రాజులు రెండో గ్రంథం 21:1-26
21 మనష్షే+ రాజైనప్పుడు అతనికి 12 ఏళ్లు. అతను యెరూషలేములో 55 సంవత్సరాలు పరిపాలించాడు. అతని తల్లి పేరు హెఫ్సిబా.
2 అతను ఇశ్రాయేలు ప్రజల ఎదుట నుండి యెహోవా వెళ్లగొట్టిన దేశాల అసహ్యమైన ఆచారాలు పాటిస్తూ యెహోవా దృష్టికి చెడు చేశాడు.+
3 అతను తన తండ్రి హిజ్కియా నాశనం చేసిన ఉన్నత స్థలాల్ని+ మళ్లీ కట్టించాడు. అతను ఇశ్రాయేలు రాజైన అహాబులా బయలుకు బలిపీఠాలు కట్టించాడు, ఒక పూజా కర్రను* కూడా చేయించాడు.+ అతను ఆకాశ సైన్యమంతటికీ మొక్కి వాటిని సేవించాడు.+
4 యెహోవా ఏ మందిరం గురించైతే, “యెరూషలేములో నా పేరు ఉంచుతాను”+ అని అన్నాడో, ఆ యెహోవా మందిరంలో అతను బలిపీఠాల్ని కూడా కట్టించాడు.
5 యెహోవా మందిరంలోని రెండు ప్రాంగణాల్లో+ అతను ఆకాశ సైన్యమంతటికీ+ బలిపీఠాలు కట్టించాడు.
6 అతను తన సొంత కుమారుణ్ణి అగ్నిలో వేసి కాల్చాడు;* ఇంద్రజాలం చేశాడు, శకునాలు చూశాడు, చనిపోయినవాళ్లను సంప్రదించేవాళ్లను, భవిష్యత్తు చెప్పేవాళ్లను నియమించాడు.+ అతను యెహోవా దృష్టిలో విపరీతంగా చెడ్డపనులు చేసి ఆయనకు కోపం తెప్పించాడు.
7 మనష్షే తాను చేయించిన పూజా కర్ర*+ విగ్రహాన్ని* మందిరంలో పెట్టించాడు. ఆ మందిరం గురించే యెహోవా దావీదుతో, అతని కుమారుడైన సొలొమోనుతో ఇలా అన్నాడు: “నేను ఈ మందిరంలో, అలాగే ఇశ్రాయేలు గోత్రాలన్నిట్లో నుండి నేను ఎంచుకున్న యెరూషలేములో నా పేరును శాశ్వతంగా ఉంచుతాను.
8 ఇశ్రాయేలీయులు నేను వాళ్లకు ఆజ్ఞాపించిన వాటన్నిటినీ, వాళ్లు పాటించాలని నా సేవకుడైన మోషే ఆజ్ఞాపించిన ధర్మశాస్త్రమంతటినీ జాగ్రత్తగా పాటిస్తే, వాళ్ల పూర్వీకులకు నేను ఇచ్చిన దేశం నుండి వాళ్లు ఎప్పటికీ అటూఇటూ వెళ్లరు.”+
9 అయితే ఇశ్రాయేలీయులు దేవుని మాటకు లోబడలేదు; మనష్షే వాళ్లను తప్పుదారిలో నడిపిస్తూ, ఇశ్రాయేలీయుల ఎదుట నుండి యెహోవా నిర్మూలించిన దేశాల+ ప్రజల కన్నా ఎక్కువ చెడ్డపనులు వాళ్లతో చేయించాడు.
10 యెహోవా తన సేవకులైన ప్రవక్తల ద్వారా ఇలా చెప్తూ వచ్చాడు:+
11 “యూదా రాజైన మనష్షే ఈ అసహ్యమైన పనులన్నీ చేశాడు; అతను తనకు ముందున్న అమోరీయులందరి+ కన్నా చెడ్డగా ప్రవర్తించి,+ అసహ్యమైన తన విగ్రహాలతో* యూదావాళ్లు పాపం చేయడానికి కారకుడయ్యాడు.
