1. Kanuka aima,aseunet ani epesikinitai ngaren naka itunga lolo?

ABALA Yesu ebe: “Ituŋanan yeniman ejai keoŋ ŋes yenikekoloka.” (Matayo 12:30) Ipedori oni ajaikin owai loka Yawe araibo awai loka Satan. Eomitos itunga luipu ebe ijaanakinete kes Edeke kopone kalo ecamunitor, konye ebala ebaibuli ebe ejai Satan “[aiŋaliŋal] akwapin kere.” (Apukokinio 12:9) Iyunitos itunga aritai ka aritai ebe emaete kes Edeke, konye emaete kes cut Satan Ekejodijodong! Epesikinitai aseunet ngaren naka itunga lolo: Ibusakinit kes aijaanakin Yawe “Edeke loka abeit” araibo Satan “papa da loka aiŋalanut.”​—Isabulin 31:5; Yokana 8:44.

2. Epone ediopet ani loetamitor Satan aitikokin itunga aima Yawe?

² Aseun aijaanakin Yawe nges aseunet na acoa, aseunet na eyauni aisimario naka Edeke. Konye mam Satan iyalama ka idio kere yenijaanakini Edeke, eyaununi nges ationis nejaas ngul lu ijaanakinete Edeke. Epone ediopet loiswama nges na nges ayaunun amoromoroo ka aitepegio kanejaa ice; itosomai da ipapero ka itunga lukokale. Ekwenyarit Yesu ebe: “Lukokale luka etuŋanan kes eraunos luka surupoke.”​—Matayo 10:36.

3. Arai itepegaata lukokalekon araibo ipaperokon aimakon naka Edeke, inyo iswamauni ijo?

³ Arai ketakanikis ngun ijo, anyoika iswamauni ijo? Itunga luipu ejenete ebe epone lo aima kec erono, konye ekuriaka atiakar awai. Eomitos kes ebe erai ngin amwangit itunga luka okale aswam ngun. Erai kereka ngin aomisiot naejok? Arai isisiau ijo ebe itunga lukokale itosomaete ikie lueroko, mam ijo  ikwenyari kes ebe ikie ngul eyaunete ationis naepol noi? Biai ti ijo imorikikin kakes aitosom ikie ngul?

4. Inyo abu Yosua kolimok Israelin kanuka aima kotoma aparasiake?

⁴ Abu Yosua icorak isiraelin ajalakin aswamisio nuka idiinin nueroko ka inonosio kalukapapaakec. Abala nges ebe: “Koyoŋata [Yawe], kijaanakis ŋes kamunonut ka abeit: Kolemasi idekesio luejaanakinete lukapapaakus kokekwa loka Ecor, Komisiri da; kijaanakis yesi [Yawe].” (Yosua 24:14) Arai Yosua lo amunokina Edeke, ido isirereng Yawe nges. Arai imunokina oni Yawe, isirerengi nges oni da.​—2 Samuel 22:26.

5. Kanukinyo ibusakinitor oni ainyekikin iboro kere luengicere aanyununeta?

⁵ Atiakar kotoma odini lokaisab nges do oni aicwear iboro kere luengicere aanyununeta, kwapenat enabia, imukisai ka atipe nukungabet ka amualai nuka amuronut. Epol na naarai itodunit ebe ipikakinit oni amunowok kere nejaai Yawe.

6. Inyo apotu Ikristayon lukolo sek iswamaata ka itaboi kec luka angic aanyununeta?

⁶ Koomom nuapotu Ikristayon lukolo iswamata ne aseunatar kes aijaanakin kotoma odini lokabeit. Ebala Ebaibuli ebe: “Itunga luipu kaŋul lukiswamaete nukamurwonut, kotukonokis ikeceitabon, kicweata kakonyen nuka ituŋa kere.”​—Aswamisio 19:19.

7. Inyoin iswamauni oni arai isurokis ajokin?

⁷ Ice luegeunete aijanakin Yawe ido lem olomaritos toma amuronut, aicud, ka aswamisio nuka aingic aanyununeta, epedorete ajokin asurokin. Arai ketakanikis ngul ijo, konyara Yawe noi kotoma ailip, kitosomai ekekiror. Ingarakini nges ijo.​—Awaragasia 18:10; Yakob 4:7.

8. Epone bo ani asesenatar Ikristayon adioput naegerer, karaida asima, karaida aputosia nuka edini nuitosomoa kotoma aima nakaisab?

⁸ Mam ibusakinit ngul luekotosi aijaanakin Yawe aidar karaida aitosom adioput naegerer, karaida asima karaida aputosia nuka edini nuerai atutubet naka aima, nakaisab. Ikristayon lukabeit “[elosete kotoma] aiyuun mere kanuka aanyun.” (2 Ikorinton 5:7) Itopoloritos kes ekisil loka Edeke loimikit aitosom adio asima kotoma aima.​—Anyoun 20:4, 5.

9. Aicoretait ani ijaikinit ebaibuli kanuka araun yenikacoa?

⁹ Ebala Ebaibuli ebe: “Koupenenas kalukacoa, icouni ijo da.” (Awaragasia 13:20) Arai ikoto oni acoun, ekoto oni aupa arai aimorikikin ka Ajenak luka Yawe. Eraasi kesi itunga luitoritos orot loebei toma aijar.​—Matayo 7:14.

10. Epone bo ani ingarakinatar ijo Ajenak luka Yawe aijaanakin Edeke?

¹⁰ Epodokinitos cut Ajenak itunga. Erai aswam kec aingarakin itunga luemunooko itaon amisikin abeit naka Ebaibuli na ingarenikini toma aijar namam edaun. Epedorete aingarakin ijo aisisia Ebaibuli atitai. Ebongonokinete kes aingiseta kon ka aitodikin ijo epone loitosomaet aijen naka Ebaibuli kotoma aijar kon.​—Yokana 17:3.

11. Epone bo ani ingarakinatar ijo aurianeta luka Ikristayon?

¹¹ Kotoma aurianeta kec, nuejaanakinos Aduketait Naka Ajakanut, isisiauni ijo nuipu nuikamunitos nuekot Yawe. Itogogongio eipud kon lo aijaanakin kotoma odini lokabeit. Ido idumuni bobo ijo aitutuorio kotoma oipone lo aingarakin ice da aisisiaun abeit naka Ebaibuli.​—Iburanian 10:24, 25.

12. Epone bo ani ingarakina ijo ailip aijaanakin Edeke?

¹² Kwa isisia ijo nuipu nuikamunitos akote ka alosikineta nuka Yawe, idulor do ailel kon kanuka aswamisio ke nukamina. Ibusakinit bobo ijo apoloo kotoma oipud kon lo aswam nuisialamikinitos nes ka ainac aswam nuitakadikinete nges. Kiitute  ebe ipedori adolokin Yawe kotoma ailip kanu aingitun nges aingarakin ijo aswam nuedolitos ka ainac nueroko.​—1 Ikorinton 6:9, 10; Ipilipin 4:6.

13. Epone bo ani ijaikina ijo etau loka Yawe alakar?

¹³ Koingaren, kwape ipoloo ijo komoyo, emameun do ijo abuonokin kanu araun Ajenan Loka Yawe loinakina, ido loibatisauna. Kotoma aimorikikin ka itunga luka Yawe, inakini do ijo etau loka Yawe alakar. (Awaragasia 27:11) Iraun ijo idiopet kotunga luiyalamas luebala Edeke ebe: “Eboikini tomakec alosenenei da kokidiŋikec, Araun eoŋ da Edekekec, kes da eraunos ikatuŋa.”​—2 Ikorinton 6:16.