AKOTO Musa alomar akwap nako Kaanan nepepe kede idwe luka Isirael. Kingit ebe: ‘Yawe kengaingait, kisiikinai katub Ecilet loka Yorodan, kaanyu akwap naejok.’ Konye kobala Yawe ebe: ‘Kadolo ngun, sirikiner bobo ka eong akirot ngin!’ Ijeni ijo kanukinyo abalar Yawe kwangin?

Arai kanu opotu kotakanutu ne enomia Musa atiiba. Kiitu ebe ngesi ka Aaron mam apotu kitubusikis Yawe. Mam kesi apotu kolimokisi itunga ebe arai Yawe ngesi ayauni akipi kotoma atiiba. Kanuka akirot kana, abu Yawe kolimu ebe mam ngesi elosi acamakin kesi alomar Kanaan.

Akaulo na ilapio idis ageun ne atwania Aaron, kolimok Yawe Musa ebe: ‘Koyanga Yosua, kisibwo kakonyen nuka Eleasar esasedoti ka nuka itunga kere. Ido kangina kakonyen nuka itunga kere, kolimok nginitunganan ebe Yosua nges engarenon loitetet.’ Kiswama Musa kwape abalar Yawe, ido kwape ipedoria ijo aanyun kotoma aputo kana.

Kosodi Yawe alimokin Yosua ebe: ‘Kicat, kotitingior. Kingarenikini ijo idwe luka Isirael alomar akwap nako Kanaan na abu esumunik kesi ido ajaenena nepepe kajo.’

Kokau, kolimok Yawe Musa adokar aidi naka Emoru Nebo kakwap naka Moab. Kokuju kangina, apedor do Musa aiteluor akekonye ailam Ecilet loka Yorodan asesen akwap najokan nako Kanaan. Kobala Yawe ebe: ‘Na nesi akwap na esumunit ainakin idwe luka Aburaam, Isaak ka Yakob. Adau acamakin ijo aanyun nesi konye mam acamakin ijo alomar tomake.’

Kangina, kaidi naka Emoru Nebo, kotwana Musa. Arai ngesi lo ikar 120 luka apolou. Aroko ngesi egogong ido komam akekonye ewariwarete. Kokadak itunga ido komonyata naarai atwana Musa. Konye eyalamasi kesi ajaunor ka Yosua kwape engarenon kec loitetet.