APAK naedit akaulo naetangaleun imudukiok iarei, kobu Yesu acalo loedit loeyapie ko Yerusalem. Kolimok ikesisiaiareik ebe: ‘Koloto toma ocalo ido idumunete asigiria nadidi. Kolacut, koinut eong.’

Keyaun asigiria nejai ngesi, kibwane nges. Kolot Yerusalem ne mam alwana. Nakeapiara ore, kobu ekodet loepol aisiriam nges. Luipu kakesi kopetanakis ikecenapen orot. Ice da kojepununut atenieik nuka amusogon. Kopetanakis kes da orot, kirototo ebe: ‘Kisirereng Edeke ekabaka loebunit kokiror loka Yawe!’

Kolosek ko Israel, alosete ikabakan luitetiak Yerusalem kibwanenitos ikoku yenika asigiria kanu aitodiaro otunga. Yesu da iswamai kwape kwangin. Itodunitos itunga lu ebe ekotos kesi Yesu araun ekec ekabaka. Konye itunga kere ekotoso ngesi. Ipedori oni ajenun nu kanu iswamaunos kelot Yesu oyekalu.

Koyekalu, kitangaleu Yesu imudukiok ka ingwalasik. Keanyutu idwe nu, kiworoto aitur Yesu. Konye konyunyurikinos isasedotin, kolimokis Yesu ebe: ‘Ipupi ijo nuinerasi idwe?’

Ebongok Yesu: ‘Eebo, apupi. Mam isiomitos ko Baibuli ebe: “Kaituke nuka idwe ludidik itodolikini Edeke aiturit?”’ Aso kiatakis idwe aiturit ekabaka loka Edeke.

Ikoto oni araut bala idwe ngul, mam ti? Eminas icietunga aitam ainakin oni apalar einer nuka ajakanut naka Edeke. Konye ibuni oni aiyatakit alimokin luceda nuka iboro lukajokak luebuni Yesu aiswamaikin itunga.

Mam apak adolit Yesu ageun aipuga kwape ekabaka ne ajaar ngesi akwap. Iwori bo ebunio apak ngin? Ekotos ikesisiak luka Yesu ajenun. Ibuni aisiom nuka nu etupakini.