KOSESEN aputosia nuu. Anginidiopet kakesi itodunit aiticanet na abu Yawe koyangau Misiri. Kotoma aputo nasodit, ipedori ijo aanyun Aaron inomi akipi nuka Ocilet Nile ka ebela ke. Kedau nges ainom, koluoros akipi aokot. Kotwaka agaria, kogeu ecilet aurun.

Etupakini, koinak Yawe aidodokai alomun Kocilet Nile. Ajaasi anginibosit kere—okialan, amoti, aperito—nginibosit kere. Ketwakata aidodokai, kotukonokis itunga luko Misiri kes, koraunos atukono nutiok, ido kouru akwap noi.

Kosodi Aaron ainom apua nuka akwap, koluoros apua ilac. Lu kesi idepio ludidik luedesitos adesitoi ido okonyokonyoete. Ilac kesi aiticanet nauniet kotoma akwap nako Misiri.

Aiticaneta nuatupakinete do kesi apotu kisiriebata itunga luko Misiri bon mere Isiraelin. Naongonet nesi aiticanet naka icuc luopolok noi luapotu kirerebunos otogoi luka itunga luko Misiri. Aiticanet naikanyet nes ekamunit ibaren. Kotwakata akituk, amerekekin ka akinei nuipu nuka itunga luko Misiri.

Etupakini, komukutu Musa ka Aaron ekurwon koupa kosodete aiwelar kuju. Kodekakinos itunga ka itiang abusion. Arai na aiticanet naakanyetekape.

Akaulo kangun, korio Musa ekekan akuj ido ijuk Yawe eires ka akako. Arai na akoko narono akere nadoikinitor Misiri.

Aiticanet nakanyetekauni arai na emaase. Mam apengo ajauna emaase loatia nen, karaida akauloke mam abu kojaikin loatia nen. Konyama nginibore kere yeni edeunit akako.

Aiticanet nakikanyetekaong nesi amuton. Korap amuton naeriono cucucuc akwap adaun aparasia auni; konye ajaasi Isiraelin ka aica kane eboyotor.

Kangetakinet, abu Edeke olimok iketunga aicokicok aokot nuka ikalol arai imerekek opirin luka ekek, kotogoi kec. Kosodi emalaika loka Edeke aitor Misiri. Neanyuna emalaika aokot, mam abu koar idio itunganan kotogo kangol. Konye kotogoi kere luamamete aokot kopirin luka Ekek, abu emalaika loka Edeke koar ekiai loka itunga ka itiang. Arai na aiticanet nakitomonet.

Akaulo na aiticanet kanawasia, abu Parao kolimok Isiraelin anyoun. Akapakina itunga luka Edeke alosit, ido akuare ngipengin, konyoutu ko Misiri.