1. Inyoin bo ibusakinit oni aswam kanu aisialamikin Edeke?

KANU ainumunum edicane lokajokan lokaminanar ka Edeke, ibusakinit oni komam aiswamanara kediopone kere keda edini lokaisab. Ibusakinit oni aijaanakin kotoma odini lokabeit. Lolo itunga aritai ka aritai akwap kere iswamaete kwangin.

2. Aibo edumakino Ajenak luka Yawe, ido anyoin aswam kec?

² Kwape adwaritor Ebaibuli, amaak lukabeit arautu “ekodet loepol noi,” luelomunitos kotoma “ŋinijena, ka luka atekerin, ka ituŋa, ka aŋajepa.” (Apukokinio 7:9) Kotoma akwapin 235, aritai ka aritai luka Ajenak luka Yawe ejaas cut aingaranakin ice aisisiaun irotin lukamin ka nuekoto Yawe.

3. Nejaai ingai itebeikinete Ajenak aima kec, ido anyoika abilasinei nuka aima nu inacitos kes?

³ Emisikitos Ajenak ebe Yawe bon ibusakinit aima. Engeritos kes akukonokin aputosia nuegeren aarai aputosia nuka Edini. (1 Yokana 5:21) Mam kes emaete lukatwak kotoma oinono lo aidar ates akware kia karaida inonosio lu itopoloritos aiyununeta nuka idiinin lukaisab ka “aisisianakin naka ajokin.” (1 Timoteo 4:1) Konye italakarete kes ngul lu atwakiasi luminan kec kotoma aitacaun aisumuneta nuka Edeke ebe, ejaun ajarun naka lukatwak kotoma paradais akwap.​—Yokana 5:28, 29; Aswamisio 24:15.

4. Enyoin ejautene lo eyangaritos itunga luka Edeke kanu aingic aanyununeta?

⁴ Engeritos Ajenak aswam na aiŋic aanyununeta, aicud ka amuronut, kwape ejenatar ebe iboro lu kere eraasi luka Ekejodijodong. Mam kes emunokina toma aiŋic aanyununeta kanu ayuaror-amuno kec ejai nejaai Yawe.​—Awaragasia 18:10.

5. Kopone ani mam Ajenak luka Yawe ‘eraatar luka akwapin’?

⁵ Abala Yesu ebe ikesisiak “mam . . . eraas luka akwapin.” (Yokana 17:16) Yesu elopet abu onger alomar akiro nuka apugan na aparasia ke. (Yokana 6:15) Kwapekwangin, mam Ajenak elomarete akiro nuka apugan, aitopolorit akwapkec, ka atiakatiaka kotoma atukono nuka akwap kana. Konye etacete kes esolo kec ka arimarit ikisila luka akwap na iboyotor kes.​—Yokana 15:19; Iromayon 13:1, 7.

6. Aicoreta anu etupitos ijaanakinak luka Edeke kanuka edukone ka elacit?

⁶ Naarai erimaritos kes ikisila luka apugan, eanyunete ajenak ebe iwadikauna edukone kec. (Tito 3:1) Erimaritos kes ikisila luka Edeke, aso mam kes irosete angor. (1 Timoteo 3:2) Bobo, kwape itosomaatar kes abwoeta nuka ebaibuli, mam etapit ijaanakinak luka Edeke aanyun edukone kec enangakini toma olacit.

7. Epone ani itodunitotor Ajenak Amina bonik?

⁷ Ajenak eminanara bonik. Amina na, amoriarit ka aminakec naka Edeke, imorikikit kes toma onacane lokabeit, karaida eraasi kes luatekerin ka akwapin nuipu. Ne edoikina ationis, araibo aparasia nu elomuna eipud, epote Ajenak atipet angarakin luce. Itodunete ajenak amin kotoma opone lo iboyotor.​—Yokana 13:35.

8. Aswamisio nuarokok anu nuesacitos itunga luka Edeke?

⁸ Itunga luka Yawe iswamaete noi kanuka aiboi kotoma aijar namunout, ido na esipokina. Esacete kes akoko, aingala, ayelo, emeret ka agwelanar naakoko. Mam ikiliok ibungaete angor kec. Eroko ice erauna Ajenak eswamainenete iboro luu, konye ajalakis kotoma aingarakinio naka Yawe. “[E]lotar” kes kakonyen luka Edeke.​—1 Ikorinton 6:9-11.

