KITODIKIN Yesu iketupitoka irwan ipu. Adiopepak koanyutu ikiesisiak bala 500 nges. Ketakanikin ngesi kes, ijeni ijo nunyoika inera Yesu kakes? Ajakanut naka Edeke. Ijukunit Yawe Yesu akwap asisianakin nuka Ajakanut. Iyatakit ngesi aswam nu akaulo da na ajarun.

Iitut ijo inyo ajakanut naka Edeke? Eebo, Ajakanut erai apugan naka Edeke kokuju, ido Yesu nges Lo eseunit Edeke araut ekabaka. Kwape kisiisiautor, abu Yesu kitodu ebe ebuni ngesi araun ekabaka loejok na etanyamia luetengei, eitangaleuna luadekasi, ka aitajarun ikatwak da!

Aso ne ipuga Yesu kokuju ikaru elukumit, ikwaikini bo ai akwap? Eebo, akwap kere ijulakinio araun paradais. Emameunos do ijisio erai epali, arai adekasinei karaida atwanare. Ijeni oni ebe erai na abeit naarai iswamat Edeke akwap araut aparadais kanu itunga ailel. Ngupengun eswamaunia ngesi emanikor loka Eden kageunet. Ido ebuni Yesu aanyun ebe nuekot Edeke itodolikinos.

Adolu do kwana apak Yesu abongor kuju. Adau Yesu apaarasia 40 itodinikin ikesisiak. Aso ejenete cut ebe ejari bobo ngesi. Konye eringa ejalakina ikesisiak kolimok kes: ‘Kosalakisi Yerusalem kiton naidumuniata emoyo lokalaunan.’ Emoyo lokalaunan nges agogongu naka Edeke, kwape ekwam loekusi, loingarakini iketupitok aswam akote naka Edeke. Kengetakini, ebala Yesu: ‘Kolimonokis nuikamunitos eong akwapin kere.’

Kedau Yesu einer nu, katakanu ibore yen eumokina. Kogeu ngesi alosit kuju kwape isesenia ijo kane. Kanen kiteribo edou nges kakonyenekec, mam bobo ikesisiak apotu koanyutu Yesu. Kolot Yesu kuju, kogeu aipuga iketupitok kakwap kangina.