KOANY Yosua. Ebala ngesi ebe: ‘Akolong kobwou!’ Ido kobwou akolong. Kosalak akolong kiding akuj adaun apaaran kere. Abu Yawe koinak ngun aiswamaun! Konye kaanyutu kanukinyo ekotor Yosua akolong apaikin ecai.

Kegeutu ikabakan ikany luarokok lukakwap nako Kaanan aitiji itunga luka Gibeon, kijukas itunga luka Gibeon etunganan anyaraun Yosua aingarakin. Kobala ebe: ‘Iwonyuni mamakosi katipet, itajar isio! Atukonokinos ikabakan kere luiboiete kakwap nakiukon aitiji ikonijaanakinak.’

Kanepanen, konyou Yosua ka iketunga kere lukajiok. Koloto akware kiya. Kedolutu kesi Gibeon, kokuriakata isilikare luka ikabakan ikany, ido kogeutu akerit. Kitetep Yawe amoru nuapolok kokuju, kotwaka isilikare luipu luamangamangaete amoru adepar luaarete ajiok luka Yosua.

Apedori do Yosua aanyun ebe edodor akolong alomar. Emutonor akwap kosodete do isilikare luipu luikabakan ikany luarokok aiku. Ngun ngesi elipia Yosua nejai Yawe, kobala ebe: ‘Akolong kobwou!’ Kiyatak akolong aica, opedosi do idwe luka Isirael aipikor ejie.

Ajaasi ikabakan luipu luaroko toma akwap Kaanan lu engarasi itunga luka Edeke. Abu koyangaik Yosua ka ekejore ikar ikanyikape aipikor ikabakan 31 lukakwap. Ne adaunotor nu, koany Yosua ebe etiakatiakao akwap nako Kaanan ne ajaasi atekerin ngun nu aroko ekotosi aibois.

Kotuboros ikar luipu, ido kotwana Yosua korai lo ikar 110 lukapolou. Ne arokor ngesi ka ikepapero ejarete, arimaritos itunga Yawe. Konye ne atwakatar itunga luajokak, kogeutu itunga aswam iboro luaroko ido kodumutu ationis. Ne ngesi akototor kesi cut aingarakinio naka Edeke.