హోషేయ 7:1-16
7 “నేను ఇశ్రాయేలును బాగుచేసినప్పుడు,ఎఫ్రాయిము దోషం,సమరయ దుష్టత్వం+ కూడా వెల్లడౌతాయి.+
ఎందుకంటే, వాళ్లు మోసపూరితంగా ప్రవర్తిస్తున్నారు;+దొంగలు లోపలికి చొరబడుతున్నారు, బయట దోపిడీ ముఠాలు దోచుకుంటున్నాయి.+
2 కానీ నేను వాళ్ల దుష్టత్వమంతటినీ గుర్తు చేసుకుంటానని వాళ్లు తమ హృదయాల్లో అనుకోవడం లేదు.+
వాళ్ల చెడ్డపనులు వాళ్లను చుట్టుముట్టాయి;అవి సరిగ్గా నా కళ్ల ముందే ఉన్నాయి.
3 వాళ్లు తమ దుష్టత్వంతో రాజును,మోసంతో అధిపతుల్ని సంతోషపెడుతున్నారు.
4 వాళ్లంతా వ్యభిచారులు,వంటవాడు అంటించిన పొయ్యిలా మండుతున్నారు;పిండి పిసికి, ముద్ద పులిసే వరకు అతను ఆ మంటను రేపడు.
5 మన రాజు ఉత్సవ రోజున అధిపతులు జబ్బుపడ్డారు,ద్రాక్షారసం వల్ల వాళ్లు కోపంగా ఉన్నారు.+
రాజు అపహాసకులతో చేతులు కలిపాడు.
6 పొయ్యిలా మండుతున్న హృదయాలతో వాళ్లు దగ్గరికి వస్తారు.*
వంటవాడు రాత్రంతా నిద్రపోతాడు;ఉదయం పెద్దపెద్ద మంటలతో పొయ్యి మండుతుంది.
7 వాళ్లంతా పొయ్యిలా వేడిగా ఉన్నారు,వాళ్లు తమ పరిపాలకుల్ని* మింగేస్తారు.
వాళ్ల రాజులంతా పడిపోయారు;+వాళ్లలో ఒక్కరు కూడా నాకు మొరపెట్టడం లేదు.+
8 ఎఫ్రాయిము దేశాలతో కలిసిపోయాడు.+
ఎఫ్రాయిము ఒకవైపే కాలిన గుండ్రటి రొట్టెలా ఉన్నాడు.
9 అపరిచితులు అతని శక్తిని దోచుకున్నారు,+ కానీ ఆ విషయం అతనికి తెలియడం లేదు.
అతని వెంట్రుకలు తెల్లబడ్డాయి, కానీ అతను దాన్ని గమనించుకోవడం లేదు.
10 ఇశ్రాయేలు గర్వం అతని మీద సాక్ష్యం చెప్పింది,+ఇంత జరిగినా, వాళ్లు తమ దేవుడైన యెహోవా దగ్గరికి తిరిగి రాలేదు,+ఆయన కోసం వెదకలేదు.
11 ఎఫ్రాయిము తెలివి గానీ, వివేచన* గానీ లేని+ పావురంలా ఉన్నాడు.
వాళ్లు ఐగుప్తును పిలిచారు;+ అష్షూరు దగ్గరికి వెళ్లారు.+
12 వాళ్లు ఎక్కడికి వెళ్లినా, నేను నా వలను వాళ్లమీద పరుస్తాను.
ఆకాశపక్షుల్లా వాళ్లను కిందికి పడేస్తాను.
వాళ్ల సమాజానికి ఇచ్చిన హెచ్చరిక ప్రకారం వాళ్లకు క్రమశిక్షణ ఇస్తాను.+
13 వాళ్లకు శ్రమ! ఎందుకంటే, వాళ్లు నా నుండి పారిపోయారు.
వాళ్లకు నాశనం తప్పదు! ఎందుకంటే, వాళ్లు నాకు వ్యతిరేకంగా పాపం చేశారు.
వాళ్లను విడిపించడానికి నేను సిద్ధంగా ఉన్నాను, కానీ వాళ్లు నామీద అబద్ధాలు చెప్పారు.+
14 వాళ్లు తమ పరుపుల మీద పడుకుని ఏడుస్తూ ఉంటారు,కానీ తమ హృదయాల్లో నాకు మొరపెట్టరు.+
వాళ్లు ధాన్యం కోసం, కొత్త ద్రాక్షారసం కోసం తమ శరీరాల్ని కోసుకుంటారు;వాళ్లు నా మీద తిరుగుబాటు చేస్తున్నారు.
15 నేను వాళ్లకు క్రమశిక్షణ ఇచ్చినా, వాళ్ల బాహువుల్ని బలపర్చినా,వాళ్లు చెడు చేయడానికి కుట్ర పన్నుతూ నాకు విరోధులుగా ఉన్నారు.
16 వాళ్లు తమ ప్రవర్తన మార్చుకున్నారు, కానీ ఉన్నతమైనదాని* వైపు తిరగలేదు;వదులుగా ఉన్న విల్లులా వాళ్లు నమ్మదగినవాళ్లు కాదు.+
వాళ్ల అధిపతులు తమ తిరుగుబాటు మాటల వల్ల ఖడ్గంతో చంపబడతారు.
అందుకే వాళ్లు ఐగుప్తు దేశంలో ఎగతాళికి గురౌతారు.”+
అధస్సూచీలు
^ లేదా “వాళ్లు తమ కుతంత్రాలతో దగ్గరికి వస్తున్నప్పుడు, వాళ్ల హృదయాలు పొయ్యిలా ఉన్నాయి” అయ్యుంటుంది.
^ అక్ష., “న్యాయమూర్తుల్ని.”
^ అక్ష., “హృదయం.”
^ అంటే, ఉన్నతమైన ఆరాధన.
