1, 2. Inyoin iyunitos itunga luipu kanu ikamunitos ikatwak?

ITUNGA aritai ka aritai luka Afrika iyunitos ebe atwanare mam erai esange loka aijar, konye erai aijulakin, atubor aiboisit ace. Luipu eomitos ebe lukapapaa kec lu atwakata atuboros anyoun akwap ana etakani abear aiboisit naman etakani; anyoun aibois naka itunga abear aibois naka imoyoon.

² Iyunitai ebe lukapapaa lu, arai imoyoon kec epedorete aidar luesalitos ka abar naka ikalia kec kotoma akwap. Kotoma aomisioit kana, imoyoon kalukapapaa eraas ipapero lukagogong noi, luepedorete ayaun aidweny najokan, aitopol ejautenete ka aidar kotoma aimusungun. Aarai ejali ido itakadikinai, ebakai eyaunete ationis​—adeka, ecanit, ka aronis naepol.

3. Epone bo ani emaatar itunga ice lukapapaakec?

³ Itunga lukajarak iswamaete aswamisio ka asuban kanuka aitopoloritor ka aidaria edicane loajokan nepepe ka imoyoon kalukapapaa. Ideleleete aswamisio nu kotoma aronisio ka oinonosio luka aida, kwape nat aikweny iware kia ka apunya. Aima naka lukapapaa itodunitai orotin ice da. Kwapenat, ice itunga eroko ematara ajon, abukokinete adis ber kwap kanuka lukapapaa. Boboda, edaun aipo inyamat, ejalakinio inyamat amot tetere epotu lukapapaa, epedorete adumun ice bore yen enyamete.

4. Inyoin iyunitos itunga luipu kanu ekamunitos etau?

⁴ Ice itunga iyunitos ebe lukajarak ejaatatar etau lomam etwani, lo ekui atwanare naka akuan. Arai ejari itunganan aijar najokan, ebakai elosi etau ke kuju araai paradais, konye ejari itunganan aijar naronon, etubokinio etau ke akim namam edunge. Duc imorikinitos itunga aomisioit na kede aiyununeta nuka einono. Kwapenat, apapulai nuka ekanisa nu itijenarete nuikamunitos luatwak, kes duc etapit alimun ebe “atubor” itunganan arai “aeka nejaas lukapapaa.” Aiyuununeta nu kere elibunitos kotoma aomisiot ebe, etau araai emoyo nges ekui atwanare naka akuan. Inyo inera Ebaibuli kanu?

5, 6. Kotoma Obaibuli, inyo etau?

⁵ Itodunit Ebaibuli ebe etau mam erai ice bore yen ejai toma otunganan; etau nges itunganan ilopet. Kwapenat, ne asubuna Edeke Adam, “koraun etuŋanan etau lokajaran.” (Ageun 2:7) Mam aponi ijaikinai Adam etau; arai nges etau, etunganan kere.

⁶ Nges isiomia oni ebe eurio itunga [itaon]. (Ageun 46:18) Enyamete itunga [itaon] ido  elungete da. (Ilebin 7:20; Isabulin 35:13) Emonyete ido iiloros. (Yeremia 13:17; Yona 2:7) Epedoro akokoar, arukora, ka aiwen etau [etunganan, aijar] kotoma asua. (Ikisila 24:7; Isabulin 7:5; 105:18) Ibaibulin ice ijulakinitos akirot kangajep nasek kwape “etau” kokokoron kangul konye ice itosomaete akiro kwape “ajaran,” “isubasit,” arai “itunganan.” Apoloukec kere adiopet.

7. Ikokoron anu kobaibuli itodunitos ebe etwani etau?

⁷ Kwape eraar etau itunganan, etwana itunganan, etwani etau da. Ebala Esekiel 18:4 ebe: “Etau loiswamai aronis,​—nges etwani.” Boboda ebalas, Aswamisio 3:23 ebe: “Ŋinituŋanan [edio etau] yeniman iirari enabi ŋol emudiario kotuŋa.” Aso etau mam erai ibore yeniekui atwanare naka akuan.

8. Inyo emoyo lo ejaai otunga?

⁸ Emoyo mam eputos kede etau. Kotoma otunga, emoyo nges eyengane loka aijar loijaikit kes aswam aswamisio nuka aijar. Itupusio emoyo kede eletrisiti. Epedori agogong naka eletrisiti aiteker acuma na ekusi ekwam [afan] arai acuma na etililimere inyamat [efurigi], konye mam epedori aikut ekwam, arai atililim iboro. Kopone kangopengol, emoyo wok ingarakini oni asesen, aipup, ka aomoom. Konye emoyo bon mam epedori aswam idio koboro kalu arai emameete akonyen, akii, ka adama. Nges ebalar Ebaibuli nuikamunitos etunganan: “Elosi eiyeŋanake [emoyo], eboŋori alupoke; eoliorete aomisioke apaaran ŋipeŋin.”​—Isabulin 146:4.

9. Inyoin mam etau ka emoyo epedorete aswam?

⁹ Kotoma Obaibuli, mam etau karaida emoyo ejalakini akuan kotoma atwanare kosodi eyatakit aijar kotoma aibois naka imoyoon.

10. Inyoin bo inera Ebaibuli nuikamunitos ejautene loka lukatwak?

¹⁰ Ikoni bo ejautene kalukatwak ai? Kwape eraar Yawe lo asubi itunga, ejeni nges nu etakanikinete oni ne itwakia. Isisianakini Akekirot ebe lukatwak emameotor aijar, mam epedorete aipup, asesen, ainer ka aomoom idiobore. Ebala Ebaibuli:

• “Mam ikatwak . . . ejenete ibore.”​—Ekalimonokinan 9:5.

• “Aolio kwana aminakec ka alaitikec ka ekokotekec da.”​—Ekalimonokinan 9:6.

• “Emamei aswam, karaida ainerun, karaida aijen, karaida acoa, kokatwak, kama ilosi.”​—Ekalimonokinan 9:10.

11. Akaulo na Adam adiakar, inyoin bo abu Yawe kolimok nges?

¹¹ Koomoom nu inera Ebaibuli kanuka papaawok losodit, Adam. Kosub Yawe Adam kotoma “[apua] naka akwap.” (Ageun 2:7) Koraai Adam orimarite ekisil loka Yawe, ti nges ejar ikar kere kotoma aiyalama kakwap. Konye, abu Adam komwang ekisil loka Yawe, ido aitisilaret ke nges atwanare. Aibo obu Adam olot ne atwania? Alimokit nges Edeke: “[Iboŋori] alup, naarai nen ŋes kolo kilemunere; naarai irai ijo apua, iboŋori da apua.”​—Ageun 3:19.

12. Inyoin bo abu otakanik Adam ne atwania nges?

¹² Ai bo ajai Adam eroko Yawe esubuna nges kotoma apua? Amamei ne ajai nges. Mam nges ajai. Aso ne alimokina Yawe Adam ebe “iboŋori da apua,” Abala nges ebe emameunotor bobo Adam kede aijar, kwape apua. Mam Adam abu iboi kotoma aibois naka imoyoon. Mam nges abu ‘otubor’ toma aiboisit naka imoyoon kalukapapaa. Mam nges abu olot toma akuj arai akim. Abu nges kobongo toma ojautene lo kamamus ka aijar; abu nges omameun.

13. Katwanare, inyo etakaniki itunga ka itiang?

¹³ Etakanikini Ibore ngipengin itunga kere? Eebo, etakanikini. Itetemit Ebaibuli kwanata: “[Itunga ka itiang] elosete kere aibois adiopet; alomunete kere kapua, eboŋorete bobo kere apua.”​—Ekalimonokinan 3:19, 20.

14. Anyoin amun ejai kanuka ikatwak?

 ¹⁴ Isumunit Ebaibuli ebe itekenyuni Edeke ikatwak aijar kotoma paradais akwap. (Yokana 5:28, 29; Aswamisio 24:15) Konye eroko apak ngin eroko ejai ngaren. Kwapekwana, eroko kes ejotoete kotoma atwanare. (Yokana 11:11-14) Mam ibusakinit oni ayongit arai aima kes, kwape mam kes epedoratar aingarakin arai aimusung oni.

15, 16. Epone bo ani etamitor Satan aijaikin itunga aiyuun ebe mam ikatwak cut etwakitos?

¹⁵ Aomisiot na ebe mam oni itwaki erai aingalan na esiaraki Satan ekejodijon. Kanu ainakin itunga aiyuun angalan na, etamit Satan ka akejokin ajaikin itunga aomoom ebe, adek ka atiokisio ace eraasi nu eyaunitos imoyoon kalukatwak. Erai abeit ebe ace atiokisio erai ajokin akulepek eyaunete. Erai da abeit ebe atiokisio ace mam erai imoyoon eyaunete. Konye mam erai abeit ebe ationis ebuni ne ijaai oni kanejaasi ngul lu ejotoete kotoma atwanare.

¹⁶ Ejai bobo ecerot lo etamitotor ajokin aijaikina itunga aomoom ebe nu inera Ebaibuli kanu atwanare mam edolitos. Ingalanakinete kes itunga toma aomoom ebe eanyunitos arai inerakina kes kalukatwak. Iswamaete ajokin nu kotoma aitapoeta, arujasia, omurok, ka ace da. Konye mam itunga iriamakina ka ikatwak, iriamakina kes ka ajokin nu ijoseikinitos bala itunga lukatwak. Ngun nges itoronaritor Yawe imurok ka ngul lu ingisete lukatwak.​—Ikisila 18:10-12; Sekaria 10:2.