Araun epapero loka Edeke nges ibore yen ejok yen kepedori atakanikin ijo. Isisianakin Edeke ijo epone loka aiyalama ka ayuwara; elacakini nges ijo kotoma aiyununeta numam edolito ka aswamisio nu emudiarete. Epupuni nges alipasinei kon. Ingarakini nges ijo ainumumun ainapakina na otoma ka amunokina. (Isabulin 71:5; 73:28) Ingarakini Edeke ijo kapakio nu etioko. (Isabulin 18:18) Ido ijaikinit Edeke ijo akeinakinet na aijar namam edaun.​—Iromayon 6:23.

Kwa ikunyakina ijo nejaai Edeke ikunyakini do ijo da nejaas ipapero luka Edeke. Eraunos kes da ikon ipapero cut. Epusete do kes kwape inacan ka anacan kon. Iyalamikinos kes aisisianakin ijo nuikamunito Edeke ido ingarakinete ka aitongongon ijo.

Mam oni iriaka ka Edeke. Kwa imoiya ijo epaperone loka Edeke, ibusakinit ijo amisikin akirot napolon. Epaperone ka Edeke mam erai kwa epaperone kalu eriakasi. Emojongit nges noi, ecoo noi ido Engongong adepar oni. Nges Epugan wok. Aso ikoto oni araun ipaperoke, ibusakinit oni aipup ka aswam nu elimokini nges oni. Eyauni na duc ajokis mamawok.​—Isaia 48:18.