NEISIOMIA ijo apapulai nuka iyemuto, kasesen etelebision, arai bo aipup eredio, idumuni ijo iyemuto luipu luitodunitos abilibilio naka ikisila, ejie, keda itunga luepeleinikinete aiar luce! Aticepak iticanitoi ijo da kanuka ariebo arai bo naarai kitwanikit yeniminatakon.

Ipedori ijo aingitakin:

• Eraasi kereka nu nuelosikinit Edeke kanuka ka lukokaleka?

• Ai bo apedori eong adumakin aingarakinio kanu atitingikin atiokisioka?

• Ejaun kereka ainapakin?

Ebongokinit Ebaibuli aingiseta ngun koipone loibecokina.

• Emameun bobo ariebo, amojongu karaida atwanare.—Apukokinio 21:4

• “Kosodi engwalas asomanar kwape amiam.”—Isaia 35:6

• “Kosodete akonye nuka imudukiok akwenyun.” —Isaia 35:5

• Itajarunio lukatwak. —Yokana 5:28, 29

• Emameun bobo yenedekakin. —Isaia 33:24

• Epote itunga kere luejaasi toma akwap adumun inyamat luedolito.—Isabulin 72:16

Epatana aomit ebe nuisiomi ijo kotoma apapulai nusodit kotoma oitabo kalo eraasi airujasia. Konye isumunit Edeke aiswamaun aijulanakineta ngun kotoma akwap katipet, ido itetemit Ebaibuli eipone loebeitor ngesi aswam ngun.

Itijenikinit bobo oni Ebaibuli eipone lodumunet aiyalama kwape kwana. Koomoom ber ijo nuikamunitos iboro luijaikinitos ijo aiyalongong. Aticepak iboro kwape nat isirigin arai bo atiokisio nukokale, adeka, arai bo atwanare naka yeniminatakon. Epedori Ebaibuli aingarakin ijo atitingikin atiokisio ngun, ido epedori aitalakaar ijo koipone lo abongonokin aingiseta kwape nat kanu:

• Kanukinyo kiticanitor oni?

• Eipone bo ani ipedoria oni atitingikin atiokisiowok?

• Epedori kereka ekaleka adumun aiyalama?

• Anyoika bo nuetakanikinete oni kitwaka?

• Iwanyuni kereka bobo oni luminanawok luatwakata?

• Kanukinyo ipedoria oni amunokin ebe ebuni Edeke aswam nuisumunit ngesi kere?

 Naisiomia kwana ijo eitabo lo itodunit ebe ikoto ijo ajenun nuipu nuisisianakini Ebaibuli. Ebuni eitabo lo aingarakin ijo. Ejaasi eitabo lo kede aingiseta ka atutubena nuingarakinete ijo amisiikin Ebaibuli ejok. Alelakisi itunga luipu aisisia Ebaibuli keda Ajenak Luka Yawe. Imuno ebe ibuni ijo da alelakin. Kisirereng ijo Edeke kotoma aisisiakon naka Ebaibuli!