Paradais mam eputoinos kede akwap na iboio oni kwana. Mam Edeke akato akwap ilelebite amengeranut ka aiturur, ariebo ka aiticanio. Koingaren, itarauni Edeke akwap paradais. Biai bo ejaunor Paradais? Aanyutu oni nu ebala Ebaibuli:

Itunga luejokak. Paradais eraun ere loka ipapero luka Edeke. Iswamaete kes iboro lukajok nejaasi luce. Iboete kes kotoma orotin luedolito luka Edeke.​—Awaragasia 2:21.

Inyamat luipu. Kotoma Paradais, emameun etenge. Ebala Ebaibuli ebe: “Iduliunete akima [inyamat] akwap.”​—Isabulin 72:16.

Itogoi luejokak ka aswam nailelakinit. Kotoma Paradais, angol kale ejaunos ka ere ke. Ngin itungan iswamai aswam na eyauni aiyalama naka abeit.​—Isaia 65:21-23.

 Ainapakin akwap kere. Mam bobo itunga ejiosi ka atwanare kotoma ojie. Ebala Akirot naka Edeke ebe: “[Edeke] itasaŋi ijiisio.”​—Isabulin 46:8, 9.

Angaleu. Isumunit Ebaibuli: “Loiboienenei kanen [Paradais] mam ebala ebe, ‘Adek eoŋ.’” (Isaia 33:24) Boboda, emameun yen eŋwalit karaida emuduk karaida emajiŋ karaida lomam inera.​—Isaia 35:5, 6.

Anangaki ariebo, aiturur ka atwanare. Ebala Akirot Edeke ebe: “Mam bobo ejaun atwanare, karaida akudian, karaida aimony, karaida ariebo, mam bobo ejaunos; naraai atuboros nusodit.”​—Apukokinio 21:4.

Alemar itunga lukarokok. Isumunit Yawe ebe: “Egelario lukaronok kakwap, erutorio luebilete ibotei.”​—Awaragasia 2:22.

Epote itunga aminanar ka ayongit luce. Mam bobo ejaun amameu naka etube; aridakinio, angata ka angar. Imorikikinos itunga kosodete aiboi korotin Edeke luedolitos.​—Isaia 26:9.