ATUTUBET 3
Lukangai Iboiete Aibois Naka Imoyoon?
1. Epone bo ani itupusitere edini loka einono kwape atitipo?
AYUNUNETA nuka idiinin nuka Afrika itirianitai kede atitipo. Kuju na atitipo nges ejaai Edeke, lo eyait kere kotoma apedorosia nuka emoyo. Osepon ke nges ejaa idekesio ludidik, arai imoyoon, ijaanakinak luka Edeke. Ejaa lukapapaa kakes, luitunitos ikalia kec kotoma akwap ido opodokinitos ejautene kec. Asipetait ke do nges ejaasi apedorosia nudidik nuka emoyo: angic aanyununeta, amuronut, ka aicud.
2. Epone ani itodunitor alimunet adiopet naka Afrika ebe aiyununeta nuka einono ejaatar ka apedor toma odinin?
2 Aiyununeta nuka einono nu ajaunotor ka apedor na epol toma odinin ice kotoma Afrika. Epikakinit alimunet adiopet naka Afrika kwana: “Araut (Ekristayot arai Esiriamut) mam imiki isio aima idekesio lu akwap kosi.”
3. Aibo isisiauna oni abeit na ikamunit ngul lu iboiete kotoma aibois naka imoyoon?
3 Edolitos cut aiyununeta nuka einono loka Afrika? Elimokinit oni Ebaibuli abeit na ngul lu iboete aiboisit naka imoyoon kotoma akirotoke, Obaibuli.
Yawe, Edeke Lokabeit
4. Abwoeitait ani ecamanarotor idiinin luejenas kotoma Afrika?
4 Idiniin iuni luejenen luka Afrika ecamunitos ebe ejai Edeke ido nges eyait kere. Itejenunit nges Ebaibuli kwape “Edeke loka idekesio, ejakait da loka ijaka, Edeke lokos, lokapedor, loketasuro.” (Ikisila 10:17) Isiriamun da iyunitos Edeke ediopet lo eyait kere. Nuikamunitos edini loka einono kotoma Afrika, ebala epiriotit Geoffrey Parrinder ebe: “Itunga luka Afrika luipu iyunitos, Edeke loyait kere, papa loka idekesio, ka itunga, lokasuban akuj ka akwap.”
5. Anibo ice ikiroria luitosomaeneno atiakunitor Edeke?
5 Karaida enyanyara aiyun naka Edeke, itunga luipu emameotor aijen na ecai naikamunit ingai bo Edeke. Ibore yenisodit kotoma ajenun itunganan nges aisisiaun ekekiror. Nuikamunito ekiror loka Edeke, ejai aigurokina kokiding idinin. Kotoma okristayon luesoswai, enyaritai nges duc kwape Edeke, adoketait na, apolouke “Lokapedor.” Kotoma Osiriamun, erai nges Allah. Kotoma ngul luitosomaete edini loka einono, ekiror loitosomao atiakuna ngol Lo Eyait Kere egelanakin kotoma angajep adiopet kiton ace. Kotoma oitabo ke Concepts of God in Africa, imarit John S. Mbiti ikiroria ka adoketa nu edeparitos 500 nuegelegela nuka Edeke kotoma Afrika. Kwape awanyunet, kotoma anyajep na Yoruba (Nigeria), enyaritai Edeke Olodumare; nejaasi Ikikuyun (Kenya), erai Ngai; ido ko Zulu (South Africa), erai Unkulunkulu.
6, 7. Ingai bo ekiror loka Edeke, ido epone bo ani ijenuna oni nges?
6 Biai ebala Edeke kanu ekekiror? Ne ecorakina Edeke Musa aingarenikin Isirailin anyoun ko Misiri, Abu Musa kingit: “Koany, naadolokinio eoŋ idwe luka Isirael, kalimokin kes ebe, ‘Edeke loka lukapapaakus ŋes keyakunit mama ijaas yesi;’ kes da keŋisete eoŋ ebe, ‘Ekekiror iŋai?’ [A]limokini kes biai?”—Anyoun 3:13.
