ISESENI ijo nuiswamasi kane? Lu kesi ajiok luka Isirael. Itunga luekukos kes ejaasi aimat akipi. Etunganan loebwoi koyapiete kakes nesi ekatubon loenyaritai Gideon. Eseseni ngesi epone lo emasatar kesi akipi.

Koany ejok iponesio luegegela luemasatar kesi. Akukokinos ice aitulur iretakec akipi. Konye eokununei ediope akipi kakanike tetere ngesi epedori asesen nuiswamasi kosiep ke. Epol na naarai alimokit Yawe Gideon aseun itunga lu esesenete emasete akipi. Ebala Edeke ebe, ibusakinit luce abongor ore. Kaanyutu kanukinyo.

Ejaasi idwe luka Isirael toma ationis naepol bobo. Ajaunos ngun naarai mam kesi erimaritos Yawe. Ipugaete kesi itunga luko Midian ido ejaasi aimusung kesi. Komonyata idwe luka Isirael nejai Yawe kanu aingarakininio ido kopupok Yawe aimony kec.

Abu Yawe kolimok Gideon adukun ajore, kotukok Gideon nepepe itunga lukajiok 32,000. Konye ajai ajore na itunga 135,000 asurokin Isirael. Konye ca kobala Yawe Gideon ebe: ‘Ipu ikonitunga.’ Kanukinyo abalar Yawe kwangin?

Naarai arai ti iteleka Isirael ejie ti eomoomata ebe etelekarete kanukec bon. Ti eomoomata ebe mam kesi akotosi angarakinio naka Yawe kanu aitelekar. Kolimok Yawe Gideon ebe: ‘Kolimok nginitunganan kere yen ekuriana kobongo ore.’ Edau Gideon ainer nu kobongosi luajiok ke 22,000 ore. Kosalata ngesi ka itunga 10,000 bon aitijie ajore kere na isirikale 135,000.

Konye kopupok, kobala Yawe ebe: ‘Iroko ijo ijaasi ka itunga luipu.’ Aso kolimok ngesi Gideon anyagar kesi aimat akipi atan. Ido anyakar ngul kere luemasete akipi kokukosi aitulur iretakec akipi. Kisumun Yawe ebe: ‘Ainakini eong ijo aitelekar ka itunga 300 luapotu komata akipi kakanin kosesenete.’

Kodolu apak na ejie. Kotiak Gideon itungake 300 toma oriongeta iuni. Kititing nginitunganan arupepe, amoti naajai ataala nanoki tomake. Neperai kiding kuare, kolukakis idukurun luka ajore nasurup. Kosodi kosaawa ediopete, kokutakisi arupepen kec, kobwangabwangata amoti kec ido kiworoto ebe: ‘Ekiteng loka Yawe ka loka Gideon da!’ Kekwenyu ajore nasurup, ketolutoluna ido kokuriaka. Kogeutu kere akerit ido itelekasi idwe luka Isirael ejie.