•  Akiro Nuepukorete 2

•  Abar Naejai Toma Akirot Naka Edeke 3-5

  •  Einer 3

  •  Abar Nakomoyo 4

  •  Aisiom Ebaibuli 5

•  Aitojokaar Alimonokinikon 6-14

  •  Aitegear Einer 7

  •  Atupakin 8

  •  Aituluor Itunga Ikesisiak 9

  •  Aitetem Nuiyuunit Ijo 10

  •  Einer 11

  •  Nuejaasi 12

  •  Epone Loejaar 13

  •  Aitwasam Ibidion Keda Iitabon 14

•  Aijar Kwape Ikristayon 15-16

  •  Aisisia Ebaibuli Kwape Atukot 16

•  Akiro Nuengetakinete 17

•  Aisiyalamikin Keda Aicor 18

•  Aidar Apak 19

•  Apejo Naka Ekaanyanaran 20

•  Esabiiti Loka Atukonokin Naka Aanyanaret Arai bo Nakapolon 21

•  Esabiiti Loka Aiitun Atwanare Naka Yesu 22

•  Onac Loeyait Airiamununeta Nuka Aijar ka Alimonokin 23

•  Onac Loitolosi Airiamununeta Nuka Aijar ka Alimonokin 24

•  Onac Loicori Imakio Keda Ejaanakinak 25

•  Agolaik Ace 26

•  Ibidion 27

1. Epote aicoreta nu aingarakin ngul kere luejaasi keda atutubena kotoma Airiamununeta Nuka Aijar Naka Ekristayone ka Alimonokin. Ibusakinit kes airereor aicoreta nuka atutubenakec kwape ibwaikitere toma Oitabo loka Airiamununeta Nuka Aijarawok ka Alimonokin keda aicoreta nuejaas ne eringa kes itemokina atutubenakec. Ekoto anyaraun ikalimonokinak kere alemun kanu aitodolikin atutubena nuka esisiak. Epedorete ngul da luisisiaete Ebaibuli aijaikin atutubena kotoma airiamununeta arai ecamunitos kesi aisisianakineta nuka Obaibuli keda ara etupitos kesi aicoreta nuka Ebaibuli kotoma aijarakec. Ekot Onac Loeyait Airiamununeta Nuka Aijar ka Alimonokin aimor nuibusakinit aitodolikin kanu alomar osomero keda ediosisian yenimam erai ikalimonokinan ido okoto alomar osomero ido ekaulo alimokin nges arai epedori ngesi alomar osomero arai mam. Ibusakinit nges aswam ngun kojai yenisisiatar itunganan ngin Ebaibuli (arai kojai aurianike yeneejai toma abeit) Nuibusakinit itunganan aitodolikin, eputos keda akiro nuibusakinit yenekot araun ikalimonokinan yenimam ibatisauna aitodolikin.—od-E esu. 8 atia. 8.

2. Edakika ediopet. Kangolisabiiti akaulo naka ekosio keda ailip, ebuni onac loitolosi ainapeta nuka Airiamununeta Nuka Aijar ka Alimonokin aitetem akiro nuebeit aisisia kotoma airiamununeta kangun. Ibusakinit onac loitolosi ainapeta nuka airiamununeta apodokinit aitacaun akiro nuepolok nuimedaunete atukot noi.

 3. Einer: Idakikan itomon. Ejai akou naka akirot keda autulain naka akiro nuepolok nuebeit aitetem toma Oitabo Loka Airiamununeta Nuka Aijar ka Alimonokin. Ibusakinit korai ekimat arai ejaanakinan loemisiarit aisisianakin ejok einakini einer ngon. Edol aisiom eitabo ece loka Obaibuli kotoma ainapeta nuka aisioman naka Ebaibuli naesabiiti kangon, ibusakinit aboliaikin ebidio loitegearere eitabo ngon. Epedori eneran arucokin akiro nuka ebidio kangon keda akou naka akirot naka einerike. Konye ekoto ngesi aitetem akiro kere kwape ejatar oitabo loka airiamununeta. Bobo da, arai ecamaki apak, ibusakinit nges aitetem aputosia kanu aitacaun akiro nuepolok. Epedori ngesi aitetem acekiro numam ejaas toma autulain, bon ebe iriamara keda akou naka akirot naka einer kangol.

