దినవృత్తాంతాలు మొదటి గ్రంథం 29:1-30
29 అప్పుడు, దావీదు రాజు సమాజమంతటితో ఇలా అన్నాడు: “దేవుడు ఎంచుకున్న నా కుమారుడైన సొలొమోను+ చిన్నవాడు, అనుభవం లేనివాడు;* కానీ ఈ పని చాలా గొప్పది, ఎందుకంటే ఇది మనిషి కోసం కాదు, యెహోవా దేవుని కోసం కట్టబోయే ఆలయం.*+
2 నా దేవుని మందిరం కోసం నేను ఎంతో ప్రయాసపడి బంగారం పని కోసం బంగారాన్ని, వెండి పని కోసం వెండిని, రాగి పని కోసం రాగిని, ఇనుప పని కోసం ఇనుమును,+ కలప పని కోసం మ్రానుల్ని,+ అలాగే సులిమాని రాళ్లను, సున్నంతో అమర్చే రాళ్లను, రంగురంగుల చిన్న అలంకరణ రాళ్లను, ప్రతీ విధమైన అమూల్యమైన రాళ్లను, విస్తారంగా పాలరాళ్లను సిద్ధం చేశాను.
3 అంతేకాదు, నా దేవుని మందిరం మీదున్న ఇష్టం వల్ల,+ పవిత్ర మందిరం కోసం నేను సిద్ధం చేసిన వాటన్నిటితోపాటు నా సొంత బంగారాన్ని, వెండిని+ కూడా నా దేవుని మందిరానికి ఇస్తున్నాను.
4 గదుల గోడలకు పూత పూయడానికి 3,000 తలాంతుల* ఓఫీరు బంగారాన్ని,+ 7,000 తలాంతుల మేలిమి వెండిని ఇస్తున్నాను,
5 బంగారం పని కోసం బంగారాన్ని, వెండి పని కోసం వెండిని, నైపుణ్యంగల పనివాళ్లు చేసే పనంతటి కోసం అవసరమైన వాటిని ఇస్తున్నాను. ఇప్పుడు ఈ రోజు ఎవరెవరు యెహోవాకు కానుకలు ఇవ్వాలనుకుంటున్నారు?”+
6 అప్పుడు పూర్వీకుల కుటుంబాల అధిపతులు, ఇశ్రాయేలు గోత్రాల అధిపతులు, సహస్రాధిపతులు,* శతాధిపతులు,*+ రాజు పని చూసుకునే అధిపతులు+ స్వచ్ఛందంగా ముందుకొచ్చారు.
7 వాళ్లు సత్యదేవుని మందిర సేవకోసం 5,000 తలాంతుల బంగారాన్ని, 10,000 డారిక్‌లను,* 10,000 తలాంతుల వెండిని, 18,000 తలాంతుల రాగిని, 1,00,000 తలాంతుల ఇనుమును ఇచ్చారు.
8 ఎవరి దగ్గరైతే రత్నాలు ఉన్నాయో, వాళ్లు వాటిని గెర్షోనీయుడైన+ యెహీయేలు+ సంరక్షణ కింద ఉన్న యెహోవా మందిర ఖజానాకు ఇచ్చారు.
9 ప్రజలు సంపూర్ణ హృదయంతో యెహోవాకు ఈ స్వేచ్ఛార్పణలు ఇచ్చారు కాబట్టి వాళ్లు సంతోషించారు,+ రాజైన దావీదు కూడా ఎంతో సంతోషించాడు.
10 అప్పుడు సమాజంలోని ప్రజలందరి కళ్ల ఎదుట దావీదు యెహోవాను ఇలా స్తుతించాడు: “మా తండ్రీ, ఇశ్రాయేలు దేవా, యెహోవా, నువ్వు శాశ్వతకాలం* స్తుతించబడాలి.
