ITEI ijo, ingai bo elosi Dina aipejoikin? Ejaai nges alosit aanyun apesur ace luiboiete kakwap naka Kanaan. Ti kereka Yakob papake iyalamikin ngesi alosit ngina? Kanu aingarakin oni abongokin aingiset na, kotam aitum epone lo asesenata Aburaam ka Isaak angor nuko Kanaan.

Akoto kereka Aburaam okooke Isaak aimany apese nako Kanaan? Mam, mam nges akoto. Akoto kereka Isaak ka Rebeka okookec Yakob aimany apese nako Kanaan? Mam, mam kesi akotosi. Ijeni ijo kanukinyo?

Naraai amaete itunga luko Kanaan lu idekesio lukaisab. Mam araasi itunga luebusakinit aiboio kwape ikiliok ka angor, ido mam araasi itunga luebusakinit ajaaunor kwape ipapero luedic. Aso imisikini do oni ebe mam ti Yakob iyalamikin akooke aitaraun apesur nuko Kanaan apaperoke.

Abeit cut abu Dina koloma toma ationis. Ipedori kereka ijo aanyun etunganan ngol loka Kanaan kotoma aputo lo itei Dina? Ekiror ke nges Sekem. Adiopepaaran ne abunio Dina aipejo, koyanga Sekem Dina ido kobuik ngesi apero kanges. Arono na naraai ikiliok luedukokina ka angor nuedukokina bon kes ibusakinit apero nepepe. Akiro nu aroko, nuabu Sekem kiswamaik Dina, apotu oyautu ationis naapol noi.

Kepuputu inacan luka Dina nuapotu kotakanutu, apotu konyunyurikinos noi. Iarei kakes Simeon ka Levi anyunyurasi noi ido kitinga ikilenga, kolomasi ore ngol, kikamasi itunga kaiyea. Apotu kesi ka inacan kec koarata Sekem ka ice ikiliok da kere. Konyunyurikin Yakob noi kanu eswamaunatar ikesap aronis na.

Epone ani ageunor ationis na kere? Naarai abu Dina kitarau itunga lumam ayongitos Edeke ipaperoke. Ikoto kereka oni aitaraun itunga kwangun ipapero wok cut?