ATUTUBET 1
Isisianakinete Idiinin Kere Abeit?
1. Anibo ice odinin luitwasamoo kotoma Afrika?
ANGINITUNGANAN ti kere, kotoma Afrika ecamu ebe edolit aima Edeke. Konye, edit acamanara kopone kalo ibusakinitor amaia nges. Ice emaete kotoma omisikiti, ice elosete toma abila. Ice da bobo iriamumunos okanisa. Konye erono do aomoom ebe ejaas idiinin iuni bon toma Afrika. Kotoma Osiriamun ejaa ikisila ka aiyununeta nu egelegela. Edini loka einono enyanyara noi ageun aboisit kiton aboisit. Kotoma okanisan kalu ebalasi ebe Ikristayoon, ejaai do atiakatiaka na epol. Aidokokin toma okanisan luejenasi, ejaa bobo ikanisan ilukumin lu eyaikina bon anatar Afrika kere.
Ibusakinit Edini Wok Kosipo Kotoma Abeit
2. (a) Inyoin duc itijenuni edini loka itunganan? (b) Inyoin bo itodunit ebe mam edini wok isialamikit Edeke?
2 Kanukinyo emaatar itunga kwangin? Itunga luipu ecamunete edini loka iuriak kec. Atakanuneta nu kolosek, ijaikinitos itunga ageunet naka edini lo itwasamaete lolo. Ebala etabo The Africans—A Triple Heritage ebe: “Edini loka Isiriamun abu opolor kagolitomei naka Sahara kotoma abilununio na eswamaete akwapin nuka isiriamum, . . . Ekristayone da abu kopoloor kotoma engalakimak naka Sahara kopone kangopongon. Aso arai epoloor edini loka Isiriamun agolitomei naka Sahara kanuka aitukurian itunga ka ekileng kanu acamun edini, abu do Ekristayone da opoloor engalakimak naka Osahara kanuka aitukurian itunga kede emudu.” Konye luipu kaoni icamunit ebe edini wok isialamikinit Edeke. Konye mam edini erauni loka abeit naraai ijanakinete auriak wok kotoma ke araibo abu akwap ace obuik luka papaawok edini ngol.
3-5. Aitupuset ani ingarakini oni ajenun ebe mam idiinin kere isisianakinete abeit?
3 Karai da nat ebalasi idiinin kere ebe ijaaikinitos kesi aingarenikinio namunot kanuka aijanakina Edeke, aomisio kec etiakatiaka. Isisianakinete iboro luipu lu egelegela luikamunitos ingai bo Edeke ka inyo emuno nges kamawok. Koomoomon ber ijo kanu: Orai ijo odumunite aswam katukot naepol. Aparaan kanasodit naka aswam, abu ijo isisiau ebe emamei lo apolon, ejai aiyen. Kosodi ijo aingit iswamak iuni nu ibusakinit ijo aswam. Alimoki losodit ijo ebe, ekoto lo apolon ijo apie ekai. Alimoki loiareet ijo ebe, ekotoi ijo aicul aduketait. Alimoki louniet ijo aikor ibaluwan.
4 Iyatak ijo aingit iswamak nuikamunitos lo apolon. Ebala losodit ebe loapolon, erai atumunan, eoja, odedeng. Ebala lokiaret ebe euriana, emojongit, ido epatana loapolon. Ebala lokiuniet ebe, loapolon mam erai ekilokit cut—loapolon erai aberu. Ecepak, ijenikini do ijo ebe iswamak iuni luu kere mam inerasi abeit. Arai ikoto ijo aidar akoniswam, ekotokin ijo aingic kanu ajenun ingai bo loapolon ido inyo ekoto nges ijo aswam.
5 Erai kwapekwangin da keda edini. Naraai ipu aomisio nuikamunitos ingai bo Edeke ido inyo ekoto nges kamawok, ekoto do oni aanyun ebe aimawok ecamanara ka abeit. Konye epone bo ani isisiauna oni abeit na ikamunit Edeke?