11 యెహోవా, గొప్పతనం,+ బలం,+ తేజస్సు, వైభవం, ఘనత+ నీకే చెందుతాయి. ఎందుకంటే ఆకాశంలో, భూమ్మీద ఉన్న ప్రతీది నీదే.+ యెహోవా, రాజ్యం నీది.+ అందరి మీద నిన్ను నువ్వు హెచ్చించుకుంటున్నావు.
12 ఐశ్వర్యాన్ని, మహిమను ఇచ్చేది నువ్వే,+ నువ్వు అన్నిటి మీద పరిపాలన చేస్తున్నావు;+ శక్తి,+ బలం+ నీ చేతిలో ఉన్నాయి, నీ చెయ్యి ఎవరినైనా గొప్ప చేయగలదు,+ అందరికీ బలాన్ని ఇవ్వగలదు.+
13 ఇప్పుడు మా దేవా, మేము నీకు కృతజ్ఞతలు చెప్తున్నాం, నీ రమ్యమైన పేరును స్తుతిస్తున్నాం.
14 “అయినా, ఇలా స్వేచ్ఛార్పణలు ఇవ్వడానికి నేను ఎంతటివాణ్ణి? నా ప్రజలు ఎంతటివాళ్లు? ఎందుకంటే అన్నీ నీ నుండే వచ్చాయి; నీ చేతి నుండి వచ్చిన వాటినే మేము నీకు ఇచ్చాం.
15 మా పూర్వీకులందరిలా మేము నీ సమక్షంలో పరదేశులం, వలసదారులం.+ భూమ్మీద మా జీవితాలు నీడలాంటివి,+ అస్థిరమైనవి.
16 మా దేవా, యెహోవా, నీ పవిత్రమైన పేరు కోసం నీకు ఒక మందిరాన్ని కట్టడానికి మేము సిద్ధం చేసిన ఈ సంపదంతా నీ చేతి నుండి వచ్చిందే, ఇదంతా నీదే.
17 నా దేవా, నువ్వు హృదయాన్ని పరిశీలిస్తావనీ,+ ఒక వ్యక్తి యథార్థతను* చూసి సంతోషిస్తావనీ+ నాకు బాగా తెలుసు. నేను నిజాయితీగల హృదయంతో వీటన్నిటినీ స్వచ్ఛందంగా ఇచ్చాను, ఇక్కడున్న నీ ప్రజలు నీకు స్వేచ్ఛార్పణలు ఇవ్వడం చూసి ఎంతో సంతోషిస్తున్నాను.
18 మా పూర్వీకులైన అబ్రాహాముకు, ఇస్సాకుకు, ఇశ్రాయేలుకు దేవా, యెహోవా, ఈ ఉద్దేశాలు, ఆలోచనలు నీ ప్రజల హృదయాల్లో ఎప్పటికీ ఉండేలా చేయి, వాళ్ల హృదయాల్ని నీ వైపుకు తిప్పుకో.+
19 నా కుమారుడైన సొలొమోను సంపూర్ణ* హృదయంతో+ నీ ఆజ్ఞల్ని, నీ జ్ఞాపికల్ని, నీ నియమాల్ని పాటించేలా+ అతనికి సహాయం చేయి. సొలొమోను వీటన్నిటినీ చేసేలా నేను దేని కోసమైతే ఏర్పాట్లు చేశానో+ ఆ ఆలయాన్ని* కట్టేలా అతనికి సహాయం చేయి.”
20 తర్వాత దావీదు సమాజంలోని వాళ్లందరితో, “ఇప్పుడు మీ దేవుడైన యెహోవాను స్తుతించండి” అని చెప్పాడు. అప్పుడు వాళ్లందరూ తమ పూర్వీకుల దేవుడైన యెహోవాను స్తుతించారు; యెహోవా ముందు, రాజు ముందు సాష్టాంగపడ్డారు.
