Yesu Kristo erai Okoku loka Yawe ido nges epapero loosef, lominat. Eroko nges ebuno akwap kwape etunganan, iboit Yesu kotoma akuju kwape esubasit lomoyo lokapedor. (Yokana 17:5) Kosodi nges abunore toma akwap kanu aisisianakin itunga abeit naka Edeke. (Yokana 18:37) Ijaik da nges akeijar kanu alakun itunga luerimaritos kotoma aronis ka atwanare. (Iromayon 6:23) Erai Yesu kwana Ekabaka loka Ajakanut naka Edeke, apugan naka okuju na eyauni Paradais toma akwap na.​—Apukokinio 19:16.

Eraasi imalaikan da ipapero luka Edeke. Mam imakikan egeunitos aijarakec kwape itunga kotoma akwap. Esubakinitai kes toma akuj eroko Edeke esuba akwap. (Yob 38:4-7) Ejaa imalaikan luedolitos aritai ka aritai. (Daniel 7:10) Ipapero lu, luka Edeke luko okuju ekotosi itunga aisisiaun abeit naka Yawe.​—Apukokinio 14:6, 7.

Ejaa Edeke ipapero toma akwap da, enyarit nges kes ijenak ke. Ajenan kotoma arabis inera nu ejeni nges nuikamunito yinice, araibo icebore. Elimonokinete Ijenak luka Yawe luce nu ejenete kes nuikamunito Yawe ka akelosikineta. (Isaia 43:10) Kwape imalaikan, ekotos Ajenak aingarakin ijo asisiaun abeit naka Yawe. Ekotos ijo da araun epapero loka Edeke.