ATUBOROS ikar iarei konye eroko Yosep ejai aidaris. Mam ekawokon iitunit ngesi cut. Kosodi akuare adiopet, kiruja Parao airujasia aerei nukapolou, ido kobuonokin apolou kec. Iseseni ijo ngesi ejotoi kanen? Kiwala akwap, konyarau Parao lukacoa kere, kolimok kes iboro luerujat ngesi. Konye komam epedorete aitejenikin ngesi apoulou kec.

Kiitu do kwana ekawokon Yosep. Kolimok Parao ebe: ‘Ne ajaar eong toma aidaris, ajai etunganan ngina lo apedori aitejenuun apolou na airujasia.’ Kijuka Parao anyaraun Yosep kaidaris katipet.

Kolimok Parao Yosep nuekamunitos aikerujasia ebe: ‘Abu kaany akituk akanyikaarei nuetumito nukajokak. Kasodi bobo aanyun akituk akanyikaarei nudokor nuerikorodas noi. Konyamasi akituk nudokar nuatumito.’

‘Kotoma airujasit ka nakiareit, kosurite akimait adiopet alunguren nuka akima akanykaarei, iturangangas kojokuka. Kasodi bobo aanyun alunguren akanykaarei nuawokito, nuarinyoritos. Apotu alunguren nuarinyoritos kilikosi alunguren nuturang.’

Kotema Yosep, Parao ebe: ‘Airujasia kon aarei erai epolou kec adiopet. Akituk akanyikaarei nuatumito ka alunguren akanyarei nuturang kesi ikar ikanyikaarei ido akituk akanyarei nurikod ka alunguren akanyarei nuakito kesi bobo ikar ikanyikaarei. Ejaunos ikar ikanyikaarei lukamio kotoma Misiri. Kosodi ejaunous ikar ikanyikaarei luka ebeli.’

Kolimok Yosep Parao: ‘Koseu etunganan loemisiana lokacoa, kodakak eyait atukio naka inyamat kokaru ikanyikaarei luka amio. Kwangin mam do itunga etwakete etenge okar ikanyikaarei nuetupakinete nuka ebeli.’

Ajokuna akirot ngin kakonyen nuka Parao. Koseu ngesi Yosep aituk inyamat ka aingada da. Korau Yosep etunganan lo apol kakwap nako Misiri atupakinit Parao.

Akaulo na ikar ikanyauni, kotoma apak naka ebeli, koany Yosep ice itunga epote. Ijeni ijo luangai kesi? Erasi kesi inacan ke 10 luapolok! Ejukunit papakec kesi Misiri naraai alosete inyamat adaikin kesi kore ko Kanaan. Kojen Yosep ikenacaan, konye mam kesi apotu kojenata ngesi. Ijeni ijo kanukinyo? Naraai opoloora Yosep ido enapit nges igoen lu egitakina.

Kiitu Yosep ebe ne araar nges esapat, erujat nges nuekamunitos ikenacan epote akukonokin ngesi. Kiitunit ijo aisiom nukamunitos ngun? Aso abu Yosep opedo aanyun ebe arai Edeke ejukarit ngesi Misiri ido kanuka akirot nakajokan. Inyo iwomit ijo ebuni Yosep aswam? Aso kaanyutu.