 4. Abar Nakomoyo: Idakikan itomon. Erai na atutubet naingisingisere aingiseta kobongonokinete iinacan, komameete akiro nuepukorete arai nuengetakinete. Ibusakinit korai ekimat arai ejaanakinan loemisiarit aisisianakin ejok einakini atutubet ngin. Ekoto onac loitolosi atutubet ngin aingitingit aingiseta ngun kere. Epedori ngesi aseun arai ibusakinit aisiom ikokoron luejaas atutubet ngin. Ibusakinit iinacan luebongonokinete ayangaikin itikatikan 30 arai idis.

 5. Aisiom Ebaibuli: Idakikan iwongon. Erai na atutubet naijaikini esisian loerai ekiliokit. Ibusakinit nges arasakin aisiom komam ainakin akiro nuepukorete arai nuengetakinete. Ekoto onac loitolosi airiamununeta kojaas ka alosikinet naka aingarakin iinacan aisiom ejok, kopatana amisiikin, kocai, aikeun akiro nuepolok, abwounun kotoma aiboisit naebeit, ibecokina eporoto ka aisiom kopone loinerar jo duc. Naarai eoja asioman ace adepar nace, ibusakinit onac loeyait Airiamununeta Nuka Aijar ka Alimonokin, apodokinit ejautene loka esisiak naekoria ngesi atutubet naka aisiom Ebaibuli.

6. Idakikan itomonakany. Atutubet na naka airiamununeta, ijaikinit itunga kere arereng naka aitetemoonor alimonokin ka aitojokaar epone loineratar kesi ka itunga, epone loelimonokiniata ka loisisianakiniata kesi. Kwape ejaunor eipud, epedorete imakio da ainakin atutubena nuka esisiak. Ibusakinit kanginisisian aitwasam aicoreta nuejaas aburocua Aisiom Keda Aisisianakin ka aburocua Komina Itunga naitodiaritai akaulo atutubet naeinakinitai eisisian kotoma Oitabo Loka Airiamununeta Nuka Aijar ka Alimonokin. Kanenice, ejaun atutubet naitolomunitai keda alosikinet naka aimor. Ibusakinit korai ekimat arai ejaanakinan loemisiarit aisisianakin ejok nges einakini atutubet ngin.—Koany  atiakunet na 15 naikamanara keda epone loitoloset atutubena nuka aimor.

 7. Aitegear Einer: Erai na atutubet naepedori esisian lokiliokit arai naberu ainakin. Ibusakinit lueinakinete atutubet na koraasi ikiliok bon arai angor bon. Konye arai eraun yenikiliokit ka yeniberu ainakin atutubet na nepepe, ekoto kesi koraasi luekale ediopet. Epedorete lueinakinete atutubet na aiboikin arai bo aibwo.—Kanu akiro nuipu nuikamunitos epone loejaar atutubet na, koany  atiakunet na 12 keda  na 13.

 8. Atupakin: Epedori esisian lokiliokit arai naberu ainakin atutubet na. Ibusakinit lueinakinete atutubet na koraasi ikiliok bon arai angor bon. (km-E 5/97 app. 2) Epedorete lueinakinete atutubet na aiboikin arai aibwo. Ekoto esisian aitodun nulimuno kanu atupakin einer loetegearitai sek keda itunganan.—Kanu akiro nuipu nuikamunitos akiro ka epone loijaunotor yesi itodolikinete atutubet na, koany  atiakunet na 12 keda  na 13.

