1. Inyoin etakanuni arai “[kikunyak] neejai Edeke?”

EMINA Yawe ngul luijaanakinete nges. Arai imai ijo Yawe, isirerengi nges ijo kwana, ka oingaren. Ebala Ebaibuli ebe: “Kikunyakis neejai Edeke, ŋes da ikunyuni mama ijaas.”​—Yakob 4:8.

2. Epone ani kikunyakinia neejai Edeke, ido epone ani etirora na ailip wok?

² Kanu aikunyakin neejai Edeke, ibusakinit ijo aisisia ka aitosom akekirot. Neilipia ijo kwape ejaar akoteke, epupokini Yawe alipasinei kon ido ebongokini kes. Ewadikaat Yokana ekeyakia ebe: “Na da ŋes atitiŋ nakija kaoni kamakeŋ, ebe, arai kilip ibore kwape ejaar akoteke, kipupuni ŋesi oni. Arai kijeni ebe kipupuni ŋes oni, ŋin kere yenikilipi, kijeni ebe kidumu iboro lukilipit kamakeŋ.”​—1 Yokana 5:14, 15.

3-7. Opone ani ipedoria oni adumun acoa naka Edeke, ido ingarakini oni opone ali?

³ Bobo kwape ikunyakina ijo neejai Edeke, ijaikini nges ijo acoa naitosomai nginipaaran kanuka akiro nuka aijar. Ebala Ebaibuli “Arai ejai kayes yeniwolikinit acoa, kilip Edeke.”​—Yakob 1:5.

⁴ Epone ani ingarakina ijo acoa naka Edeke? Ibore idiopet, ingarakini ijo ajenun iboro luitakadikinete Yawe. Ijenuni bobo ijo kanukinyo erokatar iboro kwana ka nu ibusakinit ijo aswam anu anac aiyatakit kes. Idari aijen ngin ijo kotoma atiokisio nu eridakitos itunga kere. Kwape aanyunet, arimaar aicorakinet naka Edeke apaikin ilai kotoma oponesio, ingarakit itunga luka Edeke kotoma apotuunun namam ekotoi, adekasinei nu ekorasi kotoma aeyelo, ka edukone lomam iyalama, araibo luatiakatiakaunos.

⁵ Inyo bobo epedori acoa naka Edeke aiswamaikin ijo? Epedori aingarakin ijo adun nuipu kotoma aijar. Ingarakini ijo aise atubetaa nukacoa kotoma akiro nuduc, kwape nat aitosom ikonisirigin. Ipedori ijo aitup alosikineta nuajokak ka ainger alosikineta nuemamei ameda.

⁶ Ingarakini bobo ijo acoa naka Edeke kotoma kodicanekon kaluce. Ijaunotor ijo ka aijar nakokale naiyalama. Ipedori ijo adukun epaparone lokabeit loedauni aojau kaluce ido idumuni ijo ayongio, kanejaas ngul lumam ijaanakinete Edeke da.

⁷ Bobo, ajaut ka acoa naka Edeke itacauni aijar kon. Ingarakini ijo aipikor atiokisio nuka aijar ka aitakadikineta. Ijaunotor bobo ijo ka amun na eriana ido najokan kanuka anu oingaren. Amun najokan eyauni angaleu toma aomisio ka akuan kon.​—Awaragasia 14:30; Isaia 48:17.

8. Arai ijaanak ijo Edeke, inyoin mam ijo ikurianar?

⁸ Arai ijaanakini ijo Edeke lokabeit, idumuni ijo ailapadaara kotoma akuriau naitapasi ngul lumam ijaanakinete nges. Mam ijo ikuriana ngul lu atwaka naarai ijeni ijo ebe emamei kes aijar kotoma atesin. Naarai imunokina ijo toma aisumuneta nuka Edeke aitajarun lukatwak, mam ijo ikurianar atwanare. Kwape ijenia ijo ebe erai Edeke lokapedor kere, mam ijo  ikurianar amuronut karaida aicud.​—Yokana 8:32.

