2020, అక్టోబరు 25 ఆదివారం రోజున, కొత్త లోక అనువాదం బైబిలు మూడు భారతీయ భాషలైన గుజరాతీ, కన్నడ, పంజాబీలో విడుదలైంది. ముందే రికార్డు చేసిన ప్రసంగాల ద్వారా ఈ బైబిళ్లను ఎలక్ట్రానిక్‌ రూపంలో విడుదల చేశారు. ఇంట్లో నుండే సహోదర సహోదరీలందరూ ఆ కార్యక్రమాన్ని చూశారు. కార్యక్రమం అయిన వెంటనే, ప్రచారకులు బైబిల్ని వాళ్ల సొంత భాషలో డౌన్‌లోడ్‌ చేసుకోగలిగారు.

ప్రపంచవ్యాప్తంగా సుమారు 6 కోట్ల కంటే ఎక్కువమంది గుజరాతీ మాట్లాడతారు.

ఆరుగురు సహోదర సహోదరీలు రెండు టీమ్‌లుగా పనిచేసి, ఏడు సంవత్సరాల్లో బైబిల్ని అనువదించడం పూర్తిచేశారు. ఆ టీమ్‌లో పనిచేసిన సహోదరి ఏం చెప్పిందంటే: “బైబిలు విడుదలైనప్పుడు మాకు ఎంత సంతోషంగా అనిపించిందో మాటల్లో చెప్పలేం. దీనిలో ఉన్న భాష చిన్నపిల్లలకు కూడా చాలా తేలికగా అర్థమౌతుంది.”

ఆ టీమ్‌లో పనిచేసిన మరో సహోదరి ఇలా అంటుంది: “మూలప్రతుల్లో ఎక్కడెక్కడైతే యెహోవా పేరు కనిపిస్తుందో, ఈ బైబిల్లో కూడా సరిగ్గా అక్కడే దాన్ని పెట్టారు. సహోదర సహోదరీలు వ్యక్తిగత అధ్యయనంలో ఈ బైబిల్ని ఉపయోగించినప్పుడు, వాళ్ల విశ్వాసం తప్పకుండా బలపడుతుంది.”

ఈ అనువాదం అర్థం చేసుకోవడానికి చాలా తేలిగ్గా ఉంటుంది కాబట్టి, చదివేవాళ్లు దీన్నుండి పూర్తి ప్రయోజనం పొందుతారని మేం నమ్ముతున్నాం. ‘సాత్వికులు’ యెహోవా గురించి తెలుసుకోవడానికి ఇది ఖచ్చితంగా సహాయం చేస్తుంది.—కీర్తన 25:9.

కన్నడ భాషలో మాట్లాడే విధానానికి, రాసే విధానానికి చాలా తేడా ఉంటుంది. దీన్ని ఒక్కో ప్రాంతంలో ఒక్కోలా మాట్లాడతారు. అందుకే సరళమైన, సహజమైన పదాలను ఉపయోగిస్తూ, అన్ని ప్రాంతాల వాళ్లకు అర్థమయ్యేలా బైబిల్లోని సందేశాన్ని ఉన్నది ఉన్నట్టుగా అనువదించడం చాలా కష్టమైంది.

ఈ అనువాదాన్ని పూర్తి చేయడానికి ఏడు కన్నా ఎక్కువ సంవత్సరాలు పట్టింది. మొత్తం పదిమంది అనువాదకులు కలిసి పనిచేశారు. వాళ్లలో ఒక సహోదరి ఏమంటుందంటే: “కోవిడ్‌ కారణంగా 2021 వరకు ఈ బైబిలు విడుదలవ్వదని అనుకున్నాను. కానీ అది విడుదలవ్వడం చూసినప్పుడు, యెహోవా పనిని ఏదీ ఆపలేదని రుజువైంది.”

ఆ టీమ్‌లో పనిచేసిన మరో సహోదరుడు ఇలా అన్నాడు: “కన్నడ భాష మాట్లాడే ప్రజలు ఇకనుండి యెహోవా మాటల్ని వాడుక భాషలో చదవగలుగుతారు. యెహోవా పేరు ఎక్కడెక్కడ ఉండాలో అక్కడక్కడ దాన్ని తిరిగి చేర్చిన ఈ బైబిల్ని వాళ్లు చదవగలుగుతారు. ఇదంతా చూసినప్పుడు చాలా సంతోషంగా ఉంది.”

ఇండియా బ్రాంచి క్షేత్రంలో ఉన్న 2,800 కన్నా ఎక్కువమంది కన్నడ భాష మాట్లాడే సహోదర సహోదరీలకు ఈ అనువాదం తప్పకుండా సహాయం చేస్తుందని మేం నమ్ముతున్నాం. ఇంకా ప్రపంచవ్యాప్తంగా 4 కోట్ల కన్నా ఎక్కువమంది కన్నడ భాష మాట్లాడే ప్రజలకు, ‘దేవుని ఔదార్యం, తెలివి, జ్ఞానం ఎంత లోతైనవో’ అర్థం చేసుకోవడానికి కూడా ఇది ఎంతో సహాయం చేస్తుంది.—రోమీయులు 11:33.

కొత్త లోక అనువాదం బైబిల్ని పంజాబీలో అనువదించడానికి ఆరుగురు అనువాదకులు పనిచేశారు. ఈ ప్రాజెక్ట్‌ని పూర్తి చేయడానికి మొత్తం 12 సంవత్సరాలు పట్టింది. ఇండియాలో అలాగే ప్రపంచవ్యాప్తంగా 10 కోట్ల కన్నా ఎక్కువమంది పంజాబీ భాష మాట్లాడే ప్రజలకు ఈ అనువాదం ఎంతో సహాయం చేస్తుంది.

ఆ టీమ్‌లో పనిచేసిన ఒక సహోదరి ఏమంటుందంటే: “ఈ ప్రాజెక్ట్‌లో మేం చేయగలిగినదంతా చేశాం. కానీ యెహోవా సహాయంతోనే పూర్తి చేయగలిగాం. ఈ బైబిలు చదివినప్పుడు మన సహోదర సహోదరీల విశ్వాసం బలపడుతుంది, ఆందోళన తగ్గుతుంది. రాబోయే శ్రమల్ని తట్టుకోవడానికి కావాల్సిన బలాన్ని కూడా వాళ్లకు ఇస్తుంది.”

ఇంకొక అనువాదకుడు ఏమంటున్నాడంటే: “మంచి మనసున్నవాళ్లు ఈ బైబిల్ని, ముఖ్యంగా కీర్తనలు లాంటి పుస్తకాల్ని చదవడాన్ని ఆనందిస్తారు. ఈ బైబిల్లో పరిశోధన చేయడానికి ఉపయోగపడే కొన్ని మార్గాలు కూడా ఉన్నాయి.”

ఈ సహోదరుల్లాగే, మేం కూడా యెహోవా చేసిన ‘ఎన్నో లెక్కించలేనన్ని అద్భుతమైన పనులకు’ కృతజ్ఞతలు చెప్తాం.—కీర్తన 40:5.