Araun epapero loka Edeke, ekoto ijo aisisiaun nuikaminito nges. Ejenete ipapero kon ekoni ekiror ka aitosom? Eebo. Ekoto Edeke ijo ajenun ekekiror ka aitosom da. Ekiror loka Edeke nges Yawe. (Isabulin 83:18; Matayo 6:9) Ibusakinit ijo aisisiaun nu ekoto nges ka numam nges ekoto. Ekoto ijo ajenun lukangai ipapero ke ido lukangai lukasurup ke. Eyangaikini apak ajenun yenice. Inera Ebaibuli ebe erai acoa adumun apak naka aisisia nuikamunito Yawe.​—Ipeson 5:15, 16.

Ipapero luka Edeke iswamaete nu isialamikinito nges. Koomoom nuikamunito ipapero kon. Kiyanga ijo kes erono ido iswamai iboro lu engerito kes, epaikinete kereka kes erasi ikon ipapero? Mam cut! Kwape kwangin da, arai ikoto ijo araun epapero loka Edeke, ekoto ijo aswam nu isialamikinete nges.​—Yokana 4:24.

Mam idiinin kere ingarenikinete toma opaperone ka Edeke. Yesu opaperoke Edeke obe, enerit nuka irotin iarei. Ediope erot elal ido ileleba itunga. Erot ngol eyangari toma amudiaro. Loce erot ediding ido itunga idis itoritos tomake. Erot ngol eyangari toma aijar mamam edaun. Apolou ke ebe arai ikoto ijo adumun epaperone loka Edeke, ibusakinit ijo aisisiaun epone loedolit kanu amaiya nges.​—Matayo 7:13, 14.