Araai ikoto ijo araun epapero loka Edeke, ibusakinit ijo aitup edini lo ecamunit Edeke. Abala Yesu ebe “ŋul da luemaete” ibusaskiniti aima Edeke opene kalo iriamanara ka “abeit.” (Yokana 4:23, 24) Ejaai opone ediopet bon lo edolit amaia Edeke. (Ipeson 4:4-6) Edini lokabeit ingarenikini toma aijar namam edaun, edini lokaisab ingarenikini toma amudiaro.​—Matayo 7:13, 14.

Ijenuni ijo edini lokabeit kotoma asesen itunga luetupito nges. Kwape ejokar Yawe, ngul da lu eraas ikemaak lukabeit ibusakinit oraas itunga luejokak. Kwape eraia ekitoi lomucunga lokajokan araito nu ejokrak, edini lokabeit itolomuni itunga luajokak.​—Matayo 7:15-20.

Ipapero luka Yawe itesegaritos Ebaibuli. Ejenete ebe ebunit Ebaibuli kama ejai Edeke. Ecamakinitos kes nu inera nesi aiteten aijar kec, aitemokinia atiokisio, ka aingarakin kes aisisiaun nuikamunitos Edeke. (2 Timoteo 3:16) Etamito kes aitup nu elimonokinete.

 Itodunitos ipapero luka Yawe amina nejaas luce. Abu Yesu itoodu amina nejaa itunga kotoma aisisianakin kes nuikamuito Edeke, ka aitangaleunun ngul lu adekasi. Ngul lu etupito edini lokabeit itodunete amina nejaas luce. Kwape Yesu, mam kes imuwaritos ngul lu icanas araibo lu aceteker. Abala Yesu ebe ejenunete itunga ikesisiak kotoma amina na itodinikinos bonik.​—Yokana 13:35.

Itopoloritos ipapero luka Edeke ekiror Edeke, Yawe. Arai enger itungan aitosom ekonikiror, erauni kereka itunganan ngin opaperokon lotau? Mam! Ne ijaar oni ka epapero, itosomai oni ekekiror ka alimonokin luce iboro luejokak nukikaminitos nges. Aso ngul luekotos araum ipapero luka Edeke ibusakinit aitosom ekekiror ka ainer nuikamunitos nges nejaas luce. Ekoto Yawe oni aswam ngun.​—Matayo 6:9; Iromayon 10:13, 14.

Kwape Yesu, ipapero luka Edeke isisianakinete itunga nuikamunitos Ajakanut naka Edeke. Ajakanut naka Edeke nges apugan naka Akuj na itarauni akwap araun paradais. Emorete ipapero luka Edeke kaluce akiro nukajokak nuka Ajakanut naka Edeke.​—Matayo 24:14.

Ajenak luka Yawe ka ice etamitos araut ipapero luka Edeke. Itesegaritos kes Ebaibuli ido ejaas ka amina komamakec bonik. Itosomaete ido itopoloritos ekiror loka Edeke ka aisisianakin luce nuikamunitos Ajakanut naka Edeke. Ajenak luka Yawe etupitos edini lokabeit kotoma akwap lolo.