సమూయేలు రెండో గ్రంథం 16:1-23
16 దావీదు కొండశిఖరం+ అవతల కొంచెం దూరం వెళ్లిన తర్వాత, మెఫీబోషెతు+ సేవకుడైన సీబా+ జీను* వేసిన రెండు గాడిదల్ని తీసుకొని దావీదును కలవడానికి వచ్చాడు. వాటిమీద 200 రొట్టెలు, 100 ఎండుద్రాక్ష రొట్టెలు, 100 వేసవికాల పండ్ల* రొట్టెలు, ఒక పెద్ద కుండలో ద్రాక్షారసం ఉన్నాయి.+
2 అప్పుడు రాజు సీబాతో, “నువ్వు వీటిని ఎందుకు తెచ్చావు?” అన్నాడు. దానికి సీబా, “గాడిదలు రాజు ఇంటివాళ్లు ఎక్కడానికి, రొట్టెలూ వేసవికాల పండ్లూ యువకులు తినడానికి, ద్రాక్షారసం ఎడారిలో అలసిపోయేవాళ్లు తాగడానికి తీసుకొచ్చాను” అన్నాడు.+
3 అప్పుడు రాజు, “నీ యజమాని కుమారుడు* ఎక్కడ?”+ అని అడిగాడు. దానికి సీబా రాజుతో, “ ‘ఈ రోజు ఇశ్రాయేలు ఇంటివాళ్లు మా తాత రాజ్యాన్ని నాకు తిరిగిస్తారు’ అని అంటూ అతను యెరూషలేములోనే ఉండిపోయాడు”+ అన్నాడు.
4 అప్పుడు రాజు సీబాతో, “ఇదిగో! మెఫీబోషెతుకు చెందినవన్నీ నీవి”+ అన్నాడు. అందుకు సీబా, “నేను నీ ముందు సాష్టాంగపడుతున్నాను. నా ప్రభువైన రాజా, నేను నీ దృష్టిలో దయ పొందాలి”+ అన్నాడు.
5 దావీదు రాజు బహూరీముకు చేరుకున్నప్పుడు, సౌలు కుటుంబానికి చెందిన గెరా కుమారుడైన షిమీ+ అనే వ్యక్తి దావీదు వైపు వస్తూ గట్టిగా శాపనార్థాలు పెడుతున్నాడు.+
6 అతను దావీదు మీద, రాజు సేవకులందరి మీద, అలాగే దావీదు కుడివైపు ఎడమవైపు ఉన్న ప్రజలందరి మీద, యోధుల మీద రాళ్లు రువ్వుతూ ఉన్నాడు.
7 షిమీ శాపనార్థాలు పెడుతూ ఇలా అన్నాడు: “నరహంతకుడా! పనికిమాలినవాడా! పో, వెళ్లిపో.
8 నువ్వు ఎవరి స్థానంలో రాజుగా పరిపాలించావో ఆ సౌలు ఇంటివాళ్ల రక్తాపరాధం అంతటినీ యెహోవా నీ మీదికి తీసుకొచ్చాడు; అయితే యెహోవా రాజరికాన్ని నీ కుమారుడైన అబ్షాలోము చేతికి అప్పగించాడు. నువ్వు నరహంతకుడివి కాబట్టే నీ మీదికి విపత్తు వచ్చింది!”+
9 అప్పుడు సెరూయా కుమారుడైన అబీషై రాజుతో,+ “ఈ చచ్చిన కుక్క+ నా ప్రభువైన రాజును శపించడమా?+ దయచేసి నన్ను వెళ్లనివ్వు, వాడి తల నరికేస్తాను”+ అన్నాడు.
10 కానీ రాజు ఇలా అన్నాడు: “సెరూయా కుమారులారా, నాతో మీకేంటి?+ అతన్ని శపించనివ్వండి;+ ‘దావీదును శపించు!’ అని యెహోవా అతనికి చెప్పాడు.+ కాబట్టి, ‘నువ్వు ఎందుకిలా చేస్తున్నావు?’ అని అతన్ని ఎవరు అడగగలరు?”
11 తర్వాత దావీదు అబీషైతో, తన సేవకులందరితో ఇలా అన్నాడు: “నేను కన్న నా సొంత కుమారుడే నా ప్రాణం తీయాలని చూస్తున్నాడు,+ అలాంటిది ఒక బెన్యామీనీయుడి+ నుండి నేను ఇంతకన్నా ఏం ఆశించాలి! అతన్ని వదిలేయండి, అతన్ని శపించనివ్వండి. ఎందుకంటే యెహోవాయే అలా చేయమని అతనికి చెప్పాడు!
