IJENI ijo ekiror etunganan loagogong loiboit kakwap? Erai ngesi ekatubon lo anyaritai Samuson. Erai Yawe einakinit Samuson akegogong. Eroko euruna Samuson da, abu Yawe kolimokinete totoke ebe: ‘Edodor ijo aurun ikoku yenisapat. Ingarenikini ngesi alakun idwe luka Isirael kama ejaasi Ipilisitian.’

Ipilisitian kesi itunga lueroko luiboiete ko Kaanan. Ejaatar ka itunga luipu luajiok ido eroikinitos idwe luka Isirael noi. Irwan atipet, ne alosio Samuson korot abear ne eboiotor Ipilisitian, kobu engatuny losorokan egata airiamun kangesi. Konye abu Samuson kora engatuny ngol kakanike, komamei ibore. Koara bobo ngesi Ipilisitian luaroko akwat-akwat.

Kedaunus nu, kominu Samuson aberu nanyaritai Delila. Kisumunutu ingarenok luka Ipilisitian ebe nginidiopet kakesi einakini Delila atutubena 1,100 nuka epuesa arai elimoki kesi inyo einakinit Samuson egogong. Ekoto Delila isirigin lu kere. Mam ngesi erai apapero naabeit naka Samuson karaida naka itunga luka Edeke. Aso kicobok abokobok Samuson ajenun aiyeya na agogong ke.

Kopedo do Delila ajodoun Samuson alimokin nges aiyeya na agogong ke. Kolimok ngesi ebe: ‘Mam ikatima ebarenitere. Ageun kapak naurunere eong, abu Edeke kaseu eong araun ekejaanakinan loitegelikina loenyaritai Enasirit. Arai kebareni akakou, enyouni akagogong kamakang.’

Kejenu Delila nu, abu kitojoto Samuson kakejeke. Konyarau etunganan lo abu kobaren iketima. Ekwenyu Samuson, atwaniarit akegogong. Kopotu Ipilisitian, kikamutu ngesi. Kogorut akekonye, ido itarautu ngesi ebulesit kec.

Adiopepaaran, kotukonokinos Ipilisitian ainakin Dagon edekekec asubanit naepol, ido koyautu Samuson kaidaris, koboliatar ngesi. Kapak kangin, apolounitos itima luka Samuson bobo. Kotema Samuson esapat loarikit ngesi kakan ebe: ‘Kocamakinai kararapa ipirin luigangito etogo.’ Kosodi Samuson ailip nejai Yawe kanu agogong ido kikam ipirin. Kodelo Samuson ebe: ‘Ber katwana nepepe ka Ipilisitian.’ Ajaasi Ipilisitian 3,000 asuban nu, ido ne aremora Samuson ipirin ka ekegogong kere kotiyakin etogo koara itunga lu kere luaroko.