7 Kotema Edeke Musa atiar: “Eoŋ Yawe: Abu ketaanyikin Aburaam, ka Isaak, ka Yakob, kwape Edeke Lokapedor kere, konye toma okirorika Yawe mam apotu kajenut eoŋ.” (Anyoun 6:2, 3) Ekiror Yawe nges ejai adepar irwan 7,000 kotoma aiwadikaeta nuka Ebaibuli, karaida isesakinitos icejulak Ebaibuli, ekiror ngol keda adoketa “Edeke” arai “Ejakait.”
8. Ikoni bo Yawe ai, ido inyo ibusakinit oni aswam arai ikoto oni akesianut?
8 Ikoni bo Yawe ai? Erai nges emoyo, lokapedor kere, lokaibuses. Nges eyait kere, lomam itirianio, keda emamei yen eriakatar. (Ikisila 6:4; Isaia 44:6) Kotema Yawe Musa atiar: “Eoŋ Ejakait [“Yawe,” NW] Ekonideke arai Edeke lokekolo.” Katemasi ebe, arai ikoto oni adumun asianut naka Yawe, ibusakinit oni aima nges bon. Mam Nges ekoto oni aima icebore arai idiotunganan.—Anyoun 20:3-5.
Yesu Kristo, Ekabaka Loka Ajakanut Naka Edeke
9. Kanukinyo itemara oni ebe mam Yesu eriakasi ka Yawe?
9 Ejai lolo aigurokina na epol noi naikamunit ingai bo Yesu. Luipu kokristayon lukesoswai iyunitos ebe erai Yesu atutubet naka Etriniti “Lokalaunan.” Konye, mam Ebaibuli isisianakini ebe erai Edeke itunga iuni kotoma odiope. Ido mam isisianakini ebe eriakasi Yesu ka Yawe. Abala Yesu elopet ebe: “Papa ŋes lokapolon adepar eoŋ.”—Yokana 14:28.
10. Aibo ajai Yesu eroko ebuno toma akwap?
10 Isisianakini Ebaibuli ebe eroko Yesu kiboyoo kakwap kwape etunganan, iboit nges kokuju kwape esubasit lomoyo lokapedor. Kwape asubuna Yawe Adam ka Keba akwap, kwapekwangin esubit nges isuban lumoyoon kokuju. Yesu nges esubasit lomoyo losodit Yawe asubun.—Yokana 17:5; Ikolosain 1:15.
11. Epone bo ani aurunere Yesu kwape etunganan?
11 Ikar 2,000 ko kau, abu Yawe isujulic aijar naka esubasit lomoyo loo, toma auris naka abekot nanyaritai Mariam. Abu emalaika Gabriel kotema nges atiar: “Ipotuuni, idouni ikoku yenitelepat, imaikini ekekiror Yesu. Irumi [kwape ekabaka] . . . ; akejakanut da mam enaŋi.”—Luka 1:31, 33. *
12. Anyoin alosikinet adiopet na abunitor Yesu toma akwap?
12 Aso ourunai Yesu, opoloor oraun ekiliokit, ido isisianak itunga akote ka alosikinet naka Yawe. Abu Nges kolimok ekayaiton loka Rome ebe: “Kauritai eoŋ kanuka ŋun, kanuka ŋun da abu kabu akwapin, tetere etejenuni abeit.” (Yokana 18:37) Kotoma omoomooenen nu esisianakini Yesu, isisiauni oni abeit naikamunit akote ka alosikinet naka Edeke. Isisiauni oni epone lodumunet aisimario naka Edeke.
13. Anyoin alosikinet nakiaret na abunitor Yesu toma akwap?
13 Alosikinet nakiaret na abunio Yesu toma akwap nges aijaikin akeijair kwape alucet kanuka itunga. (Matayo 20:28) Iswamat nges na tetere elakakino oni kotoma adiakar na apotu kerumutu kanejai papaawok Adam. Ijaikini na, oni apedor na aijar ikar kere. Iwadikat Yokana ekeyakia: “Komina Edeke akwapin kwanata, abu koinak okokuke loteluna, tetere ŋinituŋanan yeniyuuni ŋes kinye aolior, konye kojaas kaijar naka ikar kere.”—Yokana 3:16.
14. (a) Inyo obu otakanik Yesu akaulo na atwanare ke kwape etunganan? (b) Anyoin adoketait naka Yesu kotoma akuj kwana?
