AJAATAR Noa aberu ka isapa iuni. Ikiroria isap ke kes Sem, Kam ka Yapet. Ido anginidiopet kosap kalu ajaatar aberu. Aso ajaasi do itunga ikanyakuni okale loka Noa.

Koinak Edeke Noa aswam ibore yeni aumokina. Abu kolimok ngesi aiduk ataker nati. Apol ataker na bala ameri, konye asubit bala asaduku nati, naeoja. Kobala Edeke elimokin Noa ebe: ‘Kiswama nges korai egoropa loikeuna irwan auni kuju ido kotiakatiaka agolaik toma ke.’ Agolai araasi kanuka Noa ka ekekale, itiang ka inyamat lu enyamete kesi kere.

Abu bobo Edeke kolimok Noa ailadar ataker kede emina tetere mam akipi eleleikinete toma. Abala Edeke: ‘Ayauni eong akalele nati kasodi amudiar akwap kere. Yeni emamei kotoma ataker, etwani.’

Apotu Noa ka odwe ke orimasi Yawe kosodete ageun aiduk ataker. Konye luce itunga apotu kokwenatar kesi. Apotu kiyatakis aroniar. Amamei yen abu kiyu Noa ne alimokina kes nu alosi Edeke aswam.

Abu koyanga apak na epol aiduk ataker naarai apol nges noi. Kangeset akaulo na ikar luipu, abu odaun. Olimok Edeke Noa ayangaun itiang ataker. Abala Edeke ayangaun itiang iarei lu epone ece, yenikiliokit ka yeniberu. Konye lu epone ece, alimokit Edeke Noa ayangaun ikanykaarai. Alimokitai bobo Noa ayangaun toma ikweny kere luegelegela. Kiswama Noa kwape abalar Edeke.

Akaulo kangun, koloma Noa ka ekaleke da toma ataker. Kosodi do Edeke agolokin Ekek. Kotoma, apotu Noa ka ekaleke kidarata anyun nu epote aiswamaun. Aso kisima ber ebe ijai ijo toma ataker kakes idaritos. Ejaun kereka akalele kwape abalar Edeke?