9. Inyoin bo abala etabo ediopet kanuka ikanisan luenyaritai luemoyo luka Afrika?

⁹ Etapit, idiinin luipu einer ebe ejaatatar kes ka abeit. Acepak, itodunete kes aswamisio lukaumokin aigangitor nuebalas kes. Kwape aanyunet,  nuikamunitos luenyaritai ikanisan lukaemoyo arai ikanisan luetupitos einono loka Afrika ebala eitabo ediopet ebe: “Aswamisio nuka angican aanyununeta ka nuka emuron kes adautu atukono nuipu [nuitetiak nuka Ikristayon] aijaar. . . . Ebalas epedorete aidwar ka aswam aumonokineta. Ijaanakinete inabin kotoma kec aitapoeta, ka apolou naka arujasia. Itosomaete akipi nukalaunak, akinyet nakalaunan, ekuron, atabasan, ka luisupurio kanu aimukia ka aitikitikio adekasinei.”

10, 11. Kanukinyo mam nuenyaritai aumonokineta lolo kitodunitotor ebe erai edini ngol loka Edeke?

¹⁰ Itunga luka idiinin kalu, ebalas ebe aumonokineta kes itodunitos ebe isirerengit Edeke edini kec. Konye aumonokineta luebakai nuu, mam itodunete ebe ejaatar edini ka isimario naka Yawe. Itogogongit Satan imaak lukaisab ice aswam ‘aswamisio nukaumokin.’ (2 Isesalonikan 2:9) Aiyatakin, adwarit Ebaibuli ebe aiyinanakineta nakaswam aumonokinete kanejai Edeke kwape nat aidwar, ainer kangajepa ka aijen naitegelikina “enaŋete.”​—1 Ikorinton 13:8.

¹¹ Ekwenyarit Yesu: “Ŋinituŋanan yenikabala eoŋ ebe, ‘Ejakait, Ejakait,’ mere ŋes elomuni ajakanut naka akuj; dimarai yeniswamai nuekot papaka loejai toma akuj. Katemarete luipu kapaaran kaŋin atiar, ‘Ejakait, Ejakait, mam kereka kipou kadwarata kokirorikon, kokirorikon da kereŋeasi ajokin, kokirorikon da keswamata aswamisio nukapedor nuipu?’ Kasodi kalimor mamakec ebe, ‘mam lem kajeni yes nepecep da: Konyoutu kama ajai, yes lukeswamak nukepali.’​—Matayo 7:21-23.

12. Lukangai luu elomarete Ajakanut naka akuj?

¹² Luangai do, elomarete Ajakanut naka akuj? Erai ngul luiswamaete akote naka Yawe.

13. Anyonin aswam na icorakinit Edeke iketunga lolo, ido lukangai iswamaete nges?

¹³ Anyoin akote naka Edeke kanuka iketunga lolo? Abala Yesu ebe: “Elimonokinio Akiro Nukajokak nuka ajakanut anatar akwapin kere, araut akajenak mama ejaas atekerin kere.” (Matayo 24:14) Na nges aswam naiswamaete Ajenak luka Yawe Kakukuranut.

14. Anyoin Ajakanut naka Edeke, ido lukangai ipugaete kotoma Ajakanut kana?

¹⁴ Anatar “akwap kere na ejaas itunga” elimonokinete Ajenak luka Yawe nuikamunitos Ajakanut naka Edeke kwape apugan na okuju na ebuni aipuga akwap kere kotoma adolit. Isisianakinete kes ebe adakaki Yawe, Yesu Kristo araun Ekabaka loka Ajakanut kangin, nepepe ka ipugak ice 144,000 lueseunitai kotunga.​—Daniel 7:14, 18; Apukokinio 14:1, 4.

15. Inyoin emudiari Ajakanut?

¹⁵ Itosomaete Ajenak Ebaibuli aitodinikinia itunga ebe Ajakanut naka Edeke nges ebuni amudiar eswamae loka Satan kere. Elemario idiinin lukaisab ka aisisianakineta kec nu itidisiaritos Edeke ido itopoloritos Ekejodijodong! (Apukokinio 18:8) Elemario bobo da apugan naka itunga, na ebwoi itepegit Edeke!​—Daniel 2:44.

16. Lukangai eraunos ijaanakinak luka Yesu Kristo, ido aibo epote kes aiboio?

¹⁶ Bobo, itodiaritos Ajenak luka Yawe ebe Yesu Kristo eyauni arerengusio nukaumokin nejaasi ngul kere lu iswamaete nu ekoto Edeke. Eraunos kes ikejaanakinak kotoma Akwap. Isumunit Ebaibuli: “Eyuuni yenilwaritoi kemony; ka yenikican yenemamei ekeŋarakinan. Itimi yenikican ka yenilwaritoi, itajari da aijar naka luilwaritos.”​—Isabulin 72:12, 13.

17. Lungai bon elimonokinete Ajakanut naka Edeke?

¹⁷ Emamei bobo ace atukot naka itunga na iswamai akote naka Edeke kotoma alimonokin akiro nuajokak nuka Ajakanut. Ajenak luka Yawe bon kes itejenaaritos Ajakanut naka Edeke anatar akwap kere.