21 వాళ్లు యెహోవాకు బలులు అర్పిస్తూ ఉన్నారు; ఆ రోజు, ఆ తర్వాతి రోజు యెహోవాకు దహనబలులు+ అర్పిస్తూ ఉన్నారు; వాళ్లు 1,000 కోడెదూడల్ని, 1,000 పొట్టేళ్లను, 1,000 మగ గొర్రెపిల్లల్ని, వాటి పానీయార్పణల్ని+ అర్పించారు. వాళ్లు ఇశ్రాయేలీయులందరి కోసం పెద్ద ఎత్తున బలులు అర్పించారు.+
22 వాళ్లు ఆ రోజు యెహోవా ఎదుట గొప్ప సంతోషంతో తింటూ, తాగుతూ ఉన్నారు;+ వాళ్లు దావీదు కుమారుడైన సొలొమోనును రెండోసారి రాజును చేసి, అతన్ని యెహోవా ఎదుట నాయకునిగా అభిషేకించారు;+ అలాగే సాదోకును యాజకునిగా అభిషేకించారు.+
23 సొలొమోను తన తండ్రైన దావీదు స్థానంలో రాజుగా యెహోవా సింహాసనం మీద కూర్చున్నాడు,+ అతను వర్ధిల్లాడు; ఇశ్రాయేలీయులందరూ అతనికి విధేయులయ్యారు.
24 అధిపతులందరూ,+ బలమైన యోధులందరూ,+ అలాగే దావీదు రాజు కుమారులందరూ+ రాజైన సొలొమోనుకు విధేయులయ్యారు.
25 యెహోవా సొలొమోనును ఇశ్రాయేలీయులందరి కళ్లముందు ఎంతో గొప్ప చేశాడు, అతనికి ముందున్న ఏ ఇశ్రాయేలు రాజుకూ లేనంత రాజరిక వైభవాన్ని సొలొమోనుకు ఇచ్చాడు.+
26 యెష్షయి కుమారుడైన దావీదు ఇశ్రాయేలు అంతటినీ పరిపాలించాడు,
27 అతను ఇశ్రాయేలు మీద పరిపాలించిన కాలం 40 సంవత్సరాలు. దావీదు హెబ్రోనులో 7 సంవత్సరాలు,+ యెరూషలేములో 33 సంవత్సరాలు పరిపాలించాడు.+
28 దావీదు దీర్ఘాయుష్షును, ఐశ్వర్యాన్ని, ఘనతను అనుభవించి మంచి ముసలితనంలో తృప్తిగా చనిపోయాడు.+ అతని స్థానంలో అతని కుమారుడు సొలొమోను రాజయ్యాడు.+
29 రాజైన దావీదు చరిత్ర మొదటినుండి చివరివరకూ, దీర్ఘదర్శి సమూయేలు, నాతాను ప్రవక్త,+ దర్శనాలు చూసే గాదు+ రాసిన పుస్తకాల్లో ఉంది.
30 వాటిలో అతని రాజరికం గురించి, అతని పరాక్రమ కార్యాల గురించి, అలాగే అతనికి, ఇశ్రాయేలుకు, చుట్టుపక్కల రాజ్యాలన్నిటికీ సంబంధించిన సంఘటనల గురించి కూడా రాయబడివుంది.
అధస్సూచీలు
^ లేదా “కోమలమైనవాడు.”
^ లేదా “కోట; భవనం.”
^ అప్పట్లో ఒక తలాంతు 34.2 కిలోలతో సమానం. అనుబంధం B14 చూడండి.
^ అంటే, 1,000 మంది మీద అధిపతులు.
^ అంటే, 100 మంది మీద అధిపతులు.
^ డారిక్‌ ఒక పారసీక బంగారు నాణెం. అనుబంధం B14 చూడండి.
^ లేదా “శాశ్వతకాలం నుండి శాశ్వతకాలం వరకు.”
^ లేదా “నిజాయితీని.”
^ లేదా “పూర్తిగా అంకితమైన.”
^ లేదా “కోటను; భవనాన్ని.”