12 అందుకే ఇశ్రాయేలు దేవుడైన యెహోవా చెప్పేదేమిటంటే: ‘ఇదిగో! నేను యెరూషలేము మీద, యూదా మీద ఎలాంటి విపత్తు తీసుకురాబోతున్నానంటే, దాని గురించి వినే వాళ్లెవరికైనా రెండు చెవులు గింగురుమంటాయి.+
13 నేను సమరయను కొలిచిన కొలనూలుతోనే+ యెరూషలేమును కొలుస్తాను,+ అహాబు ఇంటికి ఉపయోగించిన లంబసూత్రాన్నే* ఉపయోగిస్తాను.+ ఒక వ్యక్తి గిన్నెను కడిగి, తుడిచి, బోర్లించినట్టు నేను యెరూషలేమును శుభ్రంగా తుడిచేస్తాను.+
14 నేను నా స్వాస్థ్యంలో మిగిలినవాళ్లను విడిచిపెట్టేస్తాను, వాళ్లను తమ శత్రువుల చేతికి అప్పగిస్తాను. వాళ్ల శత్రువులందరూ వాళ్లను బందీలుగా తీసుకెళ్తారు, వాళ్లను దోచుకుంటారు,+
15 ఎందుకంటే వాళ్ల పూర్వీకులు ఐగుప్తు నుండి బయటికి వచ్చిన రోజు నుండి ఈ రోజు వరకు నా దృష్టిలో చెడ్డపనులు చేస్తూ, నాకు కోపం తెప్పిస్తూ ఉన్నారు.’ ”+
16 యూదావాళ్లు యెహోవా దృష్టికి చెడుగా ప్రవర్తించి పాపం చేయడానికి మనష్షే కారకుడయ్యాడు. అంతేకాదు అతను, పెద్ద ఎత్తున అమాయకుల రక్తాన్ని చిందించి యెరూషలేమును ఈ చివర నుండి ఆ చివర వరకు రక్తంతో నింపేశాడు.+
17 మనష్షే మిగతా చరిత్ర, అంటే అతను చేసిన అన్ని పనులు, అతను చేసిన పాపాలు యూదా రాజుల చరిత్ర గ్రంథంలో రాయబడివున్నాయి.
18 తర్వాత మనష్షే చనిపోయాడు,* అతన్ని తన రాజభవన తోటలో, అంటే ఉజ్జా తోటలో పాతిపెట్టారు;+ అతని స్థానంలో అతని కుమారుడు ఆమోను రాజయ్యాడు.
19 ఆమోను+ రాజైనప్పుడు అతని వయసు 22 ఏళ్లు; అతను యెరూషలేములో రెండు సంవత్సరాలు పరిపాలించాడు.+ అతని తల్లి పేరు మెషుల్లెమెతు. ఆమె యొట్బకు చెందిన హారూసు కూతురు.
20 అతను తన తండ్రి మనష్షేలాగే యెహోవా దృష్టికి చెడు చేస్తూ వచ్చాడు.+
21 ఆమోను తన తండ్రి నడిచిన మార్గాలన్నిట్లో నడుస్తూ వచ్చాడు. అతను తన తండ్రి సేవించిన అసహ్యమైన విగ్రహాల్నే సేవిస్తూ, వాటికి మొక్కుతూ ఉన్నాడు.+
22 అలా ఆమోను తన పూర్వీకుల దేవుడైన యెహోవాను విడిచిపెట్టాడు; అతను యెహోవా మార్గంలో నడవలేదు.+
23 కొంతకాలం తర్వాత ఆమోను సేవకులు అతని మీద కుట్రపన్ని, అతన్ని తన ఇంట్లోనే చంపారు.
24 అయితే, దేశ ప్రజలు ఆమోను రాజు మీద కుట్రపన్నిన వాళ్లందర్నీ చంపి, అతని స్థానంలో అతని కుమారుడైన యోషీయాను రాజును చేశారు.+
25 ఆమోను మిగతా చరిత్ర, అంటే అతను చేసిన పనులు యూదా రాజుల చరిత్ర గ్రంథంలో రాయబడివున్నాయి.
26 ఆమోనును ఉజ్జా తోటలో ఉన్న అతని సమాధిలో పాతిపెట్టారు.+ అతని స్థానంలో అతని కుమారుడు యోషీయా+ రాజయ్యాడు.
అధస్సూచీలు
^ అక్ష., “అగ్ని గుండా దాటించాడు.”
^ లేదా “చెక్కుడు విగ్రహాన్ని.”
^ ఇక్కడ ఉపయోగించిన హీబ్రూ పదం పేడకు సంబంధించినది. తిరస్కార భావాన్ని వ్యక్తం చేసేందుకు దాన్ని వాడతారు.
^ లేదా “మట్టపుగుండునే.”
^ అక్ష., “తన పూర్వీకులతో నిద్రించాడు.”
