KOANY Yesu iboie. Isisianakini ngesi itunga lu kere komoru ko Galilaya. Ngu luidunyas kanges eraas ikekesisiak. Aseu ngesi 12 kakes araun ikiyakina. Ikiyakia eraas ipapero luka Yesu luitegelikina. Ijeni jo ikiroria kec?

Ejai Simon Petero ka Anderea onaceke. Kosodi ejaai Yakobo ka Yokana lueraas kesi da inacan. Ejai bobo ekiyakia ecie lo enyaritai Yakobo, ecie da bobo enyaritai Simon. Ikiyakia iare enyaritai Yuda. Ediopet erai Yuda Isikariot, ido Yuda je enyaritai kede ekiror ecie Tadayo. Kosodi ejaas Pilip ka Natanael (loenyaritai Batolomayo) ka Matayo ka Tomas.

Kebongu ko Samari, kogea Yesu irwan nasodit alimonokin: ‘Aapu ajakanut naka akuj.’ Ijeni ijo inyo ajakanut ngin? Erai cut apugan naka Edeke. Yesu nes erai ekabaka ke. Ebuni ngesi aipuga kokuju kosodi ayaun aipuc akwap. Itarauni ajakanut naka Edeke akwap kere aparadais.

Ejai Yesu nee aisisianakin itunga nuka ajakanut. ‘Ibusakinit yes ailip kwanata. Papakosi loejai toma akuj, ekonikiror kitalaunai, akonijakanut kobu. Nuikoto kiswamai kakwapin, kwape iswamaere kotoma akuj.’ Itunga luipu enyarito na ‘Ailip naka Ejakait.’ Icie enyarito ‘Papakosi.’ Ipedori ijo alimun ailip ngin kere?

Isisianakini bobo Yesu itunga epone lo ibusakinitor kesi ayait luce. ‘Ikonak luce nuikotojo kes aikonakin ijo,’ ebala ngesi. Mam jo ikoto arai kiyaitos ijo itunga kasianut? Aso ebala Yesu, ibusakinit oni ayaite lucetunga kasianut. Mam ti ejok aparadais kakwap arai kiswama nginitunganan nu?