INYOIN bo einakinit arwatatin nuko Yeriko atiyakin? Esubit bala enom kes ebomu loti. Konye kapaarasia kangun, amameatar itunga ka ibomun; karaida imuduum. Erai na aumokinet ace naka Yawe! Kesisiautu epone lo eswamaunotor ngun.

Kopupok nu abu Yawe kolimok Yosua: ‘Irimori ijo ka itunga kere lukajiok ere. Irimorete ere irwan atipet kanginipaaran adaun apaarasia akanyikape. Kodakitos asaduku naka aitutuket nepepe kayesi. Ibusakinit isasedotin ikanyikaarei alosit koingaren ke ido kokusete arupepen kec.

‘Kapaaran nakikanyetekaarei, ibusakinit yesi airimor ere irwani akanyaarei. Kosodi kokutakis arupepen ido kibwongakis itunga eibwong loka eijie. Etiayikinos do arwatakin kwap!’

Apotu Yosua ka itunga iswamata nu abala Yawe. Ililingi nginitunganan kere ne erimoratar. Amemei yen enera akirot. Nu apuposi bon kesi akusio na arupepen ka aruo naka akeje. Ebusakinit lukasurup luka itunga luka Edeke kotoma Yeriko kokuriaka cut. Ipedori ijo aanyun auno nakarengan ngin ikaja kodirisa? Lobo angai ediriisa ngol? Eebo, eswama Rakab nu alimokinitos arotaka iarei ngesi aswam. Lukokale ke kere ejaasi toma kanges asesenete.

Kawasia, kapaaran nakikanyetekaarei, akaulo na erimor ere irwan akanyaarei, kokutakinai arupepen, kibwongakis itunga lukajiok, kotiyaikinos arwatatin. Kosodi Yosua aicorakin ebe: ‘Koarasi nginitunganan kere kore, kicweikis da. Kicweikis nginibore kere. Kideutu epuesa, Esabu, aisinit ka asuat Kanuka aingadis naka etogo loka Yawe.’

Kolimok Yosua arotak iarei ebe: ‘Koloto togo loka Rakab, kitolomut ngesi ka luejaatar kere.’ Kitajarai Rakab ka lukokaleke kere kwape esumunikinitotor ngesi arotak.