ETUNGANAN loekukokina kane erai Sitepan. Erai ngesi ekesisian lomunot loka Yesu. Konye koany nu ejaas aiswamaikin nges kwana! Ibiribirete itunga lu ngesi kamor nutieik. Kanukinyo engaratar kesi Sitepan noi kiton aiswamaikin nges ibore yenerono? Aanyutu ber oni.

Kengarakit Edeke Sitepan aswam nukaumokin. Mam itunga lu ekostos nu, aso kogeut epeget kanges nuikamunitos aisisianakin ke itunga nuka abeit. Konye koinak Edeke Sitepan acoa naepol, ido kitodu Sitepan ebe, esisianakinete itunga lu nukaisab. Kiyatakis nu kesi aitakadikin kesi noi. Aso kikamut nges, konyarautu itunga asabakin nges akiro.

Kingit esasedoti loapolon Sitepan: ‘Eraas akiro nuabeit?’ Kobongok Sitepan kotoma oiner loajok lo alomunit ko Baibuli. Kedauni ngesi, abu kitodu epone lo angaratar itunga inabin luka Yawe lukolosek. Kanen kotema ngesi: ‘Yesi da iputosi kwape itunga ngul. Apotu koarata Yesu ebulesit loka Edeke, ido mam irimarito ikisila luka Edeke.’

Kitakadikis nu ikayaitok luka ediini noi! Kiriamanakis ikelakec kanyunyura. Konye kikeu Sitepan akekou kuju, kotema: ‘Koany! Aany eong Yesu ebwoi kakan nakoteten naka Edeke kokuju.’ Kibwaikis itunga lu akanin akiikec kosomakinos Sitepan. Kikamut nges, kiriasi kinga nakore.

Kane kolacasi ikecenapen koinakis ekatumunan Saul aidar. Ianyut ijo Saul? Kogeut itunga icie aibiribir Sitepan kamor. Kokukokin Sitepan, kwape isesenia ijo, kilip nejai Edeke: ‘Yawe, mam itisilari kes kanu aronis na.’ Ejeni ngesi ebe icie kakesi erai ikayaitok luka ediini etaparete. Kotwani do Sitepan.

Kiswamak ijo itunganan nueroko, itami ijo aisirieb kes da, arai bo aingit Edeke kisirieb kes? Mam ngun erai nuabu Sitepan arai Yesu kiswama. Asiaka kesi kanejaas ngul da lumam asiaka kanekec. Aso katamata atupit kes.