12 యెహోవా బహుశా నా బాధను చూస్తాడేమో,+ షిమీ శాపనార్థాలకు బదులుగా యెహోవా నాకు దీవెనలు ఇస్తాడేమో.”*+
13 అప్పుడు దావీదు, అతని మనుషులు దారిలో ముందుకు వెళ్తూ ఉంటే, షిమీ దావీదుకు పక్కనున్న కొండమీద నడుస్తూ శాపనార్థాలు పెడుతూ,+ రాళ్లు రువ్వుతూ, చాలా దుమ్ము ఎత్తి పోస్తూ ఉన్నాడు.
14 చాలాసేపటి తర్వాత దావీదు, అతనితో ఉన్న మనుషులందరూ బాగా అలసిపోయి గమ్యస్థానం చేరుకున్నారు. వాళ్లు అక్కడ సేదదీరారు.
15 ఈలోగా అబ్షాలోము, ఇశ్రాయేలీయులందరూ యెరూషలేముకు చేరుకున్నారు, అహీతోపెలు+ అతనితోపాటే ఉన్నాడు.
16 దావీదు స్నేహితుడూ* అర్కీయుడూ+ అయిన హూషై+ అబ్షాలోము దగ్గరికి వచ్చి అతనితో, “రాజు దీర్ఘకాలం జీవించాలి!+ రాజు దీర్ఘకాలం జీవించాలి!” అన్నాడు.
17 అప్పుడు అబ్షాలోము హూషైను, “నీ స్నేహితుని మీద నువ్వు చూపించే విశ్వసనీయ ప్రేమ ఇదేనా? నీ స్నేహితునితోపాటు నువ్వెందుకు వెళ్లలేదు?” అని అడిగాడు.
18 అందుకు హూషై అబ్షాలోముతో ఇలా అన్నాడు: “లేదు. యెహోవా, ఈ ప్రజలు, అలాగే ఇశ్రాయేలు వాళ్లందరూ ఎవర్ని ఎంచుకున్నారో అతని వైపే నేను ఉంటాను. నేను అతనితోపాటే ఉంటాను.
19 నేను మళ్లీ చెప్తున్నాను, నేను ఎవర్ని సేవించాలి? అతని కుమారుణ్ణి కాదా? నేను నీ తండ్రికి సేవ చేసినట్టే నీకూ సేవ చేస్తాను.”+
20 తర్వాత అబ్షాలోము అహీతోపెలును, “నీ సలహా* చెప్పు.+ మనం ఏమి చేయాలి?” అని అడిగాడు.
21 దానికి అహీతోపెలు అబ్షాలోముకు ఇలా చెప్పాడు: “రాజభవనాన్ని చూసుకోవడానికి నీ తండ్రి ఉంచి వెళ్లిన అతని ఉపపత్నులతో+ సంబంధం పెట్టుకో.+ నువ్వు ఇలా చేసి నీ తండ్రిని అవమానించావని ఇశ్రాయేలీయులందరూ వింటారు, అప్పుడు నీకు మద్దతు ఇచ్చేవాళ్లు ధైర్యం తెచ్చుకుంటారు.”
22 దాంతో వాళ్లు అబ్షాలోము కోసం మిద్దె+ మీద ఒక డేరా వేశారు, అతను ఇశ్రాయేలీయులందరి కళ్లముందు తన తండ్రి ఉపపత్నులతో సంబంధం పెట్టుకున్నాడు.+
23 ఆ రోజుల్లో అహీతోపెలు ఇచ్చే సలహాను+ సత్యదేవుని నుండి వచ్చే మాటగా ఎంచేవాళ్లు. అహీతోపెలు ఇచ్చే సలహాలన్నిటినీ దావీదు, అబ్షాలోము ఇద్దరూ అలాగే పరిగణించేవాళ్లు.
అధస్సూచీలు
^ ముఖ్యంగా అంజూర పండ్లు, బహుశా ఖర్జూర పండ్లు కూడా.
^ ఇది జంతువు మీద కూర్చోవడానికి దాని వీపు మీద వేసేది.
^ లేదా “మనవడు.”
^ లేదా “మళ్లీ మంచి చేస్తాడేమో.”
^ లేదా “ఆంతరంగికుడూ.”
^ లేదా “ఆలోచన.”
