Isisiauni ijo nuikamunitos Edeke kotoma asiom Ebaibuli. Kolosek abu Edeke koseu ice itunga aiwadik akewomisio. Aiwadikaeta ngun enyaritai Ebaibuli. Lolo kisisiauni oni nuikamunito Edeke kotoma aisiom Ebaibuli. Toma Obaibuli, ejaasi akiro nuka Yawe, aso enyaritai bobo Ebaibuli Akirot naka Edeke. Iyuni oni nu inera Ebaibuli naarai Yawe mam ingalai. “Numam epedori Edeke aiŋal.” (Iburanian 6:18) Akirot naka Edeke ejaas ka abeit.​—Yokana 17:17.

Ebaibuli nges adiopet kainakinet Edeke naepol noi nejaai oni. Ebaibuli eputos bala ebaluwa kanejai papa lominat nejaasi idweke. Elimokinit oni aisumunet naka Edeke aijulakin akwap na toma aibosit na ibus aboio​—paradais. Elimokinit oni nu eswama nges kolosek, nuiswamai nges kwana, kanu ebuni nges aiswamaikin idwe ke lumunon koingaren. Ingarakinit bobo oni aitijii atiokisio wok ka adumun aiyalama.​—2 Timoteo 3:16, 17.

 Ajenak luka Yawe eraasi ipapero luka Edeke; ingarakinete ijo amisikin nu isisianakini Ebaibuli. Olimok kes ebe ikoto ijo aisisia Ebaibuli. Mam kes itelemunete ijo isirigin kanu aisisia. (Matayo 10:8) Aidokokin ne, ipedori ijo Ajaanakin aurianeta kec. Ejaanakinos nu toma aibosio nuka aima nu enyaritai Okingdom Hall. Kijaanakin ijo aurianeta nu, ipolori ijo katipet kotoma aijen na ikamunit Edeke.

Isisiauni ijo nuikamunito Edeke kotoma oboro lu iswamat nges. Awanyunet, inera Ebaibuli: “Abu Edeke kosub akuj ka akwap.” (Ageun 1:1) Ne asubia Yawe “akuj,” abu nges kiswama akolong. Kwana inyo elimokit nen oni nuikamunito Edeke? Elimokinit oni ebe Yawe ejaas keda apedor. Nges bon epedori aswamaun ibore yenikapedor kwape akolong. Elimokinit bobo oni ebe ecoo Yawe, kwape ekotore acoa kanu aswamauna akolong, na ijaanakini amwanis ka aica komam idopori cut.

Isuban luka Yawe itodutos ebe emina nges oni. Koomoom kanu araito nuengelengela nuejaas toma akwap. Ti Yawe epedo aijaikin oni araito na epone ediope​—karaida amikar cut. Konye, abu Yawe koinak oni araito nuipu kongelengela kotoma ailungulungeta, apolesu, oriangin ka ajijim. Itodunit na ebe Yawe eraai Edeke lomam emina bon konye erai ojokotau ka eomoomana ka esiana.​—Isabulin 104:24.