 9. Aituluor Itunga Ikesisiak: Epedori esisian lokiliokit arai naberu ainakin atutubet na. Ibusakinit lueinakinete atutubet na koraasi ikiliok bon arai angor bon. (km-E 5/97 app. 2) Epedorete lueinakinete atutubet na aiboikin arai aibwo. Ekoto kesi aitetemoor epone loisisiaenenere keda itunganan Ebaibuli. Mam ibusakinit esisian alimun akiro nuitegearete arai nuengetakinete dimikito arai einakinitai ngesi aisisiaet naekoto aswam ngun. Mam ibusakinit aisiom kopupete itunga akiro kere nuejaasi atutubet nainakinitai karaida aticepak epedorete kesi aswam ngun.

 10. Aitetem Nuiyuunit Ijo: Arai kerai atutubet na einer loeinakinio, ibusakinit esisian yenikiliokit nges einakini atutubet na. Konye arai kerai atutubet ngin aitetemooret, epedori esisian lokiliokit arai naberu ainakin atutubet na. Ibusakinit lueinakinete atutubet na koraasi ikiliok bon arai angor bon konye arai eraun yenikiliokit ka yeniberu ainakin atutubet na nepepe, ekoto kesi koraasi luekale ediopet. Ekot esisian ainakin abongokinet naecai ka naitodunit ayongit kanu abongokin aingiset naepol naikeunitai ido ekot nges aitosom akiro nuijakitai kanu atutubet kana. Epedori esisian aseun alimun arai mam alimun eitabo loelemunitere atutubet naewuta ngesi aijaikin.

 11. Einer: Erai na atutubet naijaikini esisian loerai ekiliokit ido ibusakinit ainakin kwape einer kotoma atukot. Arai elemunitai einer lo kotoma akiro nuiyatakinitai A (appendix A) nuka aburocua Komina Itunga, epedori ngesi aitetem epone loitwasamaet ekokoro ngon kotoma alimonokin. Kwape aanyunet, epedori ngesi aitetem apak naipedoria jo aitosom ekokoro ngon, apolou naekokoro kangon, keda epone loipedoria jo aingarakin itunganan amisiikin ekokoro ngon. Arai elemunitai einer lo kotoma akiro nuejaas aisisiaet naka aburocua Komina Itunga, ibusakinit esisian apodokinit aitetem epone loitwasamaet akiro ngun kotoma alimonokin. Epedori ngesi aikeun aanyunet naejai akirot na 1 kotoma aisisiaet kangin arai bo epedori ngesi aikeun ediokokoro loijai toma aisisiaet ngin loewomit ngesi ebe ingarakin.

   12. Nuejaasi: Akiro nuejaasi atiakunet na ka naetupakini, itetemitos nuikamunitos atutubet naeinakini itunganan naka “Aitegear Einer” keda “Atupakin.” Arai ca nat icorakitai nges aswam ace, ibusakinit alosikinet naka esisian korai aimor keda itunganan abeit naepatana naka Obaibuli naimedaikini itunganan yenineratar ngesi keda ekot esisian ajalakin aingiset arai akiro nuepedorete kesi aimor kotoma einerikec koingaren. Ibusakinit esisian aseun akou naka akirot naibecokina ka nairiamara keda ejautene loka itunga luatutubet kangin. Epedori ngesi aseun akorar arai mam akorar idiopet koitabon arai ebidio kotoma Oborowok Luka Aisisianakin. Itia aitodiar akiro nulimuna nuedaunitos kesi aikamakin akou, ibusakinit esisian aitetemonor epone loajokan loineris keda itunga kwape nat aitodun epone loitodikinet itunga amin ka einer loelel kwape inerar jo duc.

   13. Epone Loejaar: Ibusakinit esisian aibwaikin toma aswamisioit nueinakinitai nges aswam kotupite ejautene loka aiboisit kangin. Kwape aanyunet:

1.  (1) Alimonokin Togo Toni Togo: Epone loejaar atutubet na, imoriarit alimonokin okek toni okec arai idolokini jo itunganan oreke, inomakini jo nges esimu, arai bo iwadikakini jo nges ebalua, bobo da, imoriarit atupakin einer loigearit jo sek keda itunganan yenidumuni jo kotoma alimonokin togo-toni-togo.