14 Akaulo na atwanare ke, itajarunai Yesu abongor kuju ne abongokinia nges aijar kwape esubasit lomoyo lokagogong noi. (Aswamisio 2:32, 33) Akaulo, abu Yawe koinaki nges “ayait, ka aibuses, ka ajakanut, tetere ijaanakinete ŋes ituŋa kere, ka atekerin, ka aŋajepa.” (Daniel 7:13, 14) Aso, kwape alimokinitor emalaika Mariam, etarauun Yesu Ekabaka loka apugan naka okuju naka Yawe. Edodor do nges aitodun akepedor kotoma akwap kere.
Imalaikan, Ikejaanakinak Luka Edeke
15. Iwori, ido ai esubakinitai imalaikan?
15 Mam erai Yawe ka Yesu bon iboiete kotoma aibois naka imoyoon. Esubit Yawe ice isuban lumoyoon, kes imalaikan. Gaburiel lo eneraas ka Mariam nges ediopet kakes. Mam imalaikan egeunitos akecejar kwape itunga kakwap. Esubakinitai kes kuju sek eroko esubakina itunga toma akwap. (Yob 38:4-7) Ejaa aritai ka aritai nuka imalaikan.—Daniel 7:10.
Imalaikan lumunon engeritos amaio
16. Kanukinyo mam ibusakinitor itunga aima imalaikan?
16 Imalaikan lu emunooko mam ecamunitos oni aima kes. Irwanaarei, neatamitor Yokana ekeyakia aima imalaikan, kicorakis nges kobalas: “[Kocoite!] Sirikiswama kwangin! . . . Koma Edeke.”—Apukokinio 19:10; 22:8, 9.
17. Inyo itodunit ebe epedorete imalaikan aidar ijanakinak luka Edeke, ido kanukinyo eraar yen ibore yeni italakari?
17 Mam bobo imalaikan itaanyanakinos itunga luka Edeke kakwap, kwape eswamatar ne alakunatar ikeyakia luka Yesu aidaris. (Aswamisio 5:18, 19) Karaida ejaa ngul, arai imaai oni Yawe kotoma akirot ke, Ebaibuli, imunokin ebe idarete imalaikan lumam etakanete luka Edeke oni. Ebala Ebaibuli: “Idukuri emalaika loka [Yawe] alukun ŋul lueyoŋito ŋes, Eyuuni da kes.” (Isabulin 34:7; 91:11) Kanukinyo kitalakara na oni? Naraai ejaa lukasurup lueroko toma aibois naka imoyoon lu ekotosi amudiar oni!
Satan, Loasurup Loka Edeke
18. (a) Kanukinyo epalikina emalaika ediopet Edeke? (b) Ikiroria anu aponi ijaikinai emalaika lo?
18 Mam imalaikan kere luka Edeke apotu opaikis emunookina nejaai Edeke. Apotu ice ipalikis nges. Apotu oraunos luasurup luka Edeke ka luasurup luka itunga, akwap. Epone bo ani atakanunatar nu? Isuban luimalaikan kere lu asubit Yawe araas lu adolitos ido ojokak kwape Yawe elopet. Konye, abu ediopet komalaikan okotokin itunga aima nges ido abu kiswama kwape ajaar ekeipud lo aronon. Esubasit ngol lomoyo aponi omaikinai ekiror Satan apolou ke “Etepegan [loka Edeke].” Enyaritai bobo nges Ekejodijodong, apolouke “Ekasaban,” kwape inerar nges aisab naronon mama ejai Yawe.
19. Kanukinyo ido opone bo ani etisilanara Satan Yob?
19 Ebuinikini Satan itunga aimorikikin kanges aipalikin Edeke. Koomoom nu abu nges iswamaik Yob ejaanakinan lomunot loka Edeke. Arai Yob etunganan lo abarit noi. Ajaatar nges amerekin 7,000, akaalai 3,000, akituk ka imongin 1,000, ayatakin asigirian 500. Ajaatar nges bobo idwe itomon ka ikiyakia luipu. Nasodit, koara Satan itiang ka ikiyakia luka Yob. Iyatakini, koyau Satan “ekwam loepol” abilibilar etogo, aarar idwe luka Yob kere. Akaulo kangun, kitedek Yob abusion nuetioko “anyoun kotau loka akejuke kiton osiadukuke.”—Yob 1:3-19; 2:7.
20. (a) Epone bo ani aropere Yob kanu abeite ke? (b) Karaida arai Yob lo amunokina Edeke, inyoin bo eswamaiki Satan itunga ice luipu?
20 Karaida ejai aitemosit na edwar, abu Yob opaik emunokina Edeke. Abu Yawe itangaleu nges ido “konaik ejakait Yob irwan aarei adepar ŋul luajaatar nasodit.” (Yob 42:10) Komen Satan aibil abeite naka Yob, konye apedo aibelokin luipu kanejai Edeke. Ebala Ebaibuli: “Iboete da akwapin kere kotoma lokaronon.”—1 Yokana 5:19.
21. (a) Epone ani etoduna Satan eipud ke lo akot amaio? (b) Kanukinyo angerio Yesu aima Satan?
21 Ekoto Satan oni aima nges. Itacaunitai na kotoma acodunio naka Yesu ikar 2,000 ko kau. Itetemit Ebaibuli: “Koyaŋa bobo Satan ŋes oroŋat loicelelei noi, kitodianak ajakanuto kere nuka akwap, ka aibusesukec; kotema ŋes atiar, ‘Kainakini ŋun kere, arai kibiror aima eoŋ.’” Konger Yesu, kotema nges atiar “Irwa, Satan; naarai iwadikatai ebe, Komaenenei [Yawe] Ekonideke, Kijaanakinenei ŋes bon.’” (Matayo 4:8-10) Ajeni Yesu ejok ekisil loka Yawe, ido mam abu iswama nu akoto Satan.
Ajokin, Imoyoon Luarokok
22. Inyo eswamaikisi ajokin itunga?
22 Apotu ice omalaikan imorikikinos ka Satan kotoma aipalikin Edeke. Imalaikan lueraas ajokin eraa lukasurup luka itunga kotoma akwap. Ededeng ido eroko. Kolo, ejaikinitos ice-tunga kamamus einer ka amudukanar. (Matayo 9:32, 33; 12:22) Apotu ijaikis ice adek arai abanganar. (Matayo 17:15, 18; Marako 5:2-5) Itisilanaritos idwe da.—Luka 9:42.
23. (a) Inyo ekotosi imoyoon luarokok kanejaasi itunga? (b) Inyo engalak Satan ka ajokin itunga aswam?
23 Kwape Satan, ekotos imoyoon luarokok lu amaio. Itia ainger aima naka itunga—karaida ejenete ebe erai aima na ijaikinio Yawe bon—imielas kesi, emoete da ido itopoloritos. Kotoma aijodijod, aingala, ka akuriau, ejaiki Satan ka ajokin itunga aima kes. Abeit cut, mam itunga luipu ejenete ebe emaete kes Satan ka ajokin. Eriengunete itunga luipu isisiaun ebe edini kec itopolorit Satan. Konye, ikwenyarit Ebaibuli ebe: “Lueinakinete ikapirin, einakinete mama ejaas ajokin, kwabo mere Edeke.”—1 Ikorinton 10:20.
24. Inyo ediope epone lo itosomai Satan aitapara itunga?
24 Erot ediopet lo itapara Satan ka akejokin itunga nges asiarakin aomisio nukarokok nuikamunitos lukatwak. Kaanyutu nu isisianakini Ebaibuli kanu.
^ atu. 11 Itejenarit Ekoran aurio naa nakaumokin naka Yesu Kosula 19 (Mariam). Ebala: “Apotu kejukakisi [Mariam] emoyo Kosi kotoma aputo naka etunganan loepolorit. Keanyu Mariam nges kotema: ‘Koyua Loketimon eong kamakon! Araai iyongit ijo Ejakait, kojalak eong ido kolot.’ ‘Arai eong eyakia loka Ejakait kon,’ ‘ido abunit aijaikin ijo esapat lokalaunan.’ Kobong nges ebe ‘epone ani auruna ikoku naraai arai eong abekot, naman atirorit ekilokit?’ Konbong nges ebe ‘Ngin nges akot na Ejakait kon.’ ‘Mam ngin erai ibore yen etionikini Nges. “Erauni nges aanyunet kotoma otunga” ebala Ejakait, “ido arerengu Komamakosi. Na nges aicorakinet Kosi.”’”
