MAM kereka yeni erai isapat yenididi yenibus aite? Erai ekekiror Samuel. Ido itunganan loidokokinit akekan akou ke ngesi erai Eli esasedoti lopeti loka Isirael. Erai ngol Elukana papake Samuel ka Kana totoke ejaasi kesi ayaun Samuel nejai Eli.

Erai Samuel lo ikar iwongon arai ikang bon luka polou. Konye ebeit nges aiboi kane owema loka Yawe nepepe ka Eli ka isasedotin ice. Kanukinyo ejaikina Elukana ka Kana itunganan yen edit kwanat Samuel aijaanakin Yawe kowema? Aso kaanyutu.

Arai ikar idis kan kau ngesi ajaar Kana ekadakinit. Mam ngesi apedori adumun ikoku ido akoto ngesi idiopet noi. Adiopepaaran ne alosio kana togo loka Yawe, abu ilip: ‘Wu Yawe, kiitunai eong komam kimurokini! Arai kiinak ikoku yenisapat, eyapoikinit ainakin ngesi ijo apaarasia kere nuka aijarake.’

Abu Yawe kobongok ailip naka Kana, ido akaulo na ilapio idis idou ngesi Samuel. Komina Kana ikesapat, kogeu aisisian ngesi nuikamunitos Yawe ageu editeu. Abu kolimok okilenike ebe: ‘Epolor Samuel komam bobo ekoto aitanakio, ayangari eog ngesi owema loka Edeke aijanakin Yawe kangina.’

Nu kesi itei oni Elukana ka Kana iswamaete kotoma aputo kana. Ido naarai isisianakinitos ikeuriak Samuel ejok, eyalama ngesi aijanakin Yawe kowema ke. Kangolikaru, abunenete Kana nepepe ka Elukana aima owema loitegelikina lo, ido aipejonokin isapat kec. Kangolikaru, ayaununei Kana ekoti loitetet loeuriaka akanin loadonyokinit ngesi Samuel.

Kwape atubonorotor ikaru, kijaanakinenei Samuel kowema loka Yawe, ido abu Yawe ka itunga kominutu ngesi. Konye Kopuni ka Pinekas odwe luka Eli Esasedoti lopeti mama ajokak. Eswamaete iboro luipu luaroko ido koinakis itunga luceda aipalikin Yawe. Ebusakinit Eli alemar kesi kotona araut isasedotin, konye mam abu kiswama ngun.

Mam Samuel loadit abu kocamak iboro lueswamasi erono kowena ainakin ngesi ailung aijanakin Yawe. Adaunit apak naepol noi mam Yawe inerit ka itunganan idio kere naarai edisioko itunga lu aminas Yawe. Kepolou Samuel mot, nu kesi apotu iswamaunos:

Aperi samuel ejotoi kowema ne etekwenyuna ngesi eporoto. Kobongok ebe: ‘Eong lo.’ Konyou koker nejai Eli, kobala ebe: ‘Kiworot ijo eong, eong lo.’

Konye kobongok Eli ebe: ‘Mam keworot, kobongo akapet kon.’ Kobongo Samuel akapet ke.

Kojau bobo anyareret nakiaret ebe: ‘Samuel!’ Konyou Samuel, koker bobo nejai Eli, kobala ebe: ‘Eong lo, naarai kiworot.’ Konye kobongok Eli ebe: ‘Mam keworot, ikakoku. Koper.’ Kobongo Samuel akapet ke.

‘Samuel!’ Konyarau bobo eporoto irwan nakiniet. Koker Samuel nejai Eli. ‘Eong lo, kobala ebe ibusakinit kiworoute irwani na.’ Kojen Eli ebe erai Yawe ngesi kiworot. Kanukangun kolimok Eli Samuel ebe: ‘Kolot koper, kosodi arai kiworo kotema atiar: “kiner ijo Yawe, naarai epupi ekonibulesit.”’

Nu kesi abu Samuel kotema neworouna Yawe ngesi bobo. Kolimok Yawe Samuel ebe elosi ngesi aitisilar Eli ka odweke. Kokau kotwakata Kopuni ka Pinekas kojie kede Ipilisitian, ido kepupu Eli nuapotu iswamaunos, ibiror ededia kobil emurusingike, kotwana. Aso kodoloto akiro nuka Yawe.

Kopolor Samuel ido korau ekatubon lokawasia loka Isirael. Kemojong ngesi, kobalas itunga ngesi ebe: ‘Koseikinai isio ekabaka aipuga isio.’ Mam Samuel akoto aswam nu naarai ajeni ngesi ebe Yawe cut ngesi arai ekabaka kec. Konye kolimok Yawe ngesi apupokin eporoto loka itunga.