2.  (2) Alimonokin Kaneijai Kere: Epone loejaar atutubet na, imoriarit esisian aitwasam adiorereng kere naedumuni ngesi inerasi keda itunga akiro ace kanu alimonokinia akiro nukajokak. Epedori aimoriar aimor ediokokoro loka Obaibuli keda itunganan kotoma aswam, osomero, oidunyet arai bo kobaasi arai adioaiboisit kere nailosi jo kanu aitodolikin akirokon nuaduc.

3.  (3) Alimonokin Kaiboisio Nuipu Itunga: Epone loejaar atutubet na, imoriarit alimonokin itwasamai akaat, alimonokin aiboisio naegwelanariata itunga, alimonokin orotin, aiboisio nuiyengatiar itunga, neepaanakinete imotokan, ka aiboisit adio kere naejaas itunga.

 14. Aitwasam Ibidion Keda Iitaabon: Kotupite ejautene, epedori esisian aseun aitwasam ebidio arai edioitabo. Arai imoriarit atutubet ngin ebidio arai keseu esisian aitosom ebidio, ibusakinit nges aitegear ka aimor ebidio ngon konye komam aboliakin ebidio.

15. Akaulo awoikin ekosio, adakikan 15 nuetupakinete ejaatar keda atutubet adiopet arai aarei nuitolomutai keda alosikinet naka aingarakin ikapupok aibwaikin toma aswamisioit nuisisiaunete kesi kotoma Akirot Naka Edeke. Arai ca nat itodiaritai, epedorio ainakin ekimat arai ejaanakinan loemisiarit aisisianakin jokan aitolot atutubet na, kilema atutubet ipudesia luka atukot naerai ekimat nges einakini. Arai icorakinitai aimor atutubet na, epedori eneran anatar atutubet na kere aingit aingiseta ace aimoriarit ngun nueinakinitai katutubet kangin. Ibusakinit ngesi aiturianit akekiro nuitegearete kanu acamakin kanu aimor akiro nuepolok ka acamakin ikapupok apak naedolit ainakin abongonokinetakec. Arai imoriarit atutubet na aingitingit iinacan, arai epedor, ibusakinit luingisingisio ainakin abongonokinetakec kojaasi ingaren mere kiboete kaneiboioto luce kere.

  16. Aisisia Ebaibuli Kwape Atukot: Idakikan akaisauni. Ibusakinit ainakin ekimat loemisiarit aisisianakin jokan aitolot atutubet na. (Konye arai ikidioko imakio atukot, epedorio ainakin ejaanakinan loemisiarit aisisianakin jokan.) Erai imakio kere kes itutubete iinacan luepedorete aitolot Aisisia Ebaibuli Kwape Atukot. Ekoto ngul lueseunio kopedoritos aitolot ejok kopone loka aidar apak, aitacaun ikokoron luepolok, ka aingarakin ikapupok aimedaun kotoma akiro nuisisiaete kesi. Epedorete ngul lueseunio aimedaun kotoma airereonor aicoreta nuinomunitai kanuikamunitos epone loitolosere atutubet naikaumunit aingiseta-ka-abongonokineta. (w23.04-E app. 24, asaduku) Akaulo angetakin jokan akiro kere nuka aisisia Ebaibuli kwape atukot nuka esabiiti kangol, mam itoojaari aisisia. Arai epedor, ibusakinit aitwasam iinacan luegelegela kanu aisiom ka aitolot aisisia Ebaibuli kwape atukot. Arai icoraki onac loitolosi Airiamununeta Nuka Aijar ka Alimonokin ebe kituriani apak naeyangaikini aisisia Ebaibuli kwape atukot, epedori onac loitolosi aisisia ngin aitutub epone loituurianet aisisiaet ngin. Epedori ngesi aitutub ainyeikin aisiom atutubena ace.

17. Idakikan iuni. Ebuni onac loitolosi Airiamununeta Nuka Aijar ka Alimonokin ainyogoor akiro nuepolok kotoma airiamununeta kangun. Ibusakinit bobo nges airereor akiro nukosabiiti loetupakini. arai eringa apak ideuna, epedori ngesi alimor ikiroria luka esisiak luka osabiiti kangol. Arai caat icorakinitai ace, ibusakinit onac loitolosi airiamununeta aisiom kotoma akiroke nuengetakinete, alimonoreta keda ibaluan luitejenaritai ebe eraasi luebeit asiomakin atukot. Mam ibusakinit asiomakin iinacan akiro nuaduc kwape nat ainapeta nuka alimonokin, keda ainapeta nuka aitala eKingdom Hall, konye ibusakinit aikajakin akiro kwa ngun abao naka alimonoreta. Arai ekadit apak naka aisiom alimonoreta, ibusakinit onac loitolosi airiamununeta nukosabiiti kangol ainerakin keda iinacan luejaatar ka atutubena nukotoma Aijar Kwape Ikristayon tetere ituurianete atutubenakec kanu ayuun apak naka alimonoreta kwape ipudare. (Koany  atiakunet na 16 keda  na 19.) Engetakinos airiamununeta keda ekosio ka ailip.

18. Kedau esisian aijaikin atutubeteke, ebuni onac loitolosi Airiamununeta Nuka Aijar ka Alimonokin aitwasam nepetai edakika ediope kanu aijaikin aisiyalamikinet arai aicoretait kotoma aisisiaet naeinakinitai. Mam loitolosi airiamununeta ibusakinit alimor aisisiaet naijaikinitai esisian aswam kapak naenyaraunia ngesi esisian aijaikin atutubeteke. Konye, kedau esisian aijaikin atutubeteke, ido akaulo naka aisiyalamikin esisian, epedori ngesi alimor aisisiaet keda akiro nuajokak nuiswamat esisian kotoma aisisiaet angin, kosodi kitodunite asianut epedori ngesi ainakin aicoretait naikamunit epone loepedoria esisian aswam ejok keda ibore yenibusakinitor esisian aswam ngun. Epedori bobo onac loitolosi airiamununeta alimun akiro ace nuikamunitos epone loijaikinitor esisian atutubeteke arai eomit ngesi ebe epedorete ngun aimedaun esisian kaluce da. Aicoreta ace nukotoma aburocuan Komina Itunga keda nukotoma Aisiom Keda Aisisianakin, arai eitabo Ministry School, epedorio ainakin akaulo naka airiamununeta arai bo acepaaran, epedori aicoretait ngin kolomunite kotoma kanu einakinitai esisian aswam arai bo kikamunite akiro ace.—Kanu akiro ace nuikamunitos epelu loka onac loitolosi Airiamununeta Nuka Aijar ka Alimonokin keda nuka onac loicori imakio keda ejaanakinak, koany  atiakunet na 19,  24, keda  na 25.

19. Mam ibusakinit adioitutubet adepar apak naetubokinitai, karaida akiro nuka onac loitolosi Airiamununeta Nuka Aijar ka Alimonokin. Karaida einakinit Eitabo Loka Airiamununeta Nuka Aijar ka Alimonokin apak naebeit kanginitutubet ayangaikin, arai edaun aitetem ejok akiro kere nukatutubet naitolosio konye koringa apak ideuna, mam ibusakinit aiyatakin akiro ace ebe kanu angetakin apak naeinakinitai kotoma atutubet kangin. Ibusakinit aitobwoun kacobeu esisian loeuta adepar apak naeinakinitai. Arai ejai neabu apak odeparor, ibusakinit onac loitolosi Airiamununeta Nuka Aijar ka Alimonokin arai onac loicori imakio keda ejaanakinak aijaikin aicoretait konye mere kotunga. (Koany  atiakunet na 24 keda  na 25.) Ibusakinit airiamununeta kere aimoriarit ikososinei keda ailipasinei adaun esawa ediope ka adakikan 45.

20. Arai ipejokinit ekaanyanaran atukot, ibusakinit aitolot ainapeta kwape ejaatar Oitabo Loka Airiamununeta Nuka Aijar ka Alimonokin konye kiitunitos nuta: Ebuni einer loka aijaanakin loeinakini ekaanyanaran ayangaikin idakikan 30, kanuangun, eburokini einer ngol atutubet naka Aisisia Ebaibuli Kwape Atukot. Eroko ekaanyanaran einakina einer ngon, ebuni onac loitolosi airiamununeta ainyogoor akiro nuesisiaun, airereor nukosabiiti kangol ka aisiom alimonoreta keda ibaluwan, kosodi konyet anyaraun ekaanyanaran. Kedau ekaanyanaran ainakin einer loka aijaanakin, engetakini do keda ekosio loeseunit ngesi. Epedori ngesi anyaraun ediopet koinacan angetakin keda ailip. Arai lem ejaasi ainapeta nuijaanakiniata esisiak ice atutubenakec kagola ace, mam ngun ejaunos kotoma osabiiti loipejokinitor ekaanyaran atukot. Epedori egurupu aitolot airiamununetakec kapak naipejokinitor ekaanyanaran atukot naisipejit. Konye ibusakinit egurupu ngon aimorikikin nepepe keda atukot naisipejit kanu apupokin einer loka aijaanakin loeinakini ekaanyanaran.

21. Kosabiiti loejaar adiotukonokin, mam atukot ibusakinit aitolot airiamununeta. Ibusakinit aisiitikin atukot aimor kwape ekale arai aisisia kwape idiopediopen akiro nuka Airiamununeta nukosabiiti kangol.

22. Arai ebeiki Aiitun Atwanare Naka Yesu apaaran namam erai Naemukaaga arai Naasabiiti, mam einakinio ainapeta nuka Airiamununeta Nuka Aijar ka Alimonokin.

23. Ekimat loeseunitos imakio nges ibusakinit aijaanakin kwape loeyait Airiamununeta Nuka Aijar ka Alimonokin. Onac lo, nges ibusakinit aanyun ebe itolosio airiamununeta kere kwape ejaatar ainapeta ido kotupitete aicoreta nu. Ibusakinit onac lo arucokina jokan keda onac loicori ejaanakinak keda imakio. Naedolunia Eitabo Loka Ariamununeta Nuka Aijar ka Alimonokin, ibusakinit onac loeyait Airiamununeta Nuka Aijar ka Alimonokin akorakin iinacan atutubena kere nuka airiamununeta nukokiding esabiiti nuka ilapio iarei. Imoriaritos ngun atutubena kere nuka airiamununeta nukokiding esabiiti ka iinacan kere luitojokaritos imakio aitolot airiamununeta ngun, ka aimoriarit atutubena nuka esisiak. (Koany  atiakunet na 3-16 keda  na 24.) Naejaar ngesi aiswamaun atutubena nuka esisiak, ibusakinit ngesi apodokit ikar, amisiarit, keda itunganan ajaut kaomisio nuelaete ailajaara einer akiro ngun nuijaikitai nges. Ibusakit bobo nges apodokinit ngupengun naiswamaunia nges atutubena ace da nuka airiamununeta. Ibusakinit alingakin aitijenikin iinacan nuikamunitos atutubenakec kacut isabiitin iuni eroko apak naijaikiniata kesi atutubenakec edolo. Ibusakinit aitwasam afoomu Our Christian Life and Ministry Meeting Assignment (S-89-E) kanu aijaikinia esisiak atutubenakec. Ekoto onac loeyait Airiamuuneta Nuka Aijar ka Alimonokin aanyun ebe ikajakinitai ainapeta nuka airiamununeta abao naka alimonoreta. Epedorete imakio luka atukot aseun ekimat ece arai ejaanakinan kanu aingarakin nges. Konye, imakio bon ibusakinit aikorar atutubena numam eraasi nuka esisiak.

24. Kangolisabiiti, ebuni ekimat ediope aitolot Airiamununeta Nuka Aijar ka Alimonokin. (Arai ikidioko imakio, epedorio aitwasam ejaanakinak luemisiaritos aisisianakin jokan.) Aswam naka onac loitolosi airiamununeta, nges aitemonokin akiro nuepukorete keda nuengetakinete kotoma airiamununeta. Ngesi enyaraununei iinacan kere lueinakinete atutubenakec ido arai ikidioko imakio, epedori ngesi aitolot atutubena ace kotoma airiamununeta, kwape nat asesen ebidio lomam ipudare aitetem bobo ace. Ekoto kouriaka akiro nuelimuni ngesi akaulo itunganan aijaikin aketutubet. Erai imakio kere luatukot kes eseunete ekimat loemisiarit aitolot airiamununeta nu. Imakio luemisiaritos kes ebeanakinos aitolot airiamununeta nu kangolisabiiti. Kotupitete ejautene loka atukot, epedorio abongobong aitwasam onac loeyait Airiamununeta Nuka Aijar ka Alimonokin aitolot Airiamununeta adepar luce imakio. Arai emisiarit ekimat aitolot Aisisia Ebaibuli Kwape Atukot, apolouke ebe epedori ngesi aijaanakin kwape loitolosi Airiamununeta Nuka Aijar ka Alimonokin. Kiitu ebe, ekot ekimat loitolosi airiamununeta nu, aisiyalamikin esisiak luijaanakinete atutubenakec keda arai ibusakinit, ijaikini ngesi aicoretait kotoma amin. Ibusakinit ngesi apodokinit angetakin airiamununeta kotoma apak. (Koany  atiakunet na 17 keda  na 19.) Arai itojoka ngesi ido arai elal neibwakinio amaikuropon ace koingaren, epedorio asipokin nges aimaikuropon ace tetere nges enyaraununei iinacan aijaikin atutubenakec ido kobwoi yenebeit ainakin atutubeteke kamaikuropon naka eneran. Bobo da, epedori onac loitolosi airiamununeta aseun aiboikin ngaren naijaikinia onac atutubeteke na Aisiom Ebaibuli keda atutubet naka Aitojokaar Alimonokinikon. Epedori na ayuun apak.

25. Ibusakinit ainakin onac loemisiarit aisisianakin ejok kanu araun loicori imakio keda ejaanakinak. Aswam naka onac kalo nges aicor imakio keda ejaanakinak kanuikamunitos ineresineikec, aimoriarit atutubena nuka Airiamununeta Nuka Aijar ka Alimonokin, ineresinei luka itunga kere, keda aisiom ka aitolot aisisia aWatchtower arai bo nat atutubet naka Aisisia Ebaibuli Kwape Atukot. (Koany  atiakunet na 19.) Arai ipu imakio luemisiaritos aisisianakin kotoma atukot, epedorio aijulanakin kangolikaru onac loicori imakio ka ejaanakinak. Mam erai ebe ebeit onac loicori imakio keda ejaanakinak ainakin aicoreta akaulo naka anginitutubet.

26. Kotupitete enaaba loka esisiak, epedori atukot atiakar esisiak ice agolaik ace kanu kesi aijaikin atutubenakec. Ekot onac loicori agola angin korai ekimat loemisiarit aisisianakin jokan. Konye, kwape aticepak ejaunor ejautene, aticepak epedorio aitwasam ejaanakinan loemisiarit aisisianakin jokan. Ibusakinit imakio kere luatukot aseun onac loepedorit aitolot ainapeta kotoma agolaik kangun ido epedorete kesi aitutub ainakin iinacan luegelegela abeanakin aitolot ainapeta ngun. Ibusakinit onac loicori atupakin aicoreta nuejaasi  atiakunet na 18. Arai ebeit iinacan aijaikin atutubenakec agolaik angun, ibusakinit kes alosit ngina akaulo naka atutubet Abar Nakomoyo naejai atutubet Abar Naejai Toma Akirot Naka Edeke. Ibusakinit iinacan luejaasi agola ace abongun aimorikikin katukot kengetaki esisian loawasia aketutubet.

27. Eponio aitwasam ibidion lueseunitai kanuka airiamununeta nukokiding esabiiti. Ejaunos ibidion luka airiamununeta nukokiding esabiiti toma JW Library^® app ido ipedori jo aikopun itosomai esimu, atabulet arai akompiuta.

© 2023 Watch Tower Bible and Tract Society of Pennsylvania

S-38-IE 11/23