Iboro lueroko luiswamasi kwana akwap itodunitos ebe eyapiei Paradais. Abala Ebaibuli ebe iwanyuni oni apakio nuetioko eroko Paradais edoluna. Iboie oni kapakio kangun kwana! Lu kes ice obore lu abala Ebaibuli epote etakanuun:

Ijiisio lukapolok. “Naarai enyoikini ateker asurokin ateker, ajakanut da asurokin ajakanut.” (Matayo 24:7) Etodolikin adwarasit na. Ageun okaru 1914, ajaunos ijiisio iarei lukakwap kere ka ijiisio luididik luipu. Aritai luka itunga kes atwakata.

Adekasinei nu enyanyara. Ejaun “atular kaboisio nuegelegela.” (Luka 21:11) Araunos nu abeit? Eebo. Adeka na akojo, Adeka na etau, elwera, emusuja, eisek, ka ace da nu ayarata aritai nuka itunga.

Aikiodiokus naka inyamat. Kotoma akwap kere ejaa itunga lu emameikinitos inyamat luedolito kes ainyam. Aritai nuka itunga etwakete kanuka etengei kangol karu. Na nges awanyunet ace ebe edodor Paradais ajaun nee. Ebala Ebaibuli ebe: “Ejaunun da ebel.”​—Marako 13:8.

 Amaraneta nuka akwap. “Ejaunun . . . amaran naka akwap aboisio nuegelegela.” (Matayo 24:7) Nuda arautu abeit kapakio wok. Itunga lu edeparito arita kes adautu atwakare kotoma amaran naka akwap ageun okaru 1914.

Itunga lukarokok. Eraunos itunga “lueminas apesan” ka “lueminas bonik.” Eraunos “lueminas aitelelio itia amin Edeke.” Idwe eraunos “luiulakinito ikauriakakec.” (2 Timoteo 3:1-5, New World Translation) Mam kereka ijo icamuni ebe ipu itunga kwa lu lolo? Mam kes eyongitos Edeke, ido iswamanakinete kes ngul lu etamitos aisisia nuikamunitos Edeke atiokisio.

Epali. Naraai ejaun “aiyatakina naka epali.” (Matayo 24:12) Aomit icamuni ijo ebe epali lo akwana edeparit lo ikaru idis okau. Itunga aboisio kere ejaasi kakuriau kanu abuworo iboro, akokoo ka amusungao.

Iboro lu kere itodunitos ebe eyapiei ajakanut anaka Edeke. Ebala Ebaibuli ebe: “Naiwanyunata akiro ŋun ketakanut, kojenutu ebe aapu ajakanut naka Edeke.” (Luka 21:31) Inyo bo Ajakanut naka Edeke? Erai apugan naka Edeke naka akuj na eyauni Paradais toma akwap naa. Ajakanut naka Edeke elemari apugasia nuka itunga.​—Daniel 2:44.