్యక్తి పేరు అతని సహోదరుల మధ్య నుండి, అతని ఊరివాళ్ల మధ్య* నుండి చెరిగిపోకుండా ఉంటుంది. ఈ రోజు మీరే దీనికి సాక్షులు.”+
11 అప్పుడు నగర ద్వారం దగ్గర ఉన్న ప్రజలందరు, పెద్దలు ఇలా అన్నారు: “మేము సాక్షులం! నీ ఇంట్లోకి అడుగుపెడుతున్న భార్యను యెహోవా దీవించాలి. ఆమె ఇశ్రాయేలీయులకు తల్లులైన రాహేలు, లేయాల్లా అవ్వాలి.+ నువ్వు ఎఫ్రాతాలో+ వర్ధిల్లాలి, బేత్లెహేములో+ నీకు మంచిపేరు రావాలి.
12 ఈ యువతి ద్వారా యెహోవా నీకు ఇచ్చే సంతానం+ వల్ల నీ ఇల్లు యూదా, తామారుల కుమారుడైన పెరెసు+ ఇంటిలా అవ్వాలి.”
13 బోయజు రూతును పెళ్లి చేసుకుని, ఆమెతో కలిశాడు. యెహోవా ఆమెను దీవించడం వల్ల ఆమె గర్భం దాల్చి కుమారుణ్ణి కన్నది.
14 అప్పుడు స్త్రీలు నయోమితో ఇలా అన్నారు: “నేడు మీకు ఒక దగ్గరి బంధువు* ఉండేలా చూసిన యెహోవా స్తుతించబడాలి! ఆయన పేరు ఇశ్రాయేలులో చాటించబడాలి.
15 ఇతను* నీ ప్రాణానికి ఊరటనిచ్చాడు, వృద్ధాప్యంలో నిన్ను చూసుకుంటాడు. ఎందుకంటే నిన్ను ప్రేమించే నీ కోడలికి, నీకు ఏడుగురు కుమారులకన్నా ఎక్కువైన నీ కోడలికి ఇతను పుట్టాడు.”
16 నయోమి ఆ బిడ్డను చేతుల్లోకి తీసుకుని హత్తుకుంది, ఆ బిడ్డ ఆలనాపాలనా చూసుకుంది.*
17 అప్పుడు ఇరుగుపొరుగున ఉన్న స్త్రీలు ఆ బాబుకు పేరు పెట్టారు. వాళ్లు, “నయోమికి ఒక కుమారుడు పుట్టాడు” అంటూ, ఆ బాబుకు ఓబేదు+ అని పేరు పెట్టారు. అతను దావీదు తండ్రైన యెష్షయికి+ తండ్రి.
18 పెరెసు వంశావళి+ ఇది: పెరెసు ఎస్రోనును+ కన్నాడు,
19 ఎస్రోను రామును కన్నాడు, రాము అమ్మీనాదాబును కన్నాడు,+
20 అమ్మీనాదాబు+ నయస్సోనును కన్నాడు, నయస్సోను శల్మానును కన్నాడు,
21 శల్మాను బోయజును కన్నాడు, బోయజు ఓబేదును కన్నాడు,
22 ఓబేదు యెష్షయిని+ కన్నాడు, యెష్షయి దావీదును+ కన్నాడు.
అధస్సూచీలు
^ లేదా “తిరిగి కొనగల వ్యక్తి.”
^ లేదా “తిరిగి కొనగల వ్యక్తితో.”
^ లేదా “తిరిగి కొనగల వ్యక్తి.”
^ లేదా “ధృవీకరించడానికి.”
^ లేదా “తిరిగి కొనగల వ్యక్తి.”
^ అక్ష., “సొంత నగర ద్వారం.”
^ లేదా “తిరిగి కొనగల వ్యక్తి.”
^ అంటే, నయోమి మనవడు.
^ లేదా “అతనికి దాది అయింది.”
