KOANY ikito luewojak, aturo nuelaete ka imor. Mam kereka ne elai? Koany esapat itanyami etiang kakanike. Koany bobo ingatunyo ka ibalasin ebwoete konya. Mam ti ijo ikoto aiboi kotogo kotoma aibois kwanat kana?

Ekoto Edeke ijo aiboi ikar kere kakwap kotoma paradais. Ido mam nges ekoto ijo ajaun kede ican ka apipil naejaatar itunga lolo. Na nges aisumunet naka Ebaibuli kanukangul luepote aiboi kotoma aparadais nakitetet: ‘Ebuni Edeke ajaun kakaes. Mam bobo ejaun atwanare arai aimony arai ariebo. Atuboros numojong.’

Ebuni Yesu aanyun ebe aijulakinet naitegelikina na iswamaun. Ijeni ijo wori? Eebo, akaulo na elemara ngesi aronis kere kakwap ka itunga lukarokok. Kiit, kokwap abu Yesu kitangaleu lua dekasia adekasinei nuagelela, itajaru ikatwak da. Eswamauni Yesu nu kanu aitodun nuebuni ngesi aiswamaun kakwap kere keraun ngesi Ekabaka loka ajakanut naka Edeke.

Koomoom ber epone loejokuunia aparadais nakitetet kakwap! Yesu, nepepe ka kangul lueseuni ngesi idis, ipugaete kokuju. Ikepugak lu epote aidar nginitungan kakwap ido aanyun ebe iyalamas kesi. Aanyutu inyo ibusakinit oni aswam tetere Edeke inakini oni aijar namam edaun kotoma aparadais ke nakitetet.