9-11. Lu angai rwaru iboiete kotoma Paradais, ido lu angai mam?

⁹ Arai ikunyaki ijo neejai Edeke, mam ijo ikurianar nuka oingaren. Kwape idauna oni aanyun, adwarit Ebaibuli atiokisio nuipu nuiseseni oni akwap lolo. Ilimokit oni Yawe ebe iboro lu eraas luedaunete apak naedit, edodor Ajakanut naka Edeke aitaraun Akwap na paradais.​—Luka 21:10, 11, 31; 23:43.

¹⁰ Ngul luikunyakinete neejai Yawe kosodete aijaanakin nges bon elomarete toma Paradais. Ebala Ebaibuli ebe: “Naarai kapak naedit, emameun ikaronon: eebo, irerei cut akebois, ido emameun. Konye luitasonos irumete akwap iyalamanakinos kainapakin naeiliili.”​—Isabulin 37:10, 11.

¹¹ Ngul lu ipalikinete cut aigir ikisila luedolitos luka Edeke etwakiarete aijar kec ikar kere. (2 Isesalonikan 1:8, 9) Emameunos kes cut. Imorikikinos kes nepepe ka Satan ka akejokin kotoma atwanare namam edaun. Konye ngul lu isisiaunete nuikamunitos Yawe kosodete aijaanakin nges edumunete ainapakin naeiliili kotoma Paradais akwap.

12. Inyoin inera Ebaibuli kanu koingaren?

¹² Ejaatar Yawe ka iboro luejokak odula kanuka ngul lu eminas nges! Koany nuebala Akekirot nuikamunitos aijar kotoma Paradais akwap.

• Idiliunete inyamat luenyamio: “Idiliunete akima kakwap kaidiasia nuka iroŋan.”​—Isabulin 72:16.

• Itogoi luajokak: “Edukete itogoi, iboiete kotoma.”​—Isaia 65:21.

• Aswam naitileli: “Elelakinete aswam naka akaninikec. Mam itaaritos atai.”​—Isaia 65:22, 23.

• Emameun adeka: “Ioiboienenei kanen mam ebala ebe, ‘Adek eoŋ.’”​—Isaia 33:24.

• Emameun angwalus: “Kosodete akonye nuka imudukiok akwenyun, epukorio aki nuka imajiŋa. Kosodi eŋwalas asomanar kwape amiam, eyei aŋajep naka ebaŋi.”​—Isaia 35:5, 6.

• Emameun ariebo, akuudian, atware: “Emwatar [Edeke] akiyo kere kakonyenekec, mam bobo ejaun atware, karaida akuudian, karaida aimony, karaida ariebo, mam bobo ejaunos; naarai atuboros nusodit.”​—Apukokinio 21:4.

• Emameun ejie: “Itasaŋi [Edeke] ijiisio kiton osaŋe loka akwap.”​—Isabulin 46:9.

• Aijar namam edaun: “Irumete Ikadolitok akwap, Ebusete kotoma ikar kere.”​—Isabulin 37:29.

13. Lukaingai bon epedorete aitaraun akwap na paradais, ido kanukinyo?

¹³ Mam itunga cut epedorete ayangaun iboro kwanat anu, konye ejaatar Yawe apedor naiswamaunet nuebala nges aswam. Emamei idiobore yenisimiki nges aiswamaun nuekoto nges aswam. Ebala Ebaibuli ebe: “Naarai emamei akirot naikaruni Edeke.”​—Luka 1:37.

14. Opone ani ipedora ijo adumuni erot lo ebei toma aijar namam edauni?

¹⁴ Kotoma Ajenak ke, ijaikit Yawe itunga kere arereng na aseuun “[alomar] aitor orute loediding” ido aitor orot lo ebei toma aijar namam edaun. Oraun ijo da idiopet otunga luiyalamasi luacamutu anyarauno ngin. Oraun ijo da yenijaanakini kotoma odini lokabeit kosodi ainumunum arerengusio nuka Yawe ikar kere!​—Matayo 7:13, 14.