IJENI ijo ingai ngol eperi ko kwap? Erai Saul. Kiitu, arai ngesi edari inapen kitunga luebiribirete Sitepan kamor. Koany aica naimilia ngin! Nunyoika iswamaas?

Kedaun aiar Sitepan, kingarenik Saul amoote ikatupitok luka Yesu kanu aisirieb kes. Kolot aimo kangolitogo ka airianar kesi kosodi agolonokin toma aidaris. Ikesisiak luipu apotu kokerata oreria icie ido kogeut alimonokin “akiro nukajokak” kangina. Konye kolot Saul oreria icie amoot ikatupitok luka Yesu. Ejai do kwana ngesi orot alosit Damasiko. Konye, korot, nukes nuamokin nu eswamaunos.

Atipet kimiliau aica nakebuni kokuju airimokin Saul. Kibirokin ngesi kwap kwape isesenia oni kane. Kosodi kotema eporoto: ‘Saul, Saul! Kanukinyo kisirieba eong?’ Koanyut itunga luejaas ka Saul aica kopuputu eporoto, konye mam kes emisikinitos nuinerai.

Ingit Saul: ‘Ingai bo ijo, Ejakait?’

Kobala eporoto: ‘Eong Yesu, loisiriebi ijo.’ Ebala Yesu nu naarai arai isiriebi Saul ikatupitok luka Yesu, epupi Yesu bala nges elope isiriebio.

Kingit do kwana Saul: ‘Ekwaikini ai, Ejakait?’

‘Konyou kolot Damasiko,’ ebala Yesu. ‘Kangina kilimokinio nuibusakinit aswam.’ Kenyou Saul kokwap kosodi aikweny, mam eanyuni ibore. Emudukana ngesi! Aso kitingata itunga luejaas kanges akekan korikos nges kiton Damasiko.

Kinerakinos do kwana Yesu kediopet osisiak ke luajaas Damasiko, kobala ebe: ‘Konyou, anania. Kolot orot loenyaritai Loitenara. Kotogo loka Yuda, kingitu etunganan loenyaritai Saul. Aseunit eong nges araut ekabulesit loitegelikina.’

Korima anania. Kiriamunos ngesi ka Saul, kidokak nges akekanin kobala: ‘Eyakunit Ejakait eong tetere ijo ikwenyuni bobo ido kilelebi emoyo lokalaunan.’ Atipet kodooto iboro kakonyeneke bala aabel, kokweny bobo Saul.

Itwasamao Saul kopone loepol kanu alimonokin itunga luka akwapin nuipu. Kojenun kwape ekiyakia Paul, loibuni oni aisisiaun nuke nuipu. Konye nasodit, aanyutu inyo iyakiarit Edeke Petero aswam.