దినవృత్తాంతాలు రెండో గ్రంథం 20:1-37
20 తర్వాత మోయాబీయులు,+ అమ్మోనీయులు కొంతమంది అమ్మోనీమువాళ్లతో* కలిసి యెహోషాపాతుతో యుద్ధం చేయడానికి వచ్చారు.
2 అప్పుడు యెహోషాపాతుకు ఈ వార్త అందింది: “సముద్ర* ప్రాంతం నుండి, ఎదోము+ నుండి ఒక పెద్ద సమూహం నీ మీదికి వచ్చింది; వాళ్లు హససోన్‌-తామారులో, అంటే ఏన్గెదీలో ఉన్నారు.”
3 అది విని యెహోషాపాతు భయపడి యెహోవాను వెదకాలని నిశ్చయించుకున్నాడు.+ కాబట్టి ఉపవాసం ఉండమని యూదా అంతటా చాటించాడు.
4 అప్పుడు యూదా ప్రజలు యెహోవా దగ్గర విచారణ చేయడానికి సమకూడారు;+ యెహోవా నిర్దేశం అడగడానికి వాళ్లు యూదా నగరాలన్నిటి నుండి వచ్చారు.
5 అప్పుడు యెహోషాపాతు యెహోవా మందిరంలో కొత్త ప్రాంగణం ఎదుట యూదా, యెరూషలేము సమాజం మధ్యలో నిలబడి,
6 ఇలా ప్రార్థించాడు:
“మా పూర్వీకుల దేవా, యెహోవా, నువ్వు మాత్రమే పరలోకంలో దేవుడివి.+ నీకు దేశాల రాజ్యాలన్నిటి మీద ఆధిపత్యం ఉంది.+ నీ చేతిలో శక్తి, బలం ఉన్నాయి, నీకు వ్యతిరేకంగా ఎవ్వరూ నిలబడలేరు.+
7 మా దేవా, నువ్వు నీ ప్రజలైన ఇశ్రాయేలీయుల ఎదుట నుండి ఈ దేశ నివాసుల్ని వెళ్లగొట్టి, నీ స్నేహితుడైన అబ్రాహాము+ సంతానానికి* దాన్ని శాశ్వత ఆస్తిగా ఇచ్చావు.
8 వాళ్లు దానిలో స్థిరపడి నీ పేరు కోసం అక్కడ ఒక పవిత్రమైన స్థలాన్ని కట్టారు,+ వాళ్లు ఇలా అన్నారు,
9 ‘కత్తి వల్లో, శిక్ష వల్లో, తెగులు వల్లో, కరువు వల్లో మా మీదికి విపత్తు వస్తే, మేము ఈ మందిరం ఎదుట, నీ ఎదుట నిలబడి (ఎందుకంటే, నువ్వు నీ పేరు కోసం ఈ మందిరాన్ని ఎంచుకున్నావు) కష్టాల్లో మాకు సహాయం చేయమని ప్రార్థించినప్పుడు, నువ్వు మా ప్రార్థన విని మమ్మల్ని రక్షించాలి.’+
10 ఇదిగో అమ్మోను, మోయాబు, శేయీరు పర్వత ప్రాంతం వాళ్లు+ ఏమి చేస్తున్నారో చూడు. ఐగుప్తు దేశం నుండి బయటికి వచ్చేటప్పుడు నువ్వు ఇశ్రాయేలీయుల్ని వాళ్ల మీద దండెత్తనివ్వలేదు. ఇశ్రాయేలీయులు వాళ్లను పూర్తిగా నాశనం చేయకుండా వాళ్ల దగ్గర నుండి వెళ్లిపోయారు.+
11 ఇప్పుడు వాళ్లు మాకు ఇలా ప్రతిఫలం ఇస్తున్నారు, నువ్వు మాకు వారసత్వంగా ఇచ్చిన నీ దేశం నుండి మమ్మల్ని వెళ్లగొట్టడానికి వస్తున్నారు.+
12 మా దేవా, నువ్వు వాళ్లను శిక్షించవా?+ మా మీదికి వస్తున్న ఈ పెద్ద సమూహాన్ని ఎదిరించడానికి మా శక్తి చాలదు; ఏమి చేయాలో మాకు తెలియట్లేదు,+ మా కళ్లు నీ వైపే చూస్తున్నాయి.”+
13 ఆ సమయంలో, యూదావాళ్లందరూ తమ భార్యలతో, పిల్లలతో,* పసి పిల్లలతో యెహోవా ఎదుట నిలబడివున్నారు.
14 అప్పుడు యెహోవా పవిత్రశక్తి సమాజం మధ్యలో ఉన్న యహజీయేలు మీదికి వచ్చింది; యహజీయేలు జెకర్యా కుమారుడు, జెకర్యా బెనాయా కుమారుడు, బెనాయా యెహీయేలు కుమారుడు, యెహీయేలు లేవీయుడైన మత్తన్యా కుమారుడు, మత్తన్యా ఆసాపు వంశస్థుడు.
15 అతను ఇలా అన్నాడు: “యూదా ప్రజలారా, యెరూషలేము నివాసులారా, యెహోషాపాతు రాజా, మీరందరూ జాగ్రత్తగా వినండి! యెహోవా చెప్తున్నదేమిటంటే, ‘ఈ పెద్ద సమూహాన్ని చూసి మీరు భయపడకండి, బెదిరిపోకండి; ఎందుకంటే యుద్ధం మీది కాదు, దేవునిది.+
16 రేపు వాళ్ల మీదికి వెళ్లండి. వాళ్లు జీజు కనుమ దారిలో వస్తారు; మీరు వాళ్లను యెరూవేలు ఎడారి ఎదుట ఉన్న లోయ* చివర్లో చూస్తారు.
17 ఈ యుద్ధంలో మీరు పోరాడాల్సిన అవసరం లేదు. మీరు మీ స్థానాల్లో స్థిరంగా నిలబడి,+ యెహోవా ఇచ్చే రక్షణను చూడండి.*+ యూదా, యెరూషలేమా, భయపడకండి, బెదిరిపోకండి.+ రేపు వాళ్ల మీదికి వెళ్లండి, యెహోవా మీకు తోడుగా ఉంటాడు.’ ”+
18 వెంటనే యెహోషాపాతు నేలమీద సాష్టాంగపడ్డాడు; యూదావాళ్లందరూ, యెరూషలేము నివాసులందరూ యెహోవా ఎదుట సాష్టాంగపడి, యెహోవాను ఆరాధించారు.
19 అప్పుడు కహాతు,+ కోరహు వంశస్థులైన లేవీయులు లేచి ఇశ్రాయేలు దేవుడైన యెహోవాను పెద్ద స్వరంతో స్తుతించారు.+
20 వాళ్లు తర్వాతి రోజు ఉదయాన్నే లేచి తెకోవ+ ఎడారికి వెళ్లారు. వాళ్లు వెళ్తుండగా, యెహోషాపాతు లేచి నిలబడి ఇలా అన్నాడు: “యూదా ప్రజలారా, యెరూషలేము నివాసులారా, నేను చెప్పేది వినండి! మీ దేవుడైన యెహోవా మీద విశ్వాసముంచండి, అప్పుడు మీరు స్థిరంగా నిలబడగలుగుతారు.* ఆయన ప్రవక్తల మీద విశ్వాసముంచండి,+ అప్పుడు మీరు విజయం సాధిస్తారు.”
21 యెహోషాపాతు ప్రజల్ని సంప్రదించిన తర్వాత, యెహోవాకు పాటలు పాడడానికి, పవిత్రమైన బట్టలు ధరించి స్తుతించడానికి మనుషుల్ని నియమించాడు.+ వాళ్లు సైనికుల ముందు నడుస్తూ, “యెహోవాకు కృతజ్ఞతలు చెల్లించండి, ఎందుకంటే ఆయన విశ్వసనీయ ప్రేమ ఎప్పటికీ ఉంటుంది”+ అని పాడాలి.
22 వాళ్లు ఆనందంగా స్తుతులు పాడడం మొదలుపెట్టినప్పుడు, యెహోవా యూదా మీద దండెత్తిన అమ్మోను, మోయాబు, శేయీరు పర్వత ప్రాంతంవాళ్ల మీద మాటు వేయించాడు. దాంతో వాళ్లు ఒకరినొకరు చంపుకున్నారు.+
23 అమ్మోనీయులు, మోయాబీయులు శేయీరు పర్వత+ ప్రాంతంవాళ్ల మీద దాడిచేసి, వాళ్లను నిర్మూలించారు; వాళ్లు శేయీరు నివాసుల్ని నాశనం చేసిన తర్వాత, ఒకరినొకరు చంపుకున్నారు.+
24 యూదావాళ్లు ఎడారిలోని+ కావలిబురుజు దగ్గరికి వచ్చి ఆ సమూహం వైపు చూసినప్పుడు, వాళ్లకు అక్కడ నేలమీద పడివున్న వాళ్ల శవాలు కనిపించాయి;+ వాళ్లలో ఎవ్వరూ మిగల్లేదు.
25 దాంతో యెహోషాపాతు, అతని ప్రజలు వాళ్ల దగ్గర నుండి దోపుడుసొమ్ము తీసుకోవడానికి వచ్చారు. అక్కడ వాళ్లకు విస్తారంగా వస్తువులు, బట్టలు, అమూల్యమైన వస్తువులు కనిపించాయి. వాళ్లు ఆ శవాల మీద నుండి వాటిని తీసుకున్నారు. వాళ్లు ఇక మోయలేనంత వరకు వాటిని తీసుకున్నారు.+ ఆ దోపుడుసొమ్ము చాలా ఉండడంతో వాటిని తీసుకెళ్లడానికి మూడు రోజులు పట్టింది.
26 నాలుగో రోజున వాళ్లు బెరాకా లోయ దగ్గర సమావేశమై యెహోవాను స్తుతించారు.* అందుకే ఆ స్థలానికి వాళ్లు బెరాకా* లోయ అని పేరు పెట్టారు.+ ఈ రోజు వరకు దానికి ఆ పేరే ఉంది.
27 తర్వాత, యెహోవా తమ శత్రువుల మీద తమకు విజయాన్ని ఇచ్చినందుకు యూదా, యెరూషలేము మనుషులందరూ సంతోషంగా+ యెరూషలేముకు తిరిగొచ్చారు; యెహోషాపాతు వాళ్ల ముందు నడిచాడు.
28 వాళ్లు తంతివాద్యాలు, వీణలు,*+ బాకాలు+ వాయిస్తూ యెరూషలేముకు వచ్చి, యెహోవా మందిరానికి+ వెళ్లారు.
29 యెహోవా ఇశ్రాయేలు శత్రువులతో పోరాడాడని అన్ని రాజ్యాల వాళ్లు విన్నప్పుడు దేవుని భయం వాళ్లను ఆవరించింది.+
30 అలా యెహోషాపాతు రాజ్యం ప్రశాంతంగా ఉంది, అతని దేవుడు అతనికి అన్నివైపులా విశ్రాంతి ఇచ్చాడు.+
31 యెహోషాపాతు యూదాను పరిపాలిస్తూ ఉన్నాడు. రాజైనప్పుడు అతని వయసు 35 ఏళ్లు, అతను యెరూషలేములో 25 సంవత్సరాలు పరిపాలించాడు. అతని తల్లి పేరు అజూబా, ఆమె షిల్హీ కూతురు.+
32 యెహోషాపాతు తన తండ్రి ఆసా మార్గంలోనే+ నడుస్తూ వచ్చాడు, అతను దాని నుండి పక్కకు మళ్లలేదు; అతను యెహోవా దృష్టికి సరైనది చేశాడు.+
33 అయితే, ఉన్నత స్థలాలు మాత్రం తీసేయబడలేదు,+ ప్రజలు తమ పూర్వీకుల దేవుడి కోసం తమ హృదయాల్ని ఇంకా సిద్ధం చేసుకోలేదు.+
34 యెహోషాపాతు మిగతా చరిత్ర మొదటి నుండి చివరి వరకు, హనానీ+ కుమారుడైన యెహూ+ రాసిన పుస్తకంలో ఉంది. ఆ విషయాలు ఇశ్రాయేలు రాజుల గ్రంథంలో చేర్చబడ్డాయి.
35 తర్వాత యూదా రాజైన యెహోషాపాతు ఇశ్రాయేలు రాజైన అహజ్యాతో చేతులు కలిపాడు, ఈ అహజ్యా చాలా చెడ్డగా ప్రవర్తించాడు.+
36 తర్షీషుకు వెళ్లే నౌకల్ని+ నిర్మించడానికి యెహోషాపాతు అతనితో చేతులు కలిపాడు, వాళ్లు ఎసోన్గెబెరులో+ నౌకల్ని నిర్మించారు.
37 అయితే మారేషాకు చెందిన దోదావాహు కుమారుడైన ఎలీయెజెరు యెహోషాపాతుకు వ్యతిరేకంగా ప్రవచిస్తూ, “నువ్వు అహజ్యాతో చేతులు కలిపావు కాబట్టి, యెహోవా నీ పనిని నాశనం చేస్తాడు”+ అని చెప్పాడు. కాబట్టి ఆ నౌకలు బద్దలైపోయాయి,+ అవి తర్షీషుకు వెళ్లలేకపోయాయి.
అధస్సూచీలు
^ లేదా “మెయోనీయులతో” అయ్యుంటుంది.
^ మృత సముద్రం అని స్పష్టమౌతోంది.
^ అక్ష., “విత్తనానికి.”
^ అక్ష., “కుమారులతో.”
^ లేదా “వాగు.”
^ లేదా “యెహోవా మిమ్మల్ని ఎలా రక్షిస్తాడో చూడండి.”
^ లేదా “సహించగలుగుతారు.”
^ అక్ష., “దీవించారు.”
^ “దీవెన” అని అర్థం.
^ ఇది ప్రాచీనకాల తంతివాద్యం; ఇప్పటి వీణలాంటిది కాదు.
