KENYOUTU kagola nakokuju na ogoropa, kolot Yesu ka ikekiyakia omanikor loka Getesemane. Abunenenete kesi ne irwan ipu. Kolimok do kwana Yesu kes aikweny ka ailip. Kikunyak ngesi neapie, kobuburiar kosodi ailip.

Kobongu Yesu nejaas ikeyakia. Iwomit ijo inyo iswamaete kesi? Ajotoete! Kolimok Yesu kesi Irwanauni ebe ebusakinit kesi aikweny, konye kanginibongun ke edumuni kes ejotoete. ‘Ipedorete Yesi ajo biai kapak kwape kana?’ Ebala Yesu ebonguni nawasia. ‘Adolu esawa loeinakinere eong nejaas lukasurupika.’

Atipet kopupun ecelet kokodet isepo. Koany! Apotu ikiliok etingitos ikilenga ka ibelai! Itingitos atalai kanu aica. Keaputu, kotiakun ediopet kokodet kobu nejai Yesu. Konu nges kwape isesenia ijo kane. Arai etunganan lo Yuda Isikariot! Kanukinyo anuia ngesi Yesu?

Kingit Yesu: ‘Yuda, ibilakini kereka ijo eong ebotet kainu?’ Eebo erai ainu aanyunet. Itijenikini ikiliok lu ebe, lo nges Yesu, etunganan loekotos kesi. Aso kopotu lukasurup ke aikamun nges. Konye mam Petero ecamakini kes ayangar Yesu komamei ejie. Kout ekekileng lo ayangaunit ngesi kosodi ainom etunganan loidunyas kanges. Kibuc ekileng akou naka etunganan kosodi ajepar akekit nakoteten. Konye kotiro Yesu akekit kitangaleu.

Kotema Yesu Petero: ‘Kinyakak ekilengikon aiboisike. Mam yes iwomitos ebe apedori eong aingit Papaka ilukumin luka imalaikan kanu ayuun eong?’ Eebo, epedori! Konye mam Yesu abu ingit Edeke aijukun idisimalaikan, naarai ejeni ngesi ebe adolu apak lukasurup ke ayangar nges. Aso kocamak kes ayangar nges. Aanyutu nunyoika kwana etakanikinete Yesu.