లూకా సువార్త 1:1-80

ప్లే

థెయొఫిలాను సంబోధించడం (1-4)
బాప్తిస్మమిచ్చే యోహాను పుట్టుక గురించి గబ్రియేలు ముందే చెప్పడం (5-25)
యేసు పుట్టుక గురించి గబ్రియేలు ముందే చెప్పడం (26-38)
మరియ ఎలీసబెతు దగ్గరికి వెళ్లడం (39-45)
మరియ యెహోవాను కీర్తించడం (46-56)
యోహాను పుట్టడం, అతనికి పేరు పెట్టడం (57-66)
జెకర్యా ప్రవచనం (67-80)

1 జరిగిన విషయాలన్నిటినీ పరిశోధించడానికి, వాటిని రాయడానికి చాలామంది కృషిచేశారు. మనం కూడా ఎలాంటి సందేహం లేకుండా వాటిని నమ్ముతున్నాం.+ ² వాళ్లు రాసిన విషయాలు, మనం మొదటినుండి ప్రత్యక్ష సాక్షుల దగ్గర,+ దేవుని సందేశాన్ని ప్రకటించేవాళ్ల దగ్గర+ విన్నవాటితో సరిపోతున్నాయి. ³ అత్యంత గౌరవనీయుడివైన థెయొఫిలా,+ నేను కూడా ఈ విషయాలన్నిటినీ పరిశీలించాను కాబట్టి అవి మొదటినుండి ఎలా జరిగాయో అలా* నీకు రాయాలని నిశ్చయించుకున్నాను. ⁴ నువ్వు నేర్చుకున్న విషయాలు ఎంత నమ్మదగినవో నువ్వు తెలుసుకోవాలని నా ఉద్దేశం.+ ⁵ యూదయను హేరోదు* రాజు పరిపాలిస్తున్న రోజుల్లో+ అబీయా విభాగానికి*+ చెందిన జెకర్యా అనే యాజకుడు ఉండేవాడు. అతని భార్య అహరోను వంశస్థురాలు, ఆమె పేరు ఎలీసబెతు. ⁶ వాళ్లిద్దరు యెహోవా* ఆజ్ఞలన్నిటినీ పాటిస్తూ, ఆయన కోరినవన్నీ చేస్తూ, నిందలేకుండా నడుచుకుంటూ ఆయన దృష్టిలో నీతిమంతులుగా ఉండేవాళ్లు. ⁷ అయితే ఎలీసబెతు గొడ్రాలు కాబట్టి వాళ్లకు పిల్లలు లేరు. పైగా వాళ్లిద్దరూ చాలా ముసలివాళ్లు. ⁸ అయితే అబీయా విభాగం+ వంతు వచ్చినప్పుడు జెకర్యా దేవుని ముందు యాజకునిగా సేవ చేస్తున్నాడు. అప్పుడు ⁹ యాజకుల ఆనవాయితీ ప్రకారం, యెహోవా* ఆలయం లోపల+ ధూపం వేసే+ వంతు అతనికి వచ్చింది. ¹⁰ ధూపం వేసే సమయంలో ప్రజలందరూ బయట ఉండి ప్రార్థనలు చేస్తున్నారు. ¹¹ అప్పుడు యెహోవా* దూత అతనికి కనిపించాడు, ఆ దూత ధూపవేదిక కుడివైపున నిలబడి ఉన్నాడు. ¹² జెకర్యా అది చూసి కంగారుపడి చాలా భయపడిపోయాడు. ¹³ అయితే ఆ దూత అతనితో ఇలా అన్నాడు: “జెకర్యా, భయపడకు. దేవుడు నీ అభ్యర్థనను విన్నాడు. నీ భార్య ఎలీసబెతు ఒక కుమారుణ్ణి కంటుంది. నువ్వు అతనికి యోహాను అని పేరు పెట్టాలి.+ ¹⁴ నువ్వు ఆనందాన్ని, గొప్ప సంతోషాన్ని పొందుతావు. అతను పుట్టినందుకు చాలామంది సంతోషిస్తారు.+ ¹⁵ ఎందుకంటే, అతను యెహోవా* దృష్టిలో గొప్పవాడిగా ఉంటాడు.+ అయితే, అతను ద్రాక్షారసాన్ని గానీ మద్యాన్ని గానీ అస్సలు తాగకూడదు.+ తల్లి గర్భంలో ఉన్నప్పటి నుండే+ దేవుడు అతనికి పవిత్రశక్తిని ఇస్తాడు. ¹⁶ అతను చాలామంది ఇశ్రాయేలీయుల్ని తమ దేవుడైన యెహోవా* వైపుకు తిప్పుతాడు.+ ¹⁷ అంతేకాదు, తండ్రుల హృదయాల్ని పిల్లల వైపుకు తిప్పడానికి;+ తెలివిగా నడుచుకునేలా, సరైనది చేసేలా అవిధేయులకు సహాయం చేయడానికి దేవుడు ఏలీయా లాంటి స్ఫూర్తితో, శక్తితో+ నీ కుమారుణ్ణి తన ముందు పంపిస్తాడు. అలా అతను యెహోవా* కోసం ప్రజల్ని సిద్ధం చేస్తాడు.”+ ¹⁸ అప్పుడు జెకర్యా ఆ దూతతో, “నేను దీన్ని ఎలా నమ్మాలి? నేను ముసలివాడిని, నా భార్యకేమో వయసైపోయింది” అన్నాడు. ¹⁹ దానికి ఆ దూత ఇలా చెప్పాడు: “నేను దేవుని సన్నిధిలో సేవ చేసే+ గబ్రియేలును.+ నీతో మాట్లాడడానికి, ఈ శుభవార్త నీకు ప్రకటించడానికి దేవుడు నన్ను పంపించాడు. ²⁰ నిర్ణయించిన సమయం వచ్చినప్పుడు నా మాటలు నెరవేరతాయి. అయితే ఇదిగో! నువ్వు నా మాటలు నమ్మలేదు కాబట్టి ఇవి జరిగే రోజు వరకు నువ్వు మూగవాడిగా ఉంటావు.” ²¹ ఈలోగా ప్రజలు జెకర్యా కోసం బయట వేచి చూస్తూ, అతను ఆలయం లోపల ఎందుకు అంతసేపు ఉన్నాడా అని ఆశ్చర్యపోయారు. ²² అతను బయటికి వచ్చినప్పుడు వాళ్లతో మాట్లాడలేకపోయాడు. అతను ఆలయంలో ఏదో దర్శనం చూశాడని వాళ్లకు అర్థమైంది. అతను మూగవాడయ్యాడు కాబట్టి వాళ్లకు సైగలు చేస్తూ ఉన్నాడు. ²³ అతను పవిత్రసేవ* చేసే రోజులు పూర్తయినప్పుడు తిరిగి ఇంటికి వెళ్లిపోయాడు. ²⁴ కొన్ని రోజుల తర్వాత అతని భార్య ఎలీసబెతు గర్భవతి అయింది, ఐదు నెలలపాటు ఆమె ఇంట్లోనే ఉండిపోయింది. ఆమె ఇలా అనుకుంది: ²⁵ “యెహోవాయే* నా కోసం దీన్ని చేశాడు. మనుషుల్లో నాకున్న నిందను తీసేయడానికి ఆయన నన్ను గుర్తుచేసుకున్నాడు.”+ ²⁶ ఆమెకు ఆరో నెల వచ్చినప్పుడు దేవుడు గబ్రియేలు దూతను+ గలిలయలోని నజరేతు అనే నగరానికి పంపించాడు. ²⁷ దావీదు వంశంలో పుట్టిన యోసేపు అనే వ్యక్తితో పెళ్లి నిశ్చయమైన ఒక కన్య+ దగ్గరికి దేవుడు ఆ దూతను పంపించాడు. ఆ కన్య పేరు మరియ.+ ²⁸ ఆ దూత లోపలికి వచ్చి ఆమెతో, “శుభాకాంక్షలు, నువ్వు ఎంతో దయ పొందావు. యెహోవా* నీకు తోడుగా ఉన్నాడు” అని అన్నాడు. ²⁹ కానీ ఆమె చాలా కంగారుపడి, ఆ మాటలకు అర్థం ఏమైవుంటుందా అని ఆలోచించడం మొదలుపెట్టింది. ³⁰ కాబట్టి దేవదూత ఆమెతో ఇలా అన్నాడు: “మరియా, భయపడకు. నువ్వు దేవుని దయ పొందావు. ³¹ ఇదిగో! నువ్వు గర్భవతివై కుమారుణ్ణి కంటావు, ఆయనకు నువ్వు యేసు అని పేరు పెట్టాలి.+ ³² ఆయన గొప్పవాడై+ సర్వోన్నతుని కుమారుడని+ పిలవబడతాడు. ఆయన తండ్రైన దావీదు సింహాసనాన్ని యెహోవా* దేవుడు ఆయనకు ఇస్తాడు.+ ³³ ఆయన యాకోబు వంశస్థుల్ని ఎప్పటికీ రాజుగా పరిపాలిస్తాడు, ఆయన రాజ్యానికి అంతం ఉండదు.”+ ³⁴ అయితే మరియ దేవదూతతో, “ఇదెలా సాధ్యం? నేనింకా కన్యనే+ కదా?” అని అంది. ³⁵ అప్పుడు దేవదూత ఇలా అన్నాడు: “పవిత్రశక్తి నీ మీదికి వస్తుంది, సర్వోన్నతుని శక్తి నిన్ను కమ్ముకుంటుంది. అందుకే పుట్టబోయే బిడ్డ పవిత్రుడని,+ దేవుని కుమారుడని+ పిలవబడతాడు. ³⁶ ఇదిగో! మీ బంధువు ఎలీసబెతు కూడా ముసలితనంలో గర్భవతి అయింది. గొడ్రాలని పిలవబడిన ఆమెకు ఇప్పుడు ఆరో నెల. ³⁷ దేవునికి ఏదీ అసాధ్యం కాదు.”+ ³⁸ అప్పుడు మరియ, “ఇదిగో! యెహోవా* దాసురాలిని! నువ్వు చెప్పినట్టే నాకు జరగాలి” అంది. అప్పుడు ఆ దేవదూత అక్కడి నుండి వెళ్లిపోయాడు. ³⁹ కాబట్టి ఆ రోజుల్లో మరియ బయల్దేరి, పర్వత ప్రాంతంలో ఉన్న యూదయలోని ఒక నగరానికి త్వరత్వరగా వెళ్లింది. ⁴⁰ ఆమె జెకర్యా ఇంట్లో అడుగుపెట్టి ఎలీసబెతుకు శుభాకాంక్షలు చెప్పింది. ⁴¹ మరియ చెప్పిన శుభాకాంక్షల్ని వినగానే ఎలీసబెతు గర్భంలో ఉన్న శిశువు గంతులు వేశాడు. ఎలీసబెతు పవిత్రశక్తితో నిండిపోయి ⁴² బిగ్గరగా ఇలా అంది: “స్త్రీలలో నువ్వు దీవించబడిన దానివి. నీ గర్భఫలం దీవెన పొందింది! ⁴³ నా ప్రభువు తల్లి వచ్చి నన్ను చూడడానికి నేను ఎంతటిదాన్ని? ⁴⁴ ఇదిగో! నీ శుభాకాంక్షలు నా చెవిన పడగానే నా గర్భంలో ఉన్న శిశువు సంతోషంతో గంతులు వేశాడు. ⁴⁵ నమ్మిన నువ్వు కూడా ధన్యురాలివి.* ఎందుకంటే, యెహోవా* నీకు చెప్పినవి పూర్తిగా నెరవేరతాయి.” ⁴⁶ అప్పుడు మరియ ఇలా అంది: “నా ప్రాణం* యెహోవాను* ఘనపరుస్తోంది.+ ⁴⁷ నా రక్షకుడైన దేవుణ్ణి బట్టి నా హృదయం సంతోషించకుండా ఉండలేకపోతోంది.+ ⁴⁸ ఎందుకంటే, తన దాసురాలి దీనస్థితిని ఆయన గుర్తుచేసుకున్నాడు.+ ఇదిగో! ఇప్పటినుండి అన్ని తరాలవాళ్లు నన్ను ధన్యురాలు అంటారు.+ ⁴⁹ ఎందుకంటే, శక్తిమంతుడైన దేవుడు నా విషయంలో గొప్ప పనులు చేశాడు. ఆయన పేరు పవిత్రమైనది.+ ⁵⁰ ఆయనకు భయపడేవాళ్ల మీద ఆయన కరుణ తరతరాలు ఉంటుంది.+ ⁵¹ ఆయన తన బాహువుతో శక్తివంతమైన పనులు చేశాడు; గర్విష్ఠుల్ని చెదరగొట్టాడు.+ ⁵² గొప్ప అధికారం ఉన్నవాళ్లను సింహాసనాల నుండి కిందికి దింపేసి,+ తక్కువ స్థాయిలో ఉన్నవాళ్లను ఘనపర్చాడు.+ ⁵³ ఆకలిగా ఉన్నవాళ్లను మంచివాటితో పూర్తిగా తృప్తిపర్చాడు,+ ధనవంతుల్ని వట్టి చేతులతో పంపేశాడు. ⁵⁴ ఆయన తన సేవకుడైన ఇశ్రాయేలుకు సహాయం చేయడానికి వచ్చాడు; మన పూర్వీకులతో చెప్పినట్టే+ ⁵⁵ అబ్రాహాము మీద, అతని సంతానం* మీద+ ఎప్పటికీ కరుణ చూపించాడు.” ⁵⁶ మరియ దాదాపు మూడు నెలలపాటు ఆమెతోనే ఉండి, తర్వాత ఇంటికి వెళ్లిపోయింది. ⁵⁷ ఎలీసబెతు బిడ్డను కనే సమయం వచ్చింది, ఆమె మగబిడ్డను కన్నది. ⁵⁸ యెహోవా* ఆమె మీద ఎంతో కరుణ చూపించాడని విని ఆ చుట్టుపక్కలవాళ్లు, బంధువులు ఆమెతో కలిసి సంతోషించారు.+ ⁵⁹ ఎనిమిదో రోజున ఆ పసికందుకు సున్నతి చేయించేటప్పుడు+ వాళ్లు వచ్చారు. వాళ్ల నాన్న జెకర్యా పేరే అతనికి పెట్టబోయారు. ⁶⁰ అయితే వాళ్ల అమ్మ, “వద్దు, అతనికి యోహాను అని పేరు పెట్టాలి” అంది. ⁶¹ అప్పుడు వాళ్లు ఆమెతో, “మీ బంధువుల్లో ఎవరికీ ఆ పేరు లేదే” అన్నారు. ⁶² తర్వాత వాళ్లు సైగలు చేస్తూ, అతనికి ఏ పేరు పెట్టాలని అనుకుంటున్నావని వాళ్ల నాన్నను అడిగారు. ⁶³ అతను ఒక పలకను తెమ్మని చెప్పి, దానిమీద “అతని పేరు యోహాను” అని రాశాడు.+ దాంతో వాళ్లంతా చాలా ఆశ్చర్యపోయారు. ⁶⁴ వెంటనే అతని నోరు తెరుచుకుంది, అతని నాలుక కదిలింది; అతను దేవుణ్ణి స్తుతిస్తూ మాట్లాడడం మొదలుపెట్టాడు.+ ⁶⁵ దాంతో వాళ్ల చుట్టుపక్కల ఉంటున్న వాళ్లందరికీ భయం పట్టుకుంది. యూదయ పర్వత ప్రాంతమంతటా ప్రజలు ఈ విషయాలన్నిటి గురించి మాట్లాడుకోవడం మొదలుపెట్టారు. ⁶⁶ విన్న వాళ్లందరూ వాటిని మనసులో ఉంచుకొని, “ఈ బాబు పెద్దయ్యాక ఏమౌతాడో?” అని అనుకున్నారు. ఎందుకంటే, యెహోవా* చెయ్యి నిజంగా అతనికి తోడుగా ఉంది. ⁶⁷ అప్పుడు వాళ్ల నాన్న జెకర్యా పవిత్రశక్తితో నిండిపోయి ఇలా ప్రవచించాడు: ⁶⁸ “ఇశ్రాయేలు దేవుడైన యెహోవా* స్తుతించబడాలి.+ ఎందుకంటే, ఆయన తన ప్రజల మీద దృష్టిపెట్టాడు, వాళ్లకు విడుదల తీసుకొచ్చాడు.+ ⁶⁹ ఆయన తన సేవకుడైన దావీదు ఇంట్లో*+ మన కోసం ఒక బలమైన రక్షకుణ్ణి*+ పుట్టించాడు. ⁷⁰ అలా, ప్రాచీనకాలం నుండి తన ప్రవక్తల నోటి ద్వారా ఆయన చెప్పినట్టే చేశాడు.+ ⁷¹ మన శత్రువుల నుండి, మనల్ని ద్వేషించే వాళ్లందరి నుండి రక్షిస్తానని ఆయన చెప్పాడు.+ ⁷² మన పూర్వీకులతో చెప్పిన మాటను ఆయన నెరవేరుస్తాడు, కరుణ చూపిస్తాడు. తన పవిత్ర ఒప్పందాన్ని* గుర్తు చేసుకుంటాడు.+ ⁷³ మన పూర్వీకుడైన అబ్రాహాముకు ఆయన ఒట్టేసి చేసిన ప్రమాణమే ఆ ఒప్పందం.+ ⁷⁴ ఆ ప్రమాణం ప్రకారం, మనం శత్రువుల చేతుల్లో నుండి తప్పించబడిన తర్వాత, భయపడకుండా తనకు పవిత్రసేవ చేసే గొప్ప అవకాశాన్ని ఆయన మనకు ఇస్తాడు. ⁷⁵ దానివల్ల మనం జీవితాంతం విశ్వసనీయంగా ఉంటూ సరైనది చేయగలుగుతాం. ⁷⁶ బాబూ, నువ్వు మాత్రం సర్వోన్నతుని ప్రవక్తవని పిలవబడతావు. ఎందుకంటే, తన మార్గాల్ని సిద్ధం చేయడానికి యెహోవా* తనకు ముందు నిన్ను పంపిస్తాడు.+ ⁷⁷ తమ పాపాలకు క్షమాపణ పొందడం ద్వారా రక్షణ పొందవచ్చనే సందేశాన్ని తన ప్రజలకు ప్రకటించడానికి అలా పంపిస్తాడు.+ ⁷⁸ మన దేవుడు తన గొప్ప కనికరం వల్ల అలా చేస్తాడు. ఆ కనికరంతో ఆయన మనల్ని సూర్యోదయంలా ప్రకాశింపజేస్తాడు. ⁷⁹ చీకట్లో, మరణ నీడలో కూర్చున్న వాళ్లకు వెలుగును ఇవ్వడానికి,+ మన పాదాల్ని శాంతి మార్గంలో నడిపించడానికి ఆయన అలా చేస్తాడు.” ⁸⁰ ఆ పిల్లవాడు పెరిగి పెద్దౌతూ, ఆధ్యాత్మికంగా* బలపడుతూ వచ్చాడు. తనను తాను ఇశ్రాయేలీయులకు కనబర్చుకునే రోజు వరకు అతను ఎడారిలోనే